د اسرائیل د لومړي وزیر مېرمن، سارا نتانیاهو، د دوشنبې په ورځ د ایران ولس ته په یو پیغام کې لیکلي، چې تاسو د یوه بډایه فرهنګ، وړتیا او ویاړمن تاریخ وارثان یاست.
هغې زیاته کړې:« موږ ستاسو دښمنان نه یوو، زموږ مبارزه د استبدادي رژیم پر وړاندې ده، نه له ولس سره او موږ د سولې، آزادۍ او دوستۍ راتلونکي ته هیلهمن یو.»
دا په داسې حال کې ده، چې ایران وايي، اسرائیل په سیمه کې د بې ثباتۍ عمده لامل دی او باید له منځه یوړل شي.
د روسیې ولسمشر ولادیمیر پوتین وايي، مسکو هڅه کوي د ایران له ولس سره مرستې وکړي.
نوموړي دا څرګندونې د ایران د بهرنیو چارو وزیر عباس عراقچي سره د لیدنې پر مهال وکړې.
پوتین د امریکا هوایي بریدونه پر ایران «یو بېدلیله تېری» وباله او د مسکو او تهران اړیکې یې «پراخې، ژورې او د باور وړ» وبللې.
عباس عراقچي د روسیې له دې دریځ څخه هرکلی وکړ او ویې ویل: «روسیه نن د تاریخ او نړیوال قانون په سم لوري ولاړه ده.»
هغه ټینګار وکړ چې د ایران دولت له خپل حاکمیت او خاورې مشروع دفاع کوي.
د ایران د بهرنیو چارو وزیر سید عباس عراقچي ویلي، چې پر ایران امریکا او اسراییل د خپلو وروستیو بریدونو له لارې نړیوال قوانین تر پښو لاندې کړي دي.
نوموړي دا څرګندونې په مسکو کې د روسیې له ولسمشر ولادمیر پوتین سره د لیدنې پر مهال وکړې.
عراقچي د روسیې له خوا د بریدونو غندنه وستایله او ویې ویل چې مسکو د تاریخ او نړیوال قانون «سم» لوری نیولی دی.
د روسیې ولسمشر ولادیمیر پوتین کرملین ماڼۍ کې د ایران د بهرنیو وزیر عباس عراقچي سره په کتنه کې ددې هیواد هر ډول ملاتړ ته ټټر وهلی دی.
ایراني رسنۍ د ولسمشر پوتین له قوله لیکلي چې کرملین د ایران ملاتړ د خپلو لومړیتوبونو څخه بللی دی.
د ایران د بهرنیو چارو وزیر سید عباس عراقچي، چې روسیې ته رسېدلی، ویلي چې تهران او مسکو تل د ګډو ستونزو پر وړاندې نږدې سلا مشورې درلودې.
نوموړي ویلي، په اوسنیو حساسو نړیوالو شرایطو کې د ایران او روسیې سلا مشورې ارزښت لري او هڅه کوي خپل دریځونه همغږي کړي.
هغه زیاته کړې چې ایران او روسیې تل ګډې اندېښنې او ګډ دښمنان درلودل.
د طالبانو حکومت د بهرنیو چارو سرپرست وزیر، امیرخان متقي د اسلامي همکاریو سازمان د ۵۱مې ناستې په څنډه کې د ترکیې له بهرنیو چارو وزیر هاکان فیدان سره لیدلي دي.
دواړو لورو د دوه اړخیزو اړیکو پراختیا او سیمهییزو مسایلو خبرې کړې دي.
متقي ویلي، ترکیه د طالبانو د حکومت په بهرني سیاست کې ځانګړی ځای لري.
د اسراییل پوځ ویلي، چې دوی د دوشنبې سهار په بریدونو کې د ایران په لوېدیځ، مرکز او ختیځ سیمو کې شپږ هوایي ډګرونه بمبار کړي دي.
د دغه پوځ په یوه خپره شوې خبرپاڼه کې ویل شوي چې په دغو بریدونو کې ۱۵ الوتکې، د الوتنو باندونه، ځمکني هنګرونه، د سونتوکو الوتکه او د F-5، F-14 او AH-1 ډوله الوتکې زیانمنې شوې دي.
تر اوسه د ایران چارواکو د دغې ادعا په تړاو رسمي غبرګون نه دی ښودلی.
د اسراییلو پوځ اعلان کړی چې د ایران لوېدیځ او د پلازمېنې تهران په مرکزي سیمو کې یې نوي پوځي بریدونه بشپړ کړي دي.
په دې بریدونو کې د ایران د ځمکنيو-هوا توغندیو پر توغوونکو هم برید شوی دی.
د اسرائیل پوځ لیکلي، چې شاوخوا ۲۰ جنګي الوتکو د استخباراتي معلوماتو پر بنسټ، د ایران پر نظامي هدفونو بریدونه کړي، چې له ۳۰ زیات ډول ډول وسلې پکې کارول شوې دي.
اسراییلي پوځ زیاته کړې چې دوی به د ایران د نظامي وړتیاوو کمزوري کولو ته دوام ورکړي او هڅه به وکړي چې د اسراییلو د امنیت د خوندي کولو لپاره هوايي برلاسی ترلاسه کړي.
د شمالي کوریا د بهرنیو چارو وزارت د امریکا لخوا پر ایران د ترسره شویو هوایي بریدونو کلکه غندنه کړې او دا یې د ملګرو ملتونو د منشور ښکاره نقض بللی دی.
دغه وزارت ویلي، چې د هېوادونو د ارضي تمامیت او ملي حاکمیت پر وړاندې د زور کارول او د هغې اړوند ګواښونه د ملګرو ملتونو له منشور سره په ټکر کې دي.
دغه وزارت دغه راز ویلي چې شمالي کوریا باور لري چې اسراییل او متحده ایالاتو د سولې د ساتنې او ګواښونو د له منځه وړلو تر نامه لاندې، له فزیکي قوې کار اخیستی او د منځني ختیځ وضعیت یې لا پسې ترینګلی کړی دی.
د امریکا لخوا د ایران پر درېو هستوي مرکزونو نطنز، فردو او اصفهان د یکشنبې په ورځ د بریدونو وروسته، د امریکا د بهرنیو چارو وزارت نړیوال امنیتي خبرداری خپور کړی دی.
په دغه خبرداري کې ویل شوي چې د امریکا پر وګړو او ګټو د مظاهرو امکان شته.
خبرداري کې مریکايي وګړو ته سپارښتنه شوې، چې په ټوله نړۍ کې له ډېر احتیاط څخه کار واخلي.