د ایلان ماسک شرکت X.A.I اعلان کړی چې د امریکا د دفاع وزارت به د دې شرکت هوښیار چتبات “ګراک” کارول پیل کړي.
دغه شرکت ویلي، چې “ګراک د دولت لپاره” لړۍ یې پیل کړې او دا لړۍ د پرمختللو مصنوعي ځیرکتیاوو ټولګه ده.
د پولیتیکو د راپور له مخې، دا تړون د ایلان ماسک د هوش مصنوعي پروژې لپاره یو مهم ګام دی.
ماسک دغه پروژه د اوپنایآی مستقیم سیاله بللې، چې وروستیو کې یې هم د امریکا د حکومت سره په دفاعي او ټکنالوژۍ برخو کې قراردادونه کړي دي.
د امریکا ولسمشر ډونالډ ټرمپ د مرکزي بانک پر رئیس جیروم پاول سختې نیوکې کړې او هغه یې احمق بللی.
ټرمپ په سپینه ماڼۍ کې د مذهبي مشرانو په غونډه کې وویل، پاول «احمق» دی او باید د سود کچه راټیټه کړي.
هغه ټینګار وکړ چې سود باید یو سلنې ته راټیټ شي، ځکه چې اوسنی تورم د اقتصاد لپاره جدي اندېښنه نه ده.
د ټرمپ دې نیوکو او د پاول پر ضد ګواښونو مالي بازارونه اندېښمن کړي چې ښايي ټرمپ غواړي د مرکزي بانک خپلواکۍ ته زیان ورسوي او سیاستونه یې کنټرول کړي.
پاول تر اوسه د ټرمپ څرګندونو ته غبرګون نه دی ښودلی.
د پاکستان د ملي بحران سره د مبارزې ادارې اعلان کړی چې له جون میاشتې راهیسې د سختو بارانونو له امله ۱۱۱ کسان وژل شوي، چې په کې ۵۳ ماشومان شامل دي.
دا کسان تر ډېره د برېښنا مزو سره د لګېدو او سېلابونو له امله مړه شوي دي.
تر ټولو ډېر تلفات بیا د پاکستان ګڼ نفوس ایالت پنجاب کې ثبت شوي دي.
یادې ادارې ویلي چې دا مرګژوبله له ۲۶ جون تر ۱۴ جولای پورې رامنځته شوې او خبرداری یې ورکړی چې نور سخت بارانونه د پاکستان شمالي او شمالختیځو سیمو ته په لاره دي.
د آلمان د دفاع وزیر بوریس پیستوریوس ویلي، چې برلین او واشنګټن به په نږدې ورځو یا اونیو کې دا پرېکړه وکړي چې اوکراین ته دوه د امریکا ساخت پاتریوت هوايي دفاعي سیستمونه واستوي.
پیستوریوس دا څرګندونې له خپل امریکايي سیال پیت هګست سره تر لیدنې وروسته وکړې او ویې ویل چې د توافق تخنیکي جزئیات به لا هم تر بحث لاندې وي.
دا پرېکړه په داسې حال کې مطرح شوې، چې اوکراین په دې وروستیو کې د روسیې له سختو بریدونو سره مخ دی.
آلمان وړاندیز کړی چې یاد سیستمونه وپېري او اوکراین ته یې واستوي.
د اوکراین ولسمشر ولادیمیر زېلېنسکي وايي، د دوشنبې په ورځ یې د امریکا له ولسمشر ډونالډ ټرمپ سره خبرې کړې دي او د اوکراین لپاره د نویو وسلو د اعلان له امله یې مننه کړې ده.
زېلېنسکي پر ټلګرام لیکلي، چې دا یوه مثبته او رغوونکې مکالمه وه.
نوموړي زیاته کړې، دواړه لوري پر دې سلا شوي چې خپلې اړیکې پراخې کړي او د سولې لپاره ګډو هڅو ته دوام ورکړي.
د غزې سیمې سیمهییزو روغتونونو اسوشیټېډ پرېس ته تایید کړې چې د اسراییل د وروستیو شپنیو بریدونو له امله لږ تر لږه ۳۱ فلسطینیان وژل شوي دي.
ملګري ملتونه وايي، په سیمه کې د سون توکو جدي کمښت د روغتیايي مرکزونو او نورو مهمو تأسیساتو فعالیت له سختو ستونزو سره مخ کړی دی.
دا بریدونه له هغې وروسته شوي چې د امریکا ولسمشر ډونالډ ټرمپ او د اسراییل لومړي وزیر بنیامین نتنیاهو د اوربند او برمته شویو کسانو د ازادېدو په تړاو بېپایلې خبرې کړې.
د پښتو وتلی شاعر مطیع الله تراب د زړه د حملې له امله وفات شو.
نوموړی د حماسي شعرونو له امله په خلکو کې ځانګړی شهرت درلود.
د تراب ناڅاپي مړینه د پښتو ادبیاتو لپاره لویه ضایعه بلل شوې او ګڼو فرهنګیانو او مینوالو یې پر مړینه خواشیني ښودلې ده.
د افغانایواک سازمان رییس، شان ون ډایور، ویلي چې د افغانانو لپاره د امریکا د لنډمهالي محافظتي حالت (TPS) پروګرام پای ته رسېدلی دی.
نوموړي پر خپل اېکس لیکلي، دا په دې معنا ده چې افغانان نور د کار اجازه نه لري او ښايي د امریکا د کډوالۍ ادارې لخوا له هېواده وایستل شي.
دا په داسې حال کې ده چې په دې وروستیو کې د امریکا ولسمشر ډونالډ ټرمپ د کډوالو پر وړاندې ګڼ محدودیتونه لګولي دي.
د تهران د ښوونکو صنفي اتحادیې د افغان مهاجرو د جبري ایستلو پر دوام ژوره اندېښنه ښودلې او ویلي یې دي چې دا عمل له توهین، تحقیر او تاوتریخوالي سره مل دی.
یادې اتحادیې په خپل بیان کې ویلي، زرګونه افغان ماشومان، په ځانګړي ډول نجونې، چې کلونه یې په ایران کې زدهکړې کړې وې، د ایستلو له امله له زدهکړو بېبرخې شوې دي.
اتحادیې د هغو ماشومانو ایستل، چې له سرپرست پرته دي، له نړیوالو قوانینو سرغړونه بللې او غوښتنه یې کړې چې دا عمل ژر تر ژره ودرول شي او ټولو ماشومانو ته د زدهکړې مساوي فرصت برابر شي.
په ورته وخت کې د ماشومانو د ژغورنې نړیوال سازمان ویلي، په دې وروستیو کې ۸۰ زره افغان ماشومان له ایرانه راشړل شوي، چې ۶۷۰۰ پکې بېسرپرسته دي.
د طالبانو حکومت مشر شیخ هبتالله اخوندزاده نن د کندهار له میرویس روغتون څخه لیدنه کړې.
د طالبانو حکومت ویاند ذبیح الله مجاهد په خپله ایکسپاڼه لیکلي، چې شیخ هبتالله په دې لیدنه کې مریضانو سره کتلي، ډاکترانو او مسئولینو ته یې لازمې لارښونې کړې او طبي پرسونل او د روغتون عمله یې لا ډيره تشویق کړې ده.
مجاهد زیاته کړې، چې شیخ هبت الله سره د طالبانو حکومت د عامې روغتیا وزیر نور جلال جلالي هم ملګری و.