د روسیې د بهرنیو چارو وزیر سرګي لاوروف اروپايي هېوادونه د اوکراین جګړې پر غځولو تورن کړي دي.

لاوروف ویلي، اروپايي هېوادونه هڅه کوي، چې د اوکراین جګړه اوږده کړي؛ خو په ورته مهال یې بیا په دې برخه کې د امریکا د ولسمشر هڅې ستایلې دي.

نوموړي زیاته کړې، «ډانلډ ټرمپ پر عمل ولاړ شخص دی. د هغه شعار ‘سالم عقل’ دی، چې مانا یې دا ده چې ټول خلک کولی شي د امریکا په سیاستونو کې د بدلون شاهدان واوسي.»

د هغه په خبره، مسکو له واشنګټن سره په ټولو برخو کې هوکړه نه لري؛ خو یوازې به د ګډو ګټو په برخه کې له یو بل سره عملي همکاري ته تیار دي.

‏د تیرو څو ورځو راهیسې د تورخم د دروازې بندېدو، له امله د دې لارې ګڼ شمیر ناروغان، مسافر او سوداګر، له ګڼو ستونزو سره مخ دي.

په تورخم کې بند مسافر چې ډیری یې ناروغان دي وایي، په پیښور کې د اوسېدو لپاره ځای، او روژه ماتي لپاره پیسې نه لري.

دوي وایي، د پیسو د خلاصېدو له امله، شپې په جوماتونو کې تېروي.

طالب چارواکي د لارې د بندیدو پړه پر پاکستان اچوي او ادعا کوي چې په افغان خاوره د تاسیساتو مخنیوي دغه هیواد غصه کړی دی.

‏د ایران د ولسمشر مرستيال جواد ظریف ته نږدې سرچینې وایي، نوموړي له خپلې دندې استعفاء کړې.

تسنیم خبرې اژانس لیکلي جواد ظریف د ایران د قانون له مخې پدې دنده کې په غیر قانوني ډول کار کوي.

که څه هم له دولتي دندې د نوموړي استعفاء کومه نوې خبره نده خو ډیری ایرانیان ښاغلی ظریف یو ښه ډیپلومات بولي او په دولت کې یې شتون ګټور بللی.

جواد ظریف څوځلې د ایراني ولسمشرانو روحاني او پزشکیان ته د خپلو تیرو دندو له امله هم استعفاوې وړاندې کړې وې.

د امریکا جمهوري غوښتونکو ګوند د اکراین په ولسمشر ولادیمیر زیلنسکي فشار راوړی، ترڅو له دندې لاس واخلي او یا هم له روسیې سره د جګړې په اړه دریځ بدل کړي.

رویټرز د ټرمپ د ملي امنیت سلاکار مایک والتز له قوله ویلي، چې د دوی لپاره دا نه ده روښانه چې زیلنسکي سوله غواړي او که نه؟

هغه ویلي، دوی داسې رهبر ته اړتیا لري چې امریکا سره معامله وکړي او دغه جنګ ته د پای ټکی کېږدي.

د اکراین د جګړې په اړه د ولسمشر ټرمپ او ولسمشر زیلنسکي تر لفظي شخړي وروسته د دواړو هیوادونو اړیکې خړې پړي شوي دي.

د پاکستان د جمعیت علماء اسلام ګوند مشر مولانا فضل الرحمن وایي، طالبانو دا پلان درلود، چې افغانستان کې د پاکستان ضد فکر له منځه یوسي او په دې اړه یې طالبانو سره خبرې هم کړې وې.

فضل الرحمن ویلي، نوموړي د دغو خبرو راپورونه د پاکستان حکومت ته هم ورکړي وو؛ خو اسلام اباد بیا دا پروسه ودروله.

فضل الرحمن زیاته کړې، چې پاکستان د جمهوري نظام پر ضد د طالبانو ملاتړ وکړ؛ خو اوس یې د دوی په سر د سودا هڅه پیل کړې او غواړي چې یو وار بیا د نیابتي هېواد رول ولوبوي.

ټي ټي پي ډلې د باجوړ په عنایت کلي کې د اسماعیل په نوم د ایف سي ځواک یو سرتېری وژلی.

یادې ډلې ویلي، چې اسماعیل د دوی د شپږو مجاهدینو په وژل کېډو کې لاس کې درلود.

دوی ویلي، چې یاد عسکر له ډېرې مودې راهیسې د دوی هدف وو او بلاخره یې په عنایت کلي کې په وژل کېدو برلاسي شول.

د پاکستان حکومت تر اوسه په دې اړه څه نه دي ویلي.

د ایټالیا لومړۍ وزیرې جورجیا ملوني خبرداری ورکړی، چې د اوکراین پر سر د لوېدیځ د پاشل کېدو وېره زیاته ده او اړتیا ده، چې مخنیوی یې وشي.

هغې د برېټانیا له لومړي وزیر سره کتنه کې ویلي، چې په دې برخه کې برېټانیا او ایټالیا کولای شي د یو ارتباطي پل په توګه مهم رول ولوبوي.

د یادونې ده، چې د ټرمپ او زیلنسکي ترمنځ تر لفظي شخړې وروسته، اروپايي ټولنې ویلي، چې دوی د اوکراین ملاتړ کوي او نن بیا د اروپايي ټولنې سرمشریزه کې د اوکراین ولسمشر هم برخه اخیستې وه.

د امریکا د ملي امنیت پخواني سلاکار جان بولټون د امریکا د بهرنیو چارو له وزیر مارکو روبیو غوښتي، چې له دندې استعفا ورکړي.

نوموړي ویلي، که روبیو اوس استعفا ونکړي، نو ښایي راتلونکي ته یې باور زیانمن شي.

بولتون دا څرګندونې وروسته ترهغې کوي، چې د ټرمپ او زیلنسکي ترمنځ سپینه ماڼۍ کې لفظي شخړه رامنځته شوه.

اسټرالیايي ورځپاڼې اینټرپریټر لیکلي، چې له زیلنسکي سره د ټرمپ چلند د ټرمپ په لومړۍ واکمني کې له اشرف غني سره د ټرمپ له چلند سره ډېر ورته والی لري، چې له کبله یې طالبان پر افغانستان واکمن شول.

یادې ورځپاڼې لیکلي، چې په ۲۰۲۰ کال کې امریکايي لوړ پوړي چارواکي کابل ته له ډېر واضح پیغام سره تلل، چې له طالبانو سره جوړ جاړي وکړي او اوس هم کټ مټ همغه سناریو تکراریږي.

ورځپاڼې په یوې مقاله کې لیکلي، که څه هم د اوکراین او افغانستان وضعیتونه مختلف دي، خو د دغو دواړو مسائیلو لپاره د ټرمپ مدیریت یو ډول ښکاري.

د بریتانیا لومړي وزیر کی‌یر استارمر ویلي، چې بریتانیا او فرانسه د یو ګډ پلان پر جوړولو کار کوي، ترڅو د روسیې او اوکراین جګړې ته د پای ټکی کېږدي، او له چمتو کولو وروسته به یې امریکا ته وسپاري.

د فرانسې خبري آژانس د راپور له مخې، استارمر چې په لندن کې د زیلنسکي کوربه و، د بي‌بي‌سي ته په مرکه کې وویل: «بریتانیا، فرانسه، او ښايي یو یا دوه نور هېوادونه، د اوکراین سره یو ځای د جګړې د درولو پر طرحه کار کوو او وروسته به یې له امریکا سره شریکه کړو.»

دا په داسې حال کې ده چې تېره ورځ د ډونالډ ټرمپ او ولادیمیر زیلنسکي ترمنځ لفظي شخړه هم وشوه او له هغه وروسته زیلنسکي لندن ته لاړ.