د ایران پارلمان د ملي امنیت کمیسیون مرستیال محمد نبویان وایي، “د ایران د اسلامي جمهوریت امپراتوري راڅرګندېږي،”
نوموړي زیاته کړه: “تر اوسه پورې، موږ سیمه ایز ځواک وو، خو اوس د ایران ملت یو نړیوال ځواک شوی دی.”
هغه زیاته کړه: “د دښمن کار داسې یوې نقطې ته رسیدلی چې له موږ څخه یې د اوربند او جګړې د بندولو غوښتنه کړې ده.”
ایراني رسنۍ وایي، موساد ته د جاسوسۍ په تور یې درې تنه په ارومیه کې اعدام کړي دي.
د میزان خبري اژانس، چې د ایران د قضایه قوې یوه برخه ده، د ارومیه په ښار کې د دریو کسانو د اعدام خبر ورکړی چې د اسراییلو د استخباراتي ادارې، موساد سره یې همکاري کړې وه.
د بشري حقونو سرچینو ویلي چې د دې کسانو اعدام د ایران د اټومي پروګرام یو له مهمو شخصیتونو څخه د محسن فخر زاده د وژنې سره تړاو درلود.
د فارس خبري اژانس، چې د انقلابي ګارډ سره نږدې دی، د چهارشنبې په سهار بیا راپور ورکړ چې په تیرو ۱۲ ورځو کې شاوخوا ۷۰۰ کسان د “اسرائیل سره د جاسوسۍ او همکارۍ” په تور نیول شوي دي.
رویټرز خبري آژانس د خپلو سرچینو له قوله لیکلي، چې د ولسمشر ډونالډ ټرمپ هغه ادعا ناسمه ده چې ګواکې د ایران اټومي برنامه په وروستي برید کې بشپړه له منځه تللې.
سرچینې وایي، د ایران غنيشوي یورانیم لا هم خوندي دی او اټومي برنامه یې چې زیاتره یې د ځمکې لاندې ده، یوازې د څو میاشتو لپاره ځنډېدلې.
تر دې وړاندې ټرمپ ویلي وو، چې دا تاسیسات یې په بشپړ ډول له منځه وړي.
لیکوال: عاطف مشعل
اسلام اباد کې د افغانستان پخوانی سفیر
د ایران لخوا په قطر کې پر امریکایي هډې له برید وروسته، ټرمپ د جنګ د دریدو او نه ځواب ویلو دریځ غوره کړ او په تعقیب یې د ایران او اسرایلو ترمنځ د اوربند اعلان هم وکړ. دا د ټرمپ له پخواني موقف څخه، چې ایران باید بدون له قید او شرطه تسلیم شي، د کامل په شاتګ ښودنه کوي. ټرمپ له سختو انتخابونو سره مخ وو. له یوې خوا د امریکا په خارجي سیاست د اسرایلو نفوذ؛ او له بلې خوا دده د( امریکا د حیثیت اعاده) شعار چې په اساس یې انتخابات وګټل. ټرمپ پوهیده چې داجګړه د امریکا د ګټو سره په تضاد کې ده او نه تنها چې ګټل یې محال دي بلکه د امریکا د زوال پیل کیدی شي.
ایران سره له دې چې د پام وړ زیان ولید، خو له دې تپل شوي جنګ څخه بریالی راووت. د اسرایلو لخوا درې ټاکل شوي اهداف: د ایران اتومي توان له منځه وړل، د بالستیک توغندیو زیرمې ویجاړول، او د رژیم تغیر؛ یو هم پوره نشول. نه د ایران اتومي توانایي په بشپړ ډول له مینځه یووړل شوه، نه د بالستیک توغندیو زیرمې ویجاړې شوې او نه هم رژیم وپرځول شو. سربیره پردې، ایران د اسرایلو په اصطلاح د اوسپنې په ګنبد پوښل شوي ښارونه په بیساري ډول په نښه او اکثر خاص نظامي اهداف یې ویجاړ کړل او ټولې سیمې ته یې خپل نظامي ځواک وښود.
داچې ایران په خپلو اتومي تاسیساتو د امریکا یرغل په پوره قدرت سره ځواب کړ، په دې معنی وو چې دوی تسلیمیدو ته غاړه نږدي. امریکا مجبوره شوه او د جنګ د دریدو اعلان یې وکړ. د اوربند غږ له امریکا او اسرایلو اوچت شو، دا ایران ته د واضح بري په معنی دی.
ایران شاید زیانمن او زخمي وي، خو د جنګ له میدانه بریالی راووت.
و به کتل شي چې اسرایل به څومره دې تعهد ته پابند پاتې کیږي؟ ځکه دا اوربند به د نتنیاهو د قدرت په قیمت تمام شي.
یادونه: حماسه میډیا د یوې بې پرې رسنۍ په توګه د ټولو سیاستوالو ، لیکوالو او نظر خاوندانو لیکنو او نظریاتو ته درناوی لري، دا لیکنه د حماسه میډیا نظر نه څرګندوي بلکې د لیکوال نظر دی او مونږ یې کټ مټ دلته خپروو.
د امریکا ولسمشر ډونالډ ټرمپ په تروث سوشال کې لیکلي، چې چین اوس کولی شي له ایران څخه د تېلو پېر ته ادامه ورکړي.
هغه زیاته کړې، هیله لري چې هغوی له امریکا څخه هم ډېر تېل وپېري.
نوموړي دا کار د ځان لپاره ویاړ بللی.
د نتانیاهو دفتر وایي، د ولسمشر ټرمپ له ټیلفوني تماس وروسته یې په ایران بریدونو کې کموالی راوستی.
تردې وړاندې د امریکا ولسمشر د اسرائیلو د لومړي وزیر سره په ټیلفوني تماس کې د بریدونو د سملاسي دریدو غوښتنه کړې وه.
د امریکا ولسمشر ډونالډ ټرمپ وایي ایران کې د رژیم د تغیر مخالف دی.
ښاغلي ټرمپ ویلي د رژیم تغیر وضعیت خرابوي او هرج و مرج ایجادوي.
د امریکا ولسمشر ډونالډ ټرمپ وايي اسرائیل او ایران د هغه اوربند سرغړونه وکړه چې نوموړي اعلان کړی.
ولسمشر ټرمپ ویلي د دواړو خوښ نه دی، په ځانګړي ډول له اسراییلو څخه ناراضه دی.
ډونالډ ټرمپ په هاګ کې د ناټو سرمشریزې ته له تګ وړاندې خبریالانو سره په خبرو کې، وویل چې اسراییل د تړون وروسته سم دلاسه برید وکړ.
د رویټرز په وینا، ټرمپ دا هم وویل چې د ایران اټومي وړتیاوې له منځه تللي دي.
د امریکايي رسنیو د راپور له مخې د امریکا ولسمشر ډونالډ ټرمپ د اسراییلو لومړي وزیر بنیامین نتنیاهو سره په تلیفوني تماس کې له هغه غوښتي چې ژر تر ژره دې پر ایران بریدونه ودروي.
د ایران ولسمشر مسعود پزشکیان په قطر کې د امریکا په اډو د برید وروسته د خپل سیال سره تیلفوني خبرې کړي.
پزشکیان د قطر امیر ته ویلي هېله لري چې داسې ونه انګیرل شي چې ګوندې دوي په خپل مسلمان ورور هیواد حمله کړې.
ایراني ولسمشر د قطر امیر ته د دې بریدونو له امله ډاډګیرنه ورکړې.