۱۵ دقیقې؛ د کابل د آمنیه قوماندانۍ د ویاند خالد ځدراڼ تازه چاپ شوی کتاب دی چې په ۶۲۴ مخونو تازه چاپ شوی دی.

په دې کتاب کې ښاغلی ځدراڼ په افغانستان کې د امریکا تر مشرۍ د ناټو ځواکونو پر وړاندې د خپلې مبارزې د لوړو ژورو، د افغانستان په اړه د پاکستان د پوځ د پالیسۍ، د ډیورنډ لاین د کرښې دواړو لوریو ته د پښتنو په ستونزو او د منظور پښتین په مشرۍ د پښتون ژغورنې غورځنګ په فعالیتونو خبرې او کیسې شوي.

خالد ځدراڼ د خپل تازه کتاب په ۶۰۲ دوهمه پاڼه کې د منظور پشتین سره د خپلې لیدنې په ترڅ کې ادعا کړې چې د ملي جمهوري غورځنګ مشر او د پاکستان د پارلمان غړي محسن داوړ افغانان احساساتي خلک او خره بللي.

نوموړي لیکلي: “افغانان دومره خره دي چې د غازي امان‌الله خان د زوکړې ورځ ور مبارک کړه بیا در پسې له شا روان وي او ملي مشر درته وایي.»

ځدراڼ زیاتوي چې منظور پښتین ورته ویلي چې محسن داوړ غوښتل چې پښتون ژغورنې غورځنګ د پاکستان حکومت په آډانه کې رسمي کړي؛ خو نوموړي دا چاره د پاکستاني استخباراتو هوډ او هېله بللې وه او مخالفت یې کړی وو.

په کتاب کې راغلي چې منظور پښتین د پي ټي آیم رسمي کیدل له “بره افغانانو” سره یو ډول خیانت، د لوی افغانستان جوړیدنې پر وړاندې خنډ او د دوی د مایوسۍ سبب بللی وو.

تردې مهاله منظور پشتین او محسن داوړ ددې ادعا په اړه څه نه دي ویلي.

وزیرستان کې د متحده امن سیاسي غورځنګ غړو ویلي، چې د دوی په سیمه کې په روانه نا امني او وژنو سترګې نشي پټولی.

دوی ویلي، که د پاکستان حکومت یې امن نه نیسي؛ نو خپله اړ دي، چې خپل امنیت خپله ټینګ کړي.

هغوی پر دولت کلکې نیوکې کړې، چې د امنیت په برخه کې پاتې راغلي دي.

باور دا دی، چې په وزیرستان او نورو ګڼو سیمو کې ډېری وخت پاکستان خپله د نا امنۍ هڅې کوي.

واشنګټن پوسټ ورځپاڼې لیکلي، چې د منځني ختیځ لپاره د امریکا ځانګړي استازي د عمان له لارې ایران ته پیغامونه استولي.

یادې ورځپاڼې د باخبره امریکايي سرچینو په حواله ویلي، چې دا چاره د مستقیمو خبرو اترو پیلولو هڅه ده.

د سرچینې د معلوماتو له مخې، که باور تر لاسه شي او رسمي دعوت وشي؛ نو ښايي سټیو ویتکاف تهران ته هم سفر وکړي.

تر دې وړاندې بیا د امریکا ولسمشر هم ویلي وو، چې له ایران سره د مستقیمو خبرو د پیل امکان شته.

رویټرز ویلي، چې د ټرمپ ادارې پرېکړه کړې، چې لږ تر لږه د شپږ بهرني مرستندویه پروګرامونو، په شمول د بیړنیو خوړو مرستې، بېرته فعاله کړي.

دا مرستې د لبنان، سوریې، سومالیا، اردن، عراق، او ایکوادور لپاره فعالیږي؛ خو د افغانستان نوم لاهم د دغو مرستو په لیست کې نشته.

تر دې وړاندې بیا د امریکا د بهرنیو چارو وزارت ویلي وو، چې د افغانستان لپاره یې د خوړو مرستې یو شمېر پروګرامونه ځنډولي دي.

د کابل ښار د احمد شاه بابا مېنې په لسم بلاک کې نامعلومه وسله‌والو یو پخوانی نظامي د سې شنبې په ورځ غرمه مهال وژلی دی.

ځايي خلک وايي، چې وژل شوی کس قیوم نومېده او د ملي اردو پخوانی غړی و.

په رسنیو کې لاس په لاس شوې ویډیو کې لېدل کېږي، چې قیوم د خپلې مېرمنې او ماشوم د سترګو پر وړاندې په نښه شوی او برید کوونکی له کومې ویرې پرته له سیمې تښتېدلي دي.

د طالبانو حکومت هم تر اوسه په دې اړه څه نه دي ویلي.

د امریکا د بهرنیو چارو وزارت وایي، د روسیې په ملاتړ د اکراین سره په جګړه کې د دوو چینایي وګړو نیول کیدل د اندیښنې وړ بللي.

د امریکا د بهرنیو چارو وزارت په یوې اعلامیې کې ویلي، داسې معلومات یې ترلاسه کړي چې د اوکراین پر وړاندې په جبهه کې د روسیې لپاره د جنګېدونکو چینایانو نیول کیدل سخت اندیښمن کړي دي.
تردې مهاله مسکو او بیجینګ ددې ادعا په اړه څه نه دي ویلي.

د افغانستان د ژغورنې ملي شورا په یوه تازه اعلامیه کې اعلان کړی چې د پخواني حکومت لوړپوړی چارواکی محمد عمر داودزی د دې شورا د اجرائیه رئیس په توګه ټاکل شوی دی.

په اعلامیه کې راغلي چې تازه ۳۴ نور سیاسي مشران او د مدني ټولنې استازي د شورا غړيتوب ته منل شوي، چې له دې سره د شورا د غړو شمېر ۷۱ ته رسېدلی دی.

د افغانستان د ژغورنې ملي شورا، چې جهادي مشران، د پخواني حکومت چارواکي او سیاسي شخصیتونه پکې ګډون لري، د طالبانو حکومت له واک ته رسېدو وروسته له هېواده بهر جوړه شوې ده.

مارشال عبدالرشید دوستم، عطا محمد نور، محمد محقق، عبد رب رسول سیاف او سرور دانش د دې شورا له بنسټیزو غړو شمېرل کېږي.

د تېر جمهوري نظام د ملي امنیت پخواني رییس معصوم ستانکزي ویلي، له افغان کډوالو سره ناوړه چلند بې ساری دی.

نوموړی وایي، د مهاجرت د اصلي بحران عاملین هم د دوی مداخلې او ناسم سیاستونه وو.

هغه ویلي، له دې بحرانونو باید درس واخیستل شي.

ښاغلي ستانکزي د اوسنیو ستونزو د حل یوازینی لار یووالی بللی او زیاته کړې یې ده، چې طالبان که د خلکو ضد کړنلاره تغییر نکړي؛ نو هېواد به قرباني کړي.

د پاکستان د پوځ مشر عاصم منیر وایي، هڅه کوي چې بلوچستان کې د پانګوالو د پانګونې لپاره یو امنیتي چارچوب جوړ او د هغوی د حفاظت لپاره درانه ګامونه واخلي.

هغه پر کانونو د پانګونې په اړه جوړې شوې غونډې ته ویلي، هڅه کوي، چې په دې برخه کې کوټلي ګامونه پورته کړي.

هغه په دې ناسته کې ډاډ ورکړی، چې د ټولو سوداګرو امنیت خوندي کوي.

د طالبانو حکومت مرستیال ویاند حمدالله فطرت وایي، چې کډوالو ته د رسېدنې عالي کمېسیون دولس کمېټو رئیسانو ناسته کړې.

دې کمېټې نورو مؤظفو کمېټو ته دنده سپارلې چې د کډوالو لپاره د غوره خدمتونو برابرېدو هڅې او د دوی ستونزو ته جدي پاملرنه وکړي.

بل لورته بیا د طالبانو د اوبو او انرژۍ وزارت سرپرست ویلي، چې دا یو ظلم دی؛ خو د افغانانو لاسونه هم تړلي نه دي.