د رویټرز د راپور له مخې، په وروستیو بریدونو کې د اسلامي انقلاب ساتونکو ځواکونو لوړپوړي قومندانان او ځینې ایراني سیاسي چارواکي وژل شوي دي.

د اکسیوس خبریال ویلي چې یو امریکايي ورته ویلي: د امریکا د پوځ بریدونه د توغندیو پر اډو متمرکز دي، په داسې حال کې چې د اسرائیل د پوځ بریدونه د لوړپوړو ایراني چارواکو د له منځه وړلو او د توغندیو پر پروګرام تمرکز لري.

په اسرائیل کې اټکلونه ښيي چې محمد پاکپور، چې د سپاه پاسداران قومندان بلل کېږي، وژل شوی دی.

یو لوړپوړي اسرائیلي مقام اکسیوس ته ویلي:«هدف دا دی چې د ایران د رژیم د سقوط لپاره ټول لازم شرایط برابر شي.»

هغه زیاته کړې: «موږ د ایران ټول مشرتابه، سیاسي او نظامي، که پخواني وي، که اوسني او که راتلونکي، هدف ګرځوو.»

نوموړي ویلي چې راتلونکې پېښې به د ایران د خلکو د احتمالي پاڅون له کچې سره هم تړاو ولري.

د اسرائیلي سرچینو په خبره، په وروستیو حملو کې د ایران د حکومت څو لوړپوړي چارواکي په نښه شوي، چې په دې کې د ایران مذهبي مشر علي خامنه‌اي او ولسمشر مسعود پزشکیان شامل دي.

همدارنګه، د اسرائیلي ارزیابیو له مخې، محمد پاکپور، د سپاه پاسداران نوی ټاکل شوی قومندان، په دې حملو کې وژل شوی دی.

تر دې دمه د دغو راپورونو رسمي تایید نه دی شوی، خو د اسرائیل د امنیتي سرچینو په وینا بریدونه د ایران د لوړپوړو نظامي او حکومتي مرکزونو پر ضد ترسره شوي دي.

د ایران د بهرنیو چارو وزارت په یوه اعلامیه کې ویلي چې د هېواد پر ځینو برخو د امریکا متحده ایالاتو او اسرائیل له لوري پوځي بریدونه شوي دي.

په اعلامیه کې یاد بریدونه د ایران د ملي حاکمیت او ځمکنۍ بشپړتیا خلاف عمل بلل شوی او دغه وزارت دا پېښه د نړیوالو قوانینو او د ملګرو ملتونو د منشور د اصولو سرغړونه ګڼي.

د ایران د بهرنیو چارو وزارت ویلي، چې ایران د خپل هېواد د دفاع حق لري او اړوند بنسټونه به د اړتیا په صورت کې لازم اقدامات ترسره کړي.

په اعلامیه کې همداراز ټینګار شوی چې دا ډول اقدامات د سیمې د ثبات او نړیوال امنیت لپاره اندېښنې زیاتوي.

دغه وزارت له ملګرو ملتونو او نړیوالې ټولنې غوښتي چې د وضعیت په اړه بېړني او اغېزمن ګامونه پورته کړي، څو د تاوتریخوالي د پراخېدو مخه ونیول شي.

د اعلامیې پای کې ویل شوي چې ایران به د خپل ملي امنیت او ګټو د خوندي کولو لپاره قانوني لارو چارو کارولو ته دوام ورکړي.

د متحده عربي اماراتو د دفاع وزارت وایي پر دغه هېواد د ویشتل شويو ایراني بالیستیک توغندیو؛ د هوايي دفاعي سیستمونو په لوړه وړتیا عمل کړی او یو شمېر توغندي یې په بریالیتوب سره شنډ کړي دي.

دفاع وزارت همدارنګه ویلي چې اړوندو ادارو د ابوظهبي ښار په یوې استوګنیزې سیمې کې د توغندیو د ټوټو د لوېدو له امله د اسیایي هیواد یو وګړی وژل شوی.

د دفاع وزارت دغه برید په کلکو ټکو غندلی او ټینګار یې کړی چې د ملکي وګړو، ملکي تاسیساتو او ملي بنسټونو په نښه کول په بشپړه توګه د منلو وړ نه دي.

دفاع وزارت زیاته کړې چې دا برید د ملي حاکمیت او نړیوال قانون ښکاره سرغړونه ده، او امارات د ځان لپاره د غبرګون بشپړ حق ساتي او کولای شي د خپلې خاورې، خلکو او مېشتو کسانو د ساتنې لپاره لازم اقدامات ترسره کړي، څو خپل حاکمیت، امنیت، ثبات او ملي ګټې خوندي وساتي.

د قطر اییرز یا هوایي شرکت اعلان کړی چې د دې هېواد د هوايي حریم د تړل کېدو له امله یې دوحې ته او له دوحې څخه خپلې الوتنې په موقتي ډول ځنډولې دي.

هوايي شرکت ویلي چې له حکومتي چارواکو او اړوندو ادارو سره نږدې همکاري کوي تر څو له اغېزمنو مسافرو سره مرسته وکړي، او کله چې هوايي حریم بېرته پرانیستل شي، الوتنې به بیا پیل شي.

شرکت زیاته کړې چې د عادي فعالیتونو له بیا پیل وروسته ښايي د الوتنو په مهالوېش کې ځنډونه او بدلونونه رامنځته شي.

همدارنګه، په حماد نړیوال هوایي ډګر او نورو مهمو هوايي ډګرونو کې اضافي ځمکني کارکوونکي ګومارل شوي، تر څو له اغېزمنو مسافرو سره مرسته وکړي.

د لومړنیو راپورونو له مخې، د قطر، بحرین او کویټ ترڅنګ په سعودي عربستان کې هم د چاودنو غږونه اورېدل شوي دي.

همدارنګه ویل کېږي چې پر ایران د امریکا او اسرائیل له لوري د ګډو او هممهالو پوځي بریدونو وروسته، ایران په سیمه کې د امریکا ځینې پوځي اډې په نښه کړې دي.

تر اوسه په دې اړه، کره جزییات نه دي خپاره شوي.

عربي رسنیو راپور ورکړی چې د دوحه، منامه او کویټ ښار په بېلابېلو سیمو کې د چاودنو غږونه اورېدل شوي دي.

د لومړنیو معلوماتو له مخې، د دغو پېښو د څرنګوالي او احتمالي زیانونو په اړه لا تر اوسه رسمي جزئیات نه دي خپاره شوي.

دا په داسې حال کې ده چې پر ایران د امریکا او اسرائیل ګډ پوځي بریدونه پیل شوي او ایران ښایي په سیمه کې د امریکا پوځي مرکزونه تر هدف لاندې راوستي.

د طالبانو حکومت مرستیال ویاند حمدالله فطرت وایي، پاکستاني ځواکونو تېره شپه او نن سهار پر کندهار او کونړ ولایتونو درانه بریدونه کړي چې له امله یې ملکي تلفات اوښتي دي.

د فطرت په وینا، نن سهار شاوخوا ۸:۳۰ بجې د تخته پل ولسوالۍ اړوند د جبري راستنېدونکو کډوالو پر موقت پنډغالي (انځرګي کمپ) هوايي برید شوی.

هغه زیاته کړې چې په دغه پېښه کې لږ تر لږه ۳ ملکي کډوال وژل شوي او ۷ نور ټپیان دي.

بلخوا، تېره شپه د اسعدآباد ښار اړوند د ډنډونو د بېلي په سیمه کې د لیري واټن ویشتونکو توپونو ډزې شوي چې د ښځو او ماشومانو په ګډون ۷ ملکي وګړي پکې وژل شوي او یو تن ټپي دی.

همداراز د ناړۍ ولسوالۍ کې د شپې شاوخوا ۱۰ بجې د غرنیو هاوانونو او توپونو د ډزو له امله ۴ تنه، چې یوه ښځه هم پکې شامله ده، وژل شوي او ۵ نور ټپیان دي.

د ورکړل شویو شمېرو له مخې، په دغو درېیو پېښو کې ټولټال ۱۴ کسان وژل شوي او ۱۳ نور ټپیان دي.

د امریکا ولسمشر ډونالډ ټرمپ له ایراني وګړو غوښتي چې په کورونو له امریکایي بمونو خوندي پاتې شي.

ښاغلي ټرمپ ویلي، ترهغه په کور پاتې شئ، ترڅو چې مونږ حکومت نسکور کړو، بیا دا حکومت د ایران د خلکو دی او تاسې ته سپارل کیږي.

ټرمپ پر ایران تور پورې کړی چې په بېلابېلو هېوادونو کې یې بې‌ګناه خلک وژلي او د کلونو په اوږدو کې د امریکايي سرتېرو د مرګ‌ژوبلې مسوول پاتې شوی دی.

نوموړي همداراز ایران «د ترهګرۍ ملاتړی هېواد» بللی دی.

هغه په ټینګار ویلي چې ایران ته به هېڅکله د اټومي وسلو د ترلاسه کولو اجازه ورنه کړل شي.

ټرمپ د ایران له ملي ګارډ، پوځ او پولیسو غوښتي چې خپلې وسلې پر ځمکه کېږدي او ډاډ یې ورکړی چې په دې صورت کې به مصونیت ولري، کنه د مرګ له برخلیک سره به مخ شي.

نوموړي ادعا کړې چې په ایران کې د رژیم د نسکورېدو بهیر روان دی.

د امریکا ولسمشر ډونالډ ټرمپ اعلان وکړ، چې څو شیبې وړاندې یې په ایران برید پیل کړی دی.

ولسمشر ټرمپ ویلي چې ددې بریدونو څخه یې موخه د امریکایي وګړو څخه دفاع ده.

امریکایي ولسمشر زیاته کړې، په تیرو ۴۷ کالو کې ایراني رژیم «مرګ په امریکا» شعار ورکاوه او په دې بریدونو غواړي د احتمالي ګواښ مخه ونیسي.