د کاناډا لومړی وزیر مارک کارني د یکشنبې په ورځ د اوکراین د خپلواکۍ په لمانځغونډه کې د ځانګړي مېلمه په توګه پلازمېنې کیېف ته رسېدلی.

کاناډايي چارواکي وايي، د سفر موخه د اوکراین د پوځي وړتیاوو پیاوړتیا، د وسلو ګډ تولید او د احتمالي اوربند وروسته د روسیې له بریدونو د مخنیوي لپاره د متحدانو ملاتړ پراخول دي.

تمه ده کارني د اوکراین له ولسمشر ولادیمیر زیلینسکي سره د امنیتي تضمینونو او پوځي مرستو په اړه خبرې وکړي.

کاناډا د جي–۷ په غونډه کې د اوکراین لپاره د دوو میلیاردو ډالرو نوې پوځي مرستې اعلان کړې او له اروپایي اتحادیې سره یې د ګډو دفاعي همکاریو تړون لاسلیک کړی دی.

واشنګټن پوسټ راپور ورکړی چې ولسمشر ډونالډ ټرمپ د ناقانونه کډوالۍ د مخنیوي په موخه شیکاګو ته د ملي ګارډ د استولو امر کړی دی.

سرچینې وايي چې دا پلان له څو اوونیو راهیسې چمتو شوی او تمه ده د سپټمبر په میاشت کې عملي شي.

دا په داسې حال کې ده، چې ټرمپ ویلي، امریکا به له غیر قانوني کډوالو پاکه کړي.

د پاکستان په پنجاب ایالت کې د ستلج سیند د اوبو کچه لوړه شوې او شاوخوا ۲۰ زره کسان خوندي سیمو ته انتقال شوي دي.

چارواکو هغو خلکو ته چې د سیند غاړو ته اوسي، خبرداری ورکړی چې سمدستي دې خپلې سیمې پرېږدي.

بل لور ته، په ګلګت بلتستان کې د یخچالي جهیلونو د چاودنې او سېلابونو له ویرې سلګونه کورنۍ بې‌ځایه شوې دي.

که څه هم چارواکي وايي د مرستو کمپونه فعاله شوي؛ خو امکانات خورا محدود دي.

ژغورونکو ادارو له خلکو غوښتي چې د مسؤلو بنسټونو لارښوونې جدي ونیسي.

پاکستان دا مهال د اقلیمي بدلون له سختو اغېزو سره مخ دی، چې له امله یې سخت بارانونه او سیلابونه رامنځته شوي دي.

د پخواني حکومت لومړي مرستیال امرالله صالح ویلي، د هرات ښار په عام محضر کې یو ځوان چې په مرمیو لګیدلی و، په دار ځړول شوی او دا صحنه د زامبید موزیم له یوې خونړۍ نندارې سره ورته ده.

صالح پر خپله اېکس‌پاڼه لیکلي، دا پېښه په داسې حال کې شوې چې زلمی خلیلزاد، چې طالبانو په واشنګټن کې د خپل سفیر په توګه نومولی، نړیوالو ته وايي چې په افغانستان کې وضعیت ښه شوی او د پانګونې وخت دی.

نوموړي ټینګار کړی چې خلیلزاد د دوحې تړون له لارې طالبان واک ته ورسول، او دا ډول پېښې د همدې تړون مستقیمې پایلې دي.

د صالح په وینا، هغه ځوان چې جسد یې ښکارېده، ښایي د طالبانو پر ضد د ازادۍ مبارزه یې کوله.

استرالیا کې میشتو افغانانو د خپلواکۍ ۱۰۶ مه کلیزه ولمانځله.

ددې غونډې یوه چمتو کونکي محب اقبال حماسه میډیا ته وویل چې د خپلواکۍ غونډه چې لسګونه میلبورن میشتو افغانانو په کې برخه اخیسته وه، د مقالو په لوستلو او په اتڼونو پای ته ورسیده.

ښاغلي اقبال وویل:« د خپلواکۍ په بیرته اخیستنې کې د شاه غازي امان الله خان او زمونږ د نیکونو په قربانیو خبرې وشوې، نوي نسل ته د خپل تاریخ یادونه له اساسي کارونو څخه ده.»

د افغانستان د خپلواکۍ د لمانځنې جشن هرکال د اګست په ۱۹ لمانځل کیږي.

د حزب اسلامي مشر ګلبدین حکمتیار هرات کې د طالبانو حکومت له لوري په عام محضر کې د دوه کسانو دار ځړولو ته په اشارې ویلي چې په اسلامي نظام کې د دار سزا یوازې هغه کسانو ته ورکول کېږي چې په لاره کې یې خلک لوټلي وي، د خلکو مال یې غصب کړی او د مال خاوند یې وژلی وي.

د ده په وینا له دې پرته بل هېچا ته د دار سزا نشته.

نوموړي زیاته کړې، د اسلامي نظام په وړاندې د وسله وال بغاوت پر ضد جګړه یوازې تر هغه جایز ده چې باغیان جګړه وکړي؛ خو که له بغاوته لاس واخلي او وتښتي، نه وژل کېږي، نه تعقیبېږي او نه هم د مړي سپکاوی او مثله کېدای شي.

حکمتیار وايي د باغي کس د کور تلاشي، د ده د مال او وسلې ضبطول یا د کورنۍ د حقوقو غصب هېچا ته روا نه دي، ځکه د هغه ګناه د خپلوانو پر حقونو نه شي لګېدلی.

د ایران د وسلو د پراخېدو د مخنیوي لپاره د امریکا د ملي امنیت شورا پخواني چارواکي ریچارد ګلدبرګ ویلي چې د هرمز تنګي بندول د ایران لپاره «اقتصادي ځان‌وژنه» ده.

نوموړي دا څرګندونې وروسته تر هغې کړې، چې د ایران د مذهبي مشر استازي، علي شریعتمداري ویلي وو که ایران هرمز تنګی بند کړي، د نفتو بیه به تر ۲۰۰ ډالرو ورسېږي.

ګلدبرګ دا ادعا له واقعیت لرې وبلله او ویې ویل چې دا کار به تر ټولو ډېر فشار پر چین راولي، ځکه نیمایي نفت له همدې لارې ترلاسه کوي.

د ایران استخباراتي چارواکو اعلان کړی چې د دغه هېواد په سوېل ختیځ سیستان او بلوچستان ولایت کې یې د ترهګرو یوه ډله له‌منځه وړې ده.

دغه سیمه د پاکستان له پولې سره نږدې پرته ده.

د چارواکو په وینا، په عملیاتو کې د یادې ډلې شپږ غړي وژل شوي او دوه نور ژوندي نیول شوي دي.

دوی زیاته کړې چې دا عملیات د ترهګریزو فعالیتونو د مخنیوي او د سیمې د امنیت د ټینګښت په موخه ترسره شوي دي.

د شمالي کوریا دولتي رسنۍ خبر ورکړی چې دغه هېواد نوي هوايي دفاعي توغندي ازمویلي، او دا ازموینه د مشر کیم جونګ اون تر نظارت لاندې شوې ده.

راپور زیاتوي چې دا نوې سیستمونه د بې‌پیلوټه الوتکو او کروز توغندیو پر وړاندې چټک غبرګون ښيي.

دا په داسې حال کې ده، چې ټاکل شوې سبا د امریکا ولسمشر ډونالډ ټرمپ او د جنوبي کوریا ولسمشر لی جائه میونګ غونډه وکړي.

د افغانستان بانک وايي، په تېرو څلورو کلونو کې د افغانیو ارزښت د بهرنيو اسعارو، په ځانګړي ډول د ډالر پر وړاندې ۲۱ سلنه لوړ شوی دی.

په ورته مهال، افغانستان بانک له ۲۰۰ څخه ډېرو نړیوالو بانکونو سره د بانکي اړیکو د پراخېدو او په تېرو ۱۲ میاشتو کې د مالي تمویلاتو د ۷۱ سلنې زیاتوالي خبر ورکوي.

د یاد بانک په وینا، دوی د مناسبو پولي سیاستونو په تطبیق سره توانېدلي چې د افغانیو ارزښت وساتي او د اسعارو په بازار کې له سختو نوساناتو مخنیوی وکړي.