د سپینې ماڼۍ د ملي امنیت پخواني مرستیال سلاکار سباستین ګورکا ویلي، چې امریکا به طالبانو ته اجازه ورنهکړي چې محمود شاه حبیبي بندي وساتي.
دا خبره د محمود شاه حبیبي ورور احمدشاه حبیبي د ګوریکا له قوله پر خپله ایکس پاڼه لیکلې ده.
د نوموړي په خبره، سباستین ګوریکا ویلي، چې امریکا به طالبانو ته اجازه ورنهکړي چې ورور یې محمود شاه حبیبي بندي وساتي.
د یادونې ده، چې محمود شاه حبیبي له اوږدې مودې راهیسې د طالبانو حکومت په بند کې دی.
د سپینې ماڼۍ یوه چارواکي رویترز ته ویلي، چې ښايي ډونالډ ټرمپ، راتلونکې اوونۍ له ولادیمیر پوتین سره وويني.
دا به د ۲۰۲۱ کال د جون راهیسې، چې جو بایډن له پوتین سره کتلي و، د دواړو هېوادونو د مشرانو لومړۍ مخامخ لیدنه وي.
ویل کېږي، چې دا لیدنه د اوکراین جګړې د مخنیوي لپاره ترسره کېږي.
د پاکستان پوځ وایي چې د بلوچستان په مستونګ ولسوالۍ کې د هند ملاتړ لرونکو ترهګرو لخوا د امنیتي ځواکونو پر موټر د بمي برید په پایله کې یو پولیس افسر وژل شوی او دوه نور سرتېري ټپیان دي.
د پوځ د عامه اړیکو څانګې (ISPR) په یوه اعلامیه کې ویلي، چې دا برید د اګست شپږمه د شپې مهال شوی، چې پکې د “فتنه الهندوستان” په نوم د هند یوه نیابتي ډلې د سرتېرو موټر د ماین په وسیله نښه کړی.
پاکستان تل وايي، چې په سیمه کې هندوستان پلوه ډلې جګړه کوي؛ خو هند بیا دا تورونه ردوي.
د سوریې دولت تېره ورځ د ۱۴ میلیارده ډالرو په ارزښت څو نړیوال قراردادونه لاسلیک کړل.
دا قراردادونه د بیارغونې، ترانسپورت او جایدادونو په برخو کې دي، چې د جګړو وروسته د هېواد د بیا رغولو لپاره مهم ګام ګڼل شوی.
په دغو قراردادونو کې د دمشق د هوایي ډګر د ۴ میلیارده ډالرو بیارغونې پروژه او د دغه ښار د مترو د ۲ میلیارده ډالرو پروژه شاملې دي، چې له قطري او اماراتي شرکتونو سره لاسلیک شوي.
دا قراردادونه په داسې حال کې شوي چې د سوریې مؤقت حکومت له فرقهيي شخړو سره هم لاس او ګرېوان دی.
افغان پانګه وال میرویس عزیزي چې په دې وروستیو کې افغانستان کې د لس میلیارده ډالرو د پانګونې اعلان وکړ وایي د ولسمشرۍ پخوانی لومړی مرستیال امرالله صالح خپل سیال نه بولي چې پرې تبصره وکړي.
نوموړي له بي بي سي سره په مرکه کې چې تردې مهاله نه ده خپره شوې ویلي چې عزیزي د خپلې ژمنې پوره کیدو ته ژمن دی.
هغه ښاغلي صالح په دروغ ویلو، چل ول او غبن تورن کړی وو.
پاکستاني چارواکي وايي، په خیبر پښتونخوا کې د بېلابېلو بریدونو په ترڅ کې ۵ پوځيان او ۳ ملکیان وژل شوي دي.
د پاکستان د کورنیو چارو وزیر محسن نقوي نن دا مرګژوبله تأیید کړې ده.
د پاکستاني رسنیو د معلوماتو له مخې، وسله والو کرک ولسوالۍ کې پر یو پوځي موټر برید کړی، چې درې پوځیان او چلوونکی پکې وژل شوي.
په همدې حال کې یو بل عسکر په لکي مروت کې د رخصتۍ پر مهال هدف ګرځېدلی.
د یادونې ده، چې په دې وروستیو کې په قبایلي سیمو کې تاوتریخوالی ډېر شوی دی.
د ملګرو ملتونو د خوراک نړیوال پروګرام اعلان کړی چې اندونیزیا د افغانستان د ښوونځیو د تغذیې د ملاتړ لپاره ۳.۵ میلیونه ډالره مرسته کړې ده.
له دې مالي مرسته څخه به د ابتدایي ښوونځيو د ۲۰۰ زرو نجونو او هلکانو د دریو میاشتو د خوړو اړتیاوې پوره شي.
له یادې ادارې څخه خپره شوې خبرپاڼه کې راغلي، چې د دې بودیجې په مرسته به ۱۲۰۰ ټنه بسکویټ وپېرل شي.
رینا ستیاواتي، د اندونیزیا د بهرنیو چارو وزارت د نړیوالو همکاریو مشرې رینا ستیاواتي ویلي، چې دا مرستې د افغان زدهکوونکو د روښانه راتلونکي لپاره کوي.
پاکستاني رسنیو راپور ورکړی چې حکومت د پياوار کارټ لرونکو افغان کډوالو د ایستلو موده د سپټمبر لومړۍ نېټې پورې غځولې ده.
چارواکي وايي، دا اقدام د افغان کډوالو په خپله خوښه خپل هېواد ته د ستنېدو لپاره شوی دی.
له دې وړاندې وروستۍ نیټه د جولای تر پای وه؛ خو دا پرېکړه وروسته له هغه وشوه چې ملګرو ملتونو د افغان کډوالو د ایستلو پر سیاست اندېښنه وښوده.
راپورونه زیاتوي، د سپټمبر له لومړۍ وروسته به د دغو افغانانو د ایستلو لړۍ رسماً پیل شي او ایالتي حکومتونه د عملي پلان جوړولو مأمور شوي دي.
د هندي رسنیو د راپورونو له مخې، د هند د ملي امنیت سلاکار اجیت دووال نن روسیې ته روان شوی.
ټاکل شوې چې په دې سفر کې دواړه هېوادونه د دوه اړخیزو موضوعاتو ترڅنګ د افغانستان پر وضعیت هم خبرې کوي.
راپورونه زیاتوي چې د هند او روسیې ترمنځ د دفاعي او امنیتي همکاریو پراخېدل، د روسیې پر نفتو لګیدلي بندیزونه او د نریندرا مودي او ولادیمیر پوتین راتلونکی لید هم د بحث له مهمو موضوعاتو دي.
دا سفر داسې مهال ترسره کېږي، چې د روسیې له خوا د تېلو پیرودلو په غبرګون کې امریکا پر هندي توکو ۲۵ سلنه تعرفه لوړه کړې ده.
د خېبر پښتونخوا د کرک ولسوالۍ په امان کوټ سيمه کې وسله والو د پاکستان د نيمه پوځي ځواکونو (ايف سي) پر موټر بريد کړی، چې له امله یې څلور پاکستاني عسکر وژل شوي دي.
تر اوسه پورې هېڅ وسله والې ډلې د دې بريد مسووليت نه دی منلی.
بل لورته حکومتي چارواکو هم په دې اړه څه نه دي ويلي.