ټيټيپي په یوه تازه اعلامیه کې د اسراییلو له خوا پر ایران شوي بریدونه غندلي او د ایران له خوا یې پر اسراییلو د ځوابي اقداماتو کلک ملاتړ اعلان کړی دی.
په اعلامیه کې ویل شوي، چې تحریک طالبان پاکستان دغه ظالمانه کړنه د نړیوالو بشري حقونو ښکاره سرغړونه بولي.
اعلامیه زیاتوي، ایران ثابته کړه چې د قومونو عزت یوازې په مقاومت کې دی.
د اسرائیل دفاع وزیر یسرائیل کاتز اعلان وکړ چې د ایران د سپاه پاسداران قوماندان، سعید ایزدي، تېره شپه په قم ښار کې په یوه استوګنیز کمپلکس کې وژل شوی دی.
ایزدي د قدس ځواک د “فلسطین لښکر” مشر و او د حماس د مالي او وسلو ملاتړ مسئول و.
د برید له امله دوه تنه وژل شوي، چې په دې کې یو ۱۶ کلن ځوان هم شامل دی او څلور نور ټپیان دي.
دغه برید د قم د مقدس ښار په یوه څلورم پوړ ودانۍ شوی دی، چې د فردو د یورانیم د غني کولو مرکز ته نږدې موقعیت لري.
د طالبانو حکومت ویاند ذبیح الله مجاهد، د ملګرو ملتونو د درې میاشتني راپور په اړه ویلي چې راپور کې ناسم معلومات خپاره شوي او هڅه شوې چې د افغانستان وضعیت ناوړه وښودل شي.
هغه زیاته کړې چې افغانستان اوس تر هر وخت ډېر امن دی او خلک په ارامه ژوند کوي.
مجاهد دغه راز ویلي چې په راپور کې جنايي پېښې هم د امنیتي پېښو په توګه یادې شوي، حال دا چې دغه ډول پېښې په نورو هېوادونو کې هم ډېرې دي.
نوموړي خپلو خلکو ته ډاډ ورکړی چې د بهرنیو مغرضو هڅو ته اندېښمن نشي، ځکه افغانستان د شرعي نظام تر سیوري لاندې په ثبات او امن کې دی.
هغه زیاتوي، چې د تیر لوی اختر په شپو کې شاوخوا دوه میلیونه افغانانو په هېواد کې دننه سیاحتي سفرونه ترسره کړي چې د امنیت ښه والی ښيي.
تېره شپه د باجوړ لوی ماموند تحصیل ګواټي سیمه کې د ټيټيپي وسلهوالو پر یوې پوځي پوستې برید کړی، چې په ترڅ کې یې ۴ پاکستاني سرتېري وژل شوي او ۷ نور ټپیان شوي دي.
ځایي سرچینې وایي، چې په دغه برید کې سپکې او درنې وسلې کارول شوې دي.
تر اوسه د پاکستان حکومت په دې اړه څه نه دي ویلي.
د بلوچستان ایالت د کلات ولسوالۍ په منګوچیر سیمه کې د سړک د پاکولو پر مهال د ماینونو څلور پرلهپسې چاودنو دوه پاکستاني سرتېري وژلي او څلور نور یې ټپیان کړي دي.
د سرچینو په وینا، وژل شوي او ټپیان شوي سرتېري د ماین خنثی کولو ډلې غړي وو.
سرچینو زیاته کړې چې دغه ماینونه یو له بله سره نښلول شوي وه.
د ملګرو ملتونو امنیت شورا د دوشنبې په ورځ، د جون ۲۳مه، د افغانستان په اړه غونډه کوي.
په دې غونډه کې به د ملګرو ملتونو ځانګړې استازې رزا اوتونبایوا، د بشري چارو مرستیاله جویس موسویا او د ښځو برخې مشره سیما باهوس خبرې وکړي.
ویل کېږي، چې تر علني ناستې وروسته به د بندو دروازو تر شا هم یوه ناسته وشي.
د ایران د بهرنیو چارو وزیر، عباس عراقچي د اسلامي همکاریو سازمان د بهرنیو وزیرانو غونډې کې د ګډون لپاره استانبول ته رسېدلی دی.
نوموړي ویلي، د ایران په وړاندې د اسراییلو بریدونه به په دې غونډه کې ځانګړی بحث وي.
هغه زیاته کړې چې له یو شمېر هېوادونو د بهرنیو وزیرانو سره به لیدنې ولري او له ترکي ولسمشر رجب طیب اردوغان سره هم ځانګړې ناسته لري.
بلخوا، د امریکا ولسمشر ډونالډ ترمپ خبرداری ورکړی چې ایران یوازې دوه اونۍ وخت لري څو د امریکا احتمالي هوايي برید مخه ونیسي او ښايي تر هغې وړاندې پرېکړه وکړي.
د متحدې جبهې مشر جنرال سميع سادات وایي، د افغانستان متحده جبهه یوازې د هېواد د آزادۍ لپاره مبارزه کوي او نه غواړي د بل هېڅ هېواد په جګړه کې ښکېله شي.
نوموړي د ایران په جګړه د هغه او نورو افغان جنرالانو په اړه د کابل پوډکاسټ وروستی راپور «غلط، مغرضانه او ناځوانمردانه» بللی دی.
یوې امریکايي ایکس پاڼې د جورجیا سن شاین له قوله لیکلي و، چې درې افغان جنرالان خوشحال سادات، جنرال سمیع سادات او جنرال هیبت الله علیزي د امریکا له سنټرل کمانډ سره د ایران په وړاندې د احتمالي برید په صورت کې د همکارۍ غوښتنه کړې.
د طالبانو حکومت هیله لري چې روسي ستر شرکتونه په افغانستان کې پانګونه وکړي.
د طالبانو حکومت د سوداګرۍ خونې مرستیال محمد یونس مهمند، چې سنپترزبورګ ته تللی، ویلي، اوس هم روسي شرکتونه په افغانستان کې فعال دي.
دغه پلاوی د کرنې وزیر عطاءالله عمري په مشرۍ د ۲۰۲۵ اقتصادي کنفرانس لپاره روسیې ته تللی.
یاد کنفرانس د جوزا له ۲۸ تر ۳۱مې دوام لري او پر کرنه، صنعت، پانګونه او چاپېریال تمرکز کوي.
له هغه وروسته چې روسیې د طالبانو حکومت له ترهګرو ډلو وایستل، اړیکې یې ورسره پراخې شوي دي.
د اسراییلو لهخوا د ایران پر مواضعو د دوامداره بریدونو له امله، په تهران کې د هند سفارت اعلان کړی چې خپل ټول وګړي له ایرانه باسي.
د هند د چارواکو په وینا، شاوخوا لس زره او اوه سوه، هندي اتباع په ایران کې دي.
دغه راز، سفارت ویلي چې د نیپال او سریلانکا د غوښتنې له مخې، د دغو هېوادونو د اتباعو په تخلیه کې هم مرسته کوي.