د طالبانو د حکومت مشر ملا هبتالله اخوندزاده په یو تازه فرمان کې د بشري سرچینو ریاستونه، مدیریتونه او امریتونه د کارکوونکو د چارو ریاست، مدیریت او امریت په نومونو نومولي دي.
هغه په دې اړه یو فرمان صادر کړی او ویلي یې دي، چې تر دې وروسته به د یاد ریاست اړوند ټول اسنادونه تر همدې عنوان لاندې معامله کېږي.
تر اوسه معلومه نه ده، چې نوموړي دغه کړنه د کومې موخې لپاره کړې ده.
د خیبر پښتونخوا په کُرمه کې تېره ورځ د نښتو له کبله ۳۷ کسان وژل شوي او ۱۰۳ نور ټپیان دي.
سیمهییزو سرچینو حماسه میډیا ته ویلي، چې لاهم د وژل شویو کسانو شمېر وروستی نه دی او ښایي تلفات تر دې نور هم پورته شي.
هلته تېره ورځ د شعیه او سنیانو ترمنځ فرقهییزې نښتې پیل شوې وې.
په سیمه کې د سرچینو او معلوماتو د کمښت له کبله په دې اړه لا زیات جزیات نه دي ورکړل شوي؛ خو یو شمېر اوسېدونکي وايي، د پاکستان حکومت سنیان او شعیهګان په جنګ اچوي او دوی یې بیا ننداره کوي.
یو شمېر سرچینو خبر ورکړی، چې اسرائیل د شنبې په شپه د لبنان په مرکز بیروت بریدونه کړي.
که څه هم تر اوسه د دغو بریدونو په اړه جزیات نه دي ورکړل شوي؛ خو رویټرز ویلي چې دا بریدونه خطرناک او قوي وو.
سرچینې د ځايي خلکو له قوله ویلي، چې په بیروت څلور خطرناک بریدونه شوي دي.
تر اوسه د تلفاتو په اړه هم کوم جزیات نه دي ورکړل شوي.
د پاکستان حکومت زرګونه سوالګر له خپل هېواد څخه ممنوع الخروج اعلان کړي دي.
یاد هېواد دا پرېکړه د پاکستان د کورنیو چار وزیر محسن نقوي او د سعودي پلاوي له کتنو وروسته کړې.
سعودي تر دې وړاندې ګڼ شمېر هغه پاکستانیان نیولي، چې په سعودي کې به یې د حج د مراسمو پر مهال سوال کوو.
ریاض دوه ځله خبرداری هم ورکړی وو، چې که پاکستان د خپلو سوالګرو مخه ونه نیسي؛ نو په دغه هېواد به د حج ویزې بندې کړي.
ویل کېږي، چې په تازه اقدام کې د پاکستان حکومت درې زره او درې سوه سوالګر ممنوع الخروج کړي دي.
د بلخ چهاربولک کې د ساتل شویو چاودېدونکو توکو د چاودنو له کبله درې کورونه ویجاړ شوي دي.
سیمهییزو سرچینو ویلي، چې پېښه کې چاته ځاني زیان نه دی اوښتی.
دا پېښه د هغو ۲۲ راکټ مرمیو د چاودونو له کبله رامنځته شوې چې په پټه ساتل کېدې.
د دغو راکټ مرمیو د ساتنې پټنځای کې لومړی ګاز ډبه چاودلې، چې وروسته مرمیو هم چاودنې کړې.
د افغان ښځو لپاره د امریکا ځانګړې استازې رینا امیري وايي، سره له دې چې افغانې ښځې په بد وضعیت کې دي، خو دوی بیا هم خپلې هیلې مړې کېدو ته نه پرېدي.
امیري د ژولیا پارسي او نیلا ابراهیمي له لوري د نړیوالو جایزو د اخیستلو هرکلی کړی او زیاته کړې یې ده، چې د دوی دا کار د افغان ښځو او نجونو د عزم څرګندونه کوي.
د یادونې ده، چې ژولیا پارسي تېره اوونۍ د مارتین انالز او نیلا ابراهیمي د ماشومانو سولې نړیوالې جایزې تر لاسه کړې.
یو شمېر افغانو ښځو له ډونالډ ټرمپ غوښتي چې له طالبانو سره د سولې تړون لغوه کړي.
دوی ویلي، دغه تړون نه یوازې دا چې د افغانستان لپاره سوله او ثبات رانه وست؛ بلکې په کور دننه او نړیواله کچه یې هم بحراني پایلې ولرلې.
یادو ښځو په یو لیک کې لیکلي، واک ته د طالبانو تر رسېدو وروسته طالبانو په افغانستان کې ښځې او نجونې ځپلي او لاهم دا لړۍ جریان لري.
د یادونې ده چې تر دې وړاندې هم یو شمېر بنسټونو له ټرمپ غوښتي چې د دوحې تړون عملي کړي.
په نړۍ کې د روانو جګړو له کبله ۲۰۲۴ کال د ملګرو ملتونو د مرستندویانو لپاره مرګونی کال وو.
د ملګرو ملتونو سازمان ویلي، روان کال یې ۲۸۱ مرستندویان وژل شوي دي.
د بشري چارو او بېړنیو مرستو د همغږۍ په برخو کې د دغه سازمان نوي مرستیال ټام فلچر ویلي، چې د دوی مرستندویانو خپله زړورتیا او اخلاص د بمونو او مرمیو قرباني کړ.
د دغو مرستندویانو د وژل کېدو راپورونه په اوکراین، غزه، یمن او افغانستان کې ورکړل شوي دي.
د یادونې ده چې تېر کال په شلو هېوادونو کې د ملګرو ملتونو ۲۸۰ مرستندویان وژل شوي وو.
د افغانستان د ژغورنې لپاره د مقاومت شورا غړی او د پوهنتون استاد حبیب الرحمن سیاف د افغانستان لپاره د کاناډا له ځانګړي استازي ډیویډ سپراول سره کتلي.
ښاغلي سیاف حماسه میډیا ته ویلي، چې په دې لیدنه کې یې د نورو مسایلو ترڅنګ افغانستان کې د ټوله شموله حکومت جوړېدو په اړه خبرې کړې.
نوموړي ویلي، په لیدنه کې پر دې ټینګار شوی، چې طالبان باید د خلکو او په ځانګړي ډول د ښځو حقونه ورکړي.
حبیب الرحمان سیاف د طالبانو تر واک لاندې افغانستان یو زندان ته ورته بللی او زیاته کړې یې ده چې هېواد باید له دغه وضعیت څخه را ووېستل شي.
د جمهوري حکومت د بهرنیو چارو سرپرست وزیر حنیف اتمر د بغلان ولایت په نهرین ولسوالۍ کې پر یوه زیارت د ناپېژاندو وسله والو برید په کلکو ټکو غندلی.
ښاغلي اتمر په خپله ایکسپاڼه لیکلي، چې د بې طرفه نړیوالې څیړنې غوښتنه کوي.
نوموړي زیاته کړې چې، دا پېښه یو ځل بیا د افغانستان د خلکو د دښمنانو جنایت او د خلکو د امنیت په تامینولو کې د اوسني مسلط شوي حکومت بې کفایتي ښکاره کوي.