د طالبانو حکومت وياند ذبيحالله مجاهد بيبيسي ته په مرکه کې ويلي چې د نجونو زده کړې د شريعت له مخې بندې شوې دي او د بيا پيل لپاره يې شرعي حللارې ته اړتیا ده.
نوموړي ویلي، دا يوه شرعي مسئله ده او بايد شرعي حللاره ورته پيدا شي.
د طالبانو حکومت تر دې وړاندې ويلي و چې د دې موضوع لپاره يوه کمېټه جوړه شوې؛ خو تر څلور کلونو وروسته هم لا کوم عملي اقدام نه دی شوی.
د امریکا ولسمشر ډونالډ ټرمپ د اسراییلو له لومړي وزیر بنیامین نتانیاهو سره د روانې قضیې په تړاو د هغه د محاکمې د لغوه یا عفوې غوښتنه کړې ده.
ټرمپ د “تروث سوشیال” په نوم خپله ټولنیزه شبکه کې لیکلي چې د نتانیاهو محاکمه باید سمدستي لغوه او یا دې ورته عفو ورکړل شي.
هغه نتانیاهو “یو ستر قهرمان” بللی.
نتانیاهو له ۲۰۱۹ راهیسې د بډو، درغلیو او د عامه باور د ناوړه استفادې په تور تر قضايي تعقیب لاندې دی، خو نوموړی دا تورونه ردوي.
د هغه محاکمه له ۲۰۲۱ راهیسې روانه ده، او راپورونه وایي چې د قضیې نوې څېړنې د جون په درېیمه پیل شوې او ښايي تر یو کال پورې دوام وکړي.
د طالبانو حکومت ویاند ذبیح الله مجاهد له بي بي سي سره په تازه مرکه کې ویلي چې د دوي د حکومت د بهرنیو چارو سیاسي مرستیال شیرمحمد عباس ستانکزی له تیرو پنځو میاشتو راهیسې په رخصتۍ کې دی او لا هیواد ته نه دی ستون شوی.
ذبیح الله مجاهد د شیر محمد عباس ستانکزي د دندې په اړه وویل چې هغه د بهرنیو چارو سیاسي مرستیال دی خو په رخصتۍ تللی او تر اوسه نه دی راغلی.
ښاغلي مجاهد زیاته کړه د نجونو د زده کړې په اړه خبرو کې وویل چې لا هم هڅه کوي چې دې مسلې ته شرعي حل لاره وباسي.
د طالبانو حکومت ویاند ذبیح الله مجاهد وویل چې د نجونو د زده کړې مسله حساسه ده او باید اساسي کار ورته وشي.
د ایران د بهرنیو چارو وزارت ویاند، اسماعیل بقایي، د ناټو د سرمنشي “مارک روته” څرګندونې په کلکه رد کړې چې د ایران په هستوي تاسیساتو برید یې حیاتي اقدام بللی وو.
بقایي وویل دا دریځ “شرموونکی، کرکجن او غیرمسؤلانه” دی.
بقايي وویل: “څوک چې له ظلم او بېعدالتۍ ملاتړ کوي، د اخلاقو او شرافت نه خالي دی، او که څوک له جنایت سره ولاړ وي، د جرم شریک ګڼل کېږي.”
یاده دې وي چې د ناټو سرمنشي مارک روته، د امریکا لخوا د ایران د اټومې تاسیساتو له منځه وړل یو حیاتي ګام ګڼلی و.
د پاکستان لومړي وزیر شهباز شریف د ایران له ولسمشر مسعود پزشکیان سره تلیفوني خبرې کړي دي.
دواړو لوریو د سیمې په سولې او دایمي ثبات خبرې کړي.
شهباز شریف د ایران له لورې د اسرائیلو سره د اوربند د ترسره کیدو هرکلی کړی او هېله یې ښودلې چې دا اوربند دوامداره اوسي.
دغه راز پاکستاني لومړي وزیر په نړیوالو فورمونو کې د ایران څخه د کلک ملاتړ ټټر وهلی دی.
د ایران د بهرنیو چارو وزارت مرستیال، سعید خطیبزاده، د امریکا او اسرائیل وروستي نظامي بریدونه د نړیوالو اصولو ښکاره سرغړونه بللې ده.
نوموړي خبرداری ورکړی چې تهران به د دې برید قانوني تعقیب وکړي او د ملګرو ملتونو له لارې به له واشنګټنه د تاوان غوښتنه وکړي.
خطیبزاده، چې له شبکه المیادین سره یې خبرې کولې، وویل چې د دغو بریدونو موخه د ایران د ثبات ګډوډول و.
نوموړي وویل: «اسرائیل د دې حملو په پایله کې سخته ضربه خوړلې او دا یوه تاریخي څپیړه وه.»
هغه ټینګار وکړ چې ایران به تر هغه امریکا سره خبرو ته چمتو نه شي، څو چې تجاوزونه نه وي بند شوي او مسوولیت نه وي منل شوی.
خطیبزاده زیاته کړه چې اوربند کوم رسمي سند نه لري، او ایران به د هر احتمالي یرغل پر وړاندې چمتو، هوښیار او پر غبرګون ټینګ پاتې شي.
د ناټو سرمنشي مارک روته په لاهه کې د امریکا لخوا د ایران په اټومي تاسیساتو له برید څخه دفاع وکړه او دا یې د نړیوال امنیت لپاره حیاتي ګام وباله.
د ناټو سرمنشي وویل، دغه برید د یو احتمالي ستر ګواښ مخه ونیوله.
روته ټینګار وکړ چې د امریکا پوځي عملیاتو د ایران اټومي ظرفیت له منځه یووړ او دا یو ستر ستراتیژیک بریالیتوب ګڼل کېږي.
د افغانستان د هوایي چلند د پخواني ادارې مشر محمود شاه حبیبي ورور احمد شاه حبیبي د امریکا لخوا د هغه د پیدا کیدو یا د معلوماتو ورکولو په سر د پنځه میلیونه ډالرو انعام ورکولو په غبرګون کې ویلي چې نوموړی په کندهار کې د طالبانو په زندان کې دی.
حبیبي زیاته کړې چې هغه د خپل ورور د برخلیک په اړه د امربالمعروف وزارت د مرستیال وزیر په ګډون د طالبانو له چارواکو سره خبرې کړې دي او د مرستې غوښتنه یې کړې ده، خو د وزارت مرستیال ورته ویلي چې د حبیبي خلاصون د هغه له توان څخه پورته دی.
امریکا متحده ایالات د خپل تبعه او د افغانستان د ملکي هوايي چلند د پخواني مشر محمود شاه حبیبي په اړه د معلوماتو لپاره پنځه میلیونه ډالر انعام اعلان کړی.
د افغانستان د میرمنو فورم (WFA) په متحده عربي اماراتو کې په افغانستان کې د طالبانو د واکمنۍ پرمهال د ښځو د وضعیت په اړه د دې هیواد د بهرنیو چارو وزارت سره خبرې کړي.
د میرمنو فورم د افغانستان اړوند له سیمه ییزو هیوادونو وغوښتل چې د ښځو د حقونو د ملاتړ لپاره له ډیپلوماتیک نفوذ څخه کار واخلي او د زده کړې، روغتیا او د ښځو د کارموندنې لپاره یې عملي ګامونه د حل لارې په توګه وړاندې کړل.
د اټومي انرژۍ نړيوالې ادارې مشر، رافایل گروسي ويلي، چې د امريکايي هوايي بريدونو وروسته، د ایران شاوخوا ۴۰۰ کيلوګرامه غنيشوي يورانيم لادرکه دي.
هغه فاکس نیوز ته ويلي، ايران ادعا کړې چې دغه مواد يې د خونديتوب لپاره انتقال کړي؛ خو آژانس یې د ځای په اړه معلومات نه لري.
ګروسي زياته کړه چې د نطنز تاسيسات سخت زيانمن شوي او اصفهان ته هم تاوان رسېدلی؛ خو تر اوسه د مستقيمو څارنو اجازه نه ده ورکړل شوې.