په داسې حال کې چې د روسیې او اوکراین تر منځ د جګړې ۱۰۰۰ ورځې پوره شوې، کییف د لومړي ځل لپاره د روسیې پر ځینو برخو د امریکا له خوا جوړ شوي اوږد واټن ویشتونکي توغندي ور توغولي دي.

رویټرز خبري اژانس ویلي، چې د روسیې په براینسک سیمه کې د توغول شویو شپږو توغندیو له ډلې څخه پنځه یې له منځه تللي او شپږم توغندي چا ته ځاني او مالي زیان نه دی اړولی.

په ورته وخت کې اوکراین ویلي، چې په روسیه کې یې د وسلو یوه ډیپو د امریکا په توغندیو په نښه کړې ده.

د یادونې ده چې د امریکا ولسمشر جو بایډن تېره ورځ اوکراین ته اجازه ورکړه چې دا توغندي د روسیې په خاوره کې دننه د بریدونو لپاره وکاروي.

د طالبانو حکومت د ریاست الوزرا سیاسي مرستیال مولوي عبدالکبیر د افغانستان لپاره د ایران له ځانګړي استازي حسن کاظمي قمي او مل پلاوي سره کتنه کې ویلي، چې دوی له ټولو هېوادونو سره ښې اړیکې غواړي.

هغه یو وار بیا ټینګار کړی، چې د افغانستان خاوره د هیچا په ضد نه کارول کېږي.

مولوي عبدالکبیر د ایران له حکومت مننه کړې، چې زر افغان بندیان یې دوی ته سپارلي؛ خو د دغې پروسې د دوام غوښتنه یې هم کړې.

په همدې حال کې حسن قاضمي قمي په ایران کې د افغان بندیانو د وضعیت په اړه معلومات وړاندې کړي او ویلي یې دي، چې ایران له افغانستان سره په سیاسي، اقتصادي او نورو برخو کې د اړیکو د پراختیا غوښتونکی دی.

د پاکستان ملي ډیموکراتیک غورځنګ مشر محسن داوړ وايي، پښتونخوا طالبانو ته سپارل شوې.

هغه په بنو کې پر قومي مشر وروستي برید ته په غبرګون کې لیکلي، چې هدفي بریدونه او د خلکو وژنې دوام لري.

د داوړ په خبره، د وینو تویولو هیڅ پای نشته.

د یادونې ده، چې د بنو په جاني خېلو سیمه کې پر ملک شودي خېل ډزې شوې چې په پایله کې یې هغه او درې نور کسان وژل شوي او دغه راز بیا د جنوبي وزیرستان په اعظم ورسک سیمه کې هم د محمد نور په نوم قومي مشر وژل شوی دی.

تر اوسه د دغو بریدونو مسوولیت چا نه دی منلی.

د انصارالله په نوم وسله والې ډلې د تاجکستان حکومت ته د یوه ویډیویي پیغام له لارې د بریدونو ګواښ کړی.

د انصارالله وسله والې ډلې د تاجکستان حکومت ته په دغه ویډیویي پیغام کې ویلي، چې په دې وروستیو کې د «حجاب» په ګډون پر یو شمېر «شرعي مسلو بندیز به درته ګران تمام شي.

د تاجکستان حکومت تر اوسه په دې اړه څه نه دي ویلي.

دا په داسې حال کې ده چې تېره ورځ د تاجکستان او افغانستان پر پوله وسله والو پر چینایي کارګرو برید کړی و، چې یو چینایي وګړی یې وژلی و.

د افغانستان د تیاتر او راډیو تکړه ممثل او د افغانستان د تعلیمي موسسې د پښتو او دري ژبو د یوې ماڼۍ او زرو دريڅو د خپرونې لالو ماما (عبدالله صاحبزاده) د ورپېښې ناروغۍ له کبله ومړ.

د افغانستان تعلیمي موسسې په یوه خبرپاڼه کې ویلي، چې «عبدالله صاحب‌زاده» د سرطان ناروغي له امله د امریکا په یو روغتون کې ومړ.

یادې موسسې د نوموړي مړینه یوه ستره او نه جبران کېدونکې ضایعه بللې.

د یادونې ده، چې «عبدالله صاحب‌زاده» له کلونو راهیسې د بي‌بي‌سی راډیو د تعليمي خپرونو لالو ماما او نورو ګڼو تمثیلي او تعلیمې پارچو کې د افغانستان د ملي راډیو تلویزیون سره کار کړی دی.

د طالبانو حکومت د ټیټې طبقې سرتېري له خپلو مشرانو سخت خفه شوي او وايي، چې مشران له دوی داسې هیله لري، چې د هغوی پر هرڅه سترګې پټې کړي.

په یو غږیز کلیپ کې، چې ټولنیزو رسنیو کې خپور شوی، یو طالب له ډېرې غوسې څخه په ژړغوني غږ وايي، چې مشران په زرو موټرو کې خپل خپلوان ګرځوي او د هغو کونډو او یتیمو حال نه اخلي چې د دوی له‎پاره یې قرباني ورکړې.

نوموړی وايي، د طالبانو د بې غورۍ له کبله ټرمپ یو وار بیا دومره جرئت وکړ؛ چې د باګرام د نیولو خبره په پوره زور کوي.

د هغه په خبره، د ټرمپ دا جرئت د طالبانو شهوت پرستۍ، غلا او بېغیرتۍ له کبله پیدا شوی.

دی زیاتوي، کشران طالبان نورو هېوادونو ته د جهاد لپاره ځي؛ خو د دوی د بې‌غیرتي له کبله اوس ټرمپ د دې جرئت پیدا کړی، چې د باګرام د نیولو خبره کوي.

د سولې د نوبل جایزې ګټونکې ملاله یوسفزۍ وایي، چې طالبان د اسلام دین او افغاني کلتور ته ژمنتیا نه لري.

ملالې یوسفزۍ له یو تلویزیوني چینل سره په مرکه کې ویلي، چې اسلام هېڅکله د ښځو زده کړه او کار نه دی منع کړی.

نوموړې په دې مرکه کې زیاته کړې چې له افغان مېرمنو سره د نړیوالې ټولنې ملاتړ کمرنګه دی او دا کار به یواځې د افغانستان په زیان نه بلکې د ټولې نړۍ په زیان تمام شي.

په ملګرو ملتونو کې د روسیې دایمي استازي واسیلي نبنزیا ویلي، چې د امریکا له لوري کیف ته ورکړل شوې وسله اوکراین د جګړې په ډګر کې له ماتې نه شي ژغورلی.

نبنزیا ویلي، چې دغه وسلې هېڅ نه شي کولای او امریکا په دې کار سره د اوکراین جګړه په لوی لاس اوږدوي.

په ورته وخت کې کرملین هم ویلي، چې جو بایډن د اوکراین جګړه پراخوي او دوی به ژر د امریکا د وروستیو اقداماتو پر وړاندې غبرګون وښیي.

دا په داسې حال کې ده، چې د امریکا ولسمشر جو بایډن تېره ورځ وویل، چې اوکراین په روسیه کې د دوی له خوا د ورکړل شویو لرې واټن ویشتونکو توغنديو د کارولو اجازه لري.

پاکستاني چارواکو د افغانستان لپاره د چین له ځانګړي استازي یو شیایونګ سره په لیدنه کې داسې شواهد شریک کړي، چې ګواکې ټي ټي پي د افغانستان خاوره کاروي او له دې کبله د سیمې سولې ته هم ګواښونه متوجه دي.

اکسپریس ټریبون لیکلي، چې دا اسناد ورسره د پاکستان د بهرنیو چارو وزارت شریک کړي دي.

تر دې وړاندې د چین ځانګړي استازي ویلي وو چې په افغانستان کې نږدې شل ترهګرې ډلې فعالې دي.

د طالبانو حکومت تر اوسه په دې اړه څه نه دي ویلي؛ خو وړاندې تر دې یې هر کله د پاکستان دا ډول تورونه په کلکه رد کړي دي.

امریکا ترکیې ته خبرداردی ورکړی، چې د حماس مشرانو کوربه توب ونه کړي.

رویټرز راپور ورکړی، چې امریکا دا خبرادری د دوشنبې په ورځ دغه هېواد ته ورکړی دی.

بل لورته یو ترکیي ډیپلومات هغه راپورونه رد کړي، چې ګواکې دوی په خپل کور کې د حماس سیاسي دفتر ته ځای ورکړی دی.

په ورته مهال د امریکا د بهرنیو چارو وزارت ویاند میتو میلر ویلي، چې د حماس ځینې مشران د دوی تر څار لاندې دي.