د پاکستان د بهرنیو چارو وزارت ویاند شفقت علي خان ویلي، چې د پاکستان او د طالبانو حکومت ترمنځ د اړیکو خرابېدو یو اساسي علت، په افغانستان کې د تحریک طالبان پاکستان پناهځایونه دي.
شفقت علي خان یوې خبري ناستې ته ویلي، چې پاکستان دا مسله له طالبانو سره شریکه کړې او باید حل شي.
نوموړي ټینګار کړی، تر څو چې دا ستونزه حل نشي، دوه اړخیزه همکاري به نه وي.
که څه هم د طالبانو حکومت تر اوسه په دې اړه غبرګون نهدی ښودلی، خو تر دې مخکې یې څو ځله په افغانستان کې د ترهګریزو ډلو د فعالیتونو ادعاوې رد کړې دي.
وسله والو د بلوچستان د پنجګور ولسوالۍ د پاروم په جهین سیمه کې د ملي احصایې او ثبت ادارې دفتر سوځولی دی.
سیمهییزې سرچینې وایي، وسلهوالو د دفتر اسناد هم له منځه وړي دي.
تر اوسه د پېښې مسؤلیت چا نه دی منلی.
د یادونې ده چې نن ورځ یې په ټانک کې د ایف سي ځواک د دوو سرتېرو کور هم سوځولی و.
د طالبانو حکومت د بهرنیو چارو وزیر امیرخان متقي وایي، هیڅوک باید له دوی نه ازار نشي.
هغه یوې مدرسې کې د طالبانو فراغت غونډې ته ویلي، چې د پوهو او باتجربه کسانو له تجربو باید ګټه واخیستل شي او هغوی د رټل کېدو پر ځای په غېږ کې ونیول شي.
امیرخان متقي دا وینا داسې مهال کوي، چې تر دې وړاندې یو شمېر شنونکو ویلي، د طالبانو په ټولو اداراتو کې یوازې ملایانو ته لومړیتوب ورکول کېږي.
په پام کې ده چې راتلونکې اوونۍ به د افغانستان په اړه د ملګرو ملتونو د کاري ډلې ناسته ترسره شي.
دا ناسته د قطر د نه همکارۍ له کبله په ان لاین بڼه ترسره کېږي.
ویل کېږي چې د ناستې اجنډا به پر اقتصاد او افغانستان کې د نشهیي توکو پر وړاندې پر مبارزې ورټوله وي.
تر اوسه په دې اړه رسمي څه نه دي ویل شوي.
المان کې د افغان کورنیو او ټولنو استازولۍ د دغه هېواد لومړي وزیر ته یو پرانیستي لیک کې لیکلي، چې د المان حکومت او ولس باید ټول افغانان د محدودو افغانانو پر جرمي کړنو ونه ارزوي.
لیک کې د المان د لومړي وزیر اولاف شولتز له هغې پرېکړې ملاتړ شوی، چې ویلي یې وو، مجرمین باید مجازات او خپل وطن ته وشړل شي.
په دغه لیک کې ددې برید غندنه شوې او ویل شوي چې ددې او دې ته ورته بریدونو عاملین دې ونېول شي او مجازات دې شي.
دوی المان کې له افغانانو غوښتي چې د جرمونو مخنیوي کې له دغه حکومت سره مرسته وکړي او دغه راز یې د المان له خلکو او دولت غوښتي چې افغانانو ته د غازي امان الله خان د اولادونو او پیروانو په سترګه وګوري.
د یادونې ده چې د خلکو پر یو ټولي د یو افغان له لوري د موټر خېژولو پېښې د المان د لومړي وزیر غصه را پارولې ده.
د طالبانو حکومت ویاند ذبیح الله مجاهد د ملګرو ملتونو امنیت شورا پر بندیزونو د څار کمېټې هغه راپور ته غبرګون ښودلی، چې ګواکې د القاعده ډلې غړي کابل کې پټنځایونه لري.
نوموړي ویلي، د ځینې هېوادونو استخباراتي کړۍ د ملګرو ملتونو امنیت شورا کې د افغانستان په اړه عامه ذهنیت خرابوي او له دغه ادرسه د دوی پر وړاندې تبلیغات کوي.
تر دې وړاندې یادې کمېټې په خپل راپور کې ویلي وو، چې د داعش ډلې ځینې غړي له خپلو کورنیو سره یو ځای کابل او ځینې نور یې د ولایتونو په لرو پرتو سیمو کې اوسي.
سیمهییرې سرچینې وایي، چې د سمنګان ایبک ښار کې نن د جمعې لمانځه پر مهال یو جومات کې چاودنه شوې.
تر اوسه د چاودنې د نوعیت او تلفاتو په اړه څه نه دي ویل شوي.
لاهم چا د یادې پېښې مسؤلیت نه دی منلی.
د بلوچستان د هرنای په ټاکري شاهرګ سیمه کې بمي چاودنه شوې، چې په نتیجه کې ۹ کسان وژل شوي او نهه نور ټپیان دي.
ځایي سرچینې وایي، چې چاودنه د مزدورانو پر یو پک اپ موټر شوې، چې ۱۸ کسان په کې سپاره وو.
سرچینو زیاته کړې، چې وژل شوي کسان د سوات او دیر سیمو سره تعلق لري.
راپورونه وایي چې د سیمې مخابراتي شبکې له تېرو دوو ورځو راهیسې بندې وې، چې له امله یې د پېښې په اړه معلومات په ځنډ سره ترلاسه شوي دي.
مالیزیا وایي، طالبان په رسمیت نه پېژنې؛ نو ځکه ورسره د پوهنې او نورو ستراتيژیکو برخو کې تړون نه لري.
د مالیزیا د پوهنې وزیره وایي، چې له طالبانو سره یې د زده کړو برخه کې کومه هوکړه نه ده کړې.
فضلینا سیدک ویلي، د تېر کال نومبر میاشت کې دغه هېواد ته د طالب چارواکو سفر یوازې د دوی د زده کړو له سیستم سره د دغو چارواکو د اشنایي لپاره ترسره شوی.
د ملګرو ملتونو امنیت شورا پر بندیزونو د څار کمېټه وایي، طالبانو القاعده ته خوندي پټنخایونه ورکړي چې اوس مهال پکې له خپلو کورنیو سره یو ځای اوسېږي.
یادې کمېټې یوه خبرپاڼه کې ویلي، چې د القاعده ډلې غړي په شهرنو، وزیر اکبرخان، قلع فتح الله او یو شمېر نورو مرکزي سیمو کې اوسېږي؛ خو د یادې ډلې رهبران بیا د سرپل، کندز، غزني، لوګر، وردګ او یو شمېر نورو ولایتونو لرې سیمو ته انتقال شوي دي.
راپور کې راغلي، چې طالبانو القاعده ډلې ته پاسپورت او تذکرې ورکړې او یو شمېر هېوادونو ته یې د تګ راتګ زمینه هم ورته برابره کړې.
د سرچینې د معلوماتو له مخې، د القاعده ډلې مهم غړی حمزه الغامدي د کابل په شش درک او ابوالاخلاص المصري په افشارو کې ژوند کوي.
راپور زیاتوي، چې له منځني ختیځ هم د یادې ډلې۳۰ غړي کونړ ته راغلي دي.
د طالبانو حکومت تر اوسه په دې اړه څه نه دي ویلي.