د طالبانو حکومت د عامې روغتیا وزیر مولوي نور جلال جلالي د لوی اختر په لومړۍ ورځ په کابل کې د وزیر محمد اکبر خان تخصصي او ثالثي روغتون څخه لیدنه کړې او هلته یې د روغتیايي خدمتونو بهیر ارزولی دی.

د روغتیا وزارت په وینا، نوموړي د بستري ناروغانو د احوالو پوښتنه کړې او د اختر په ورځو کې یې د روغتیايي خدمتونو پر دوام ټینګار کړی دی.

مولوي جلالي روغتیايي کارکوونکو ته سپارښتنه کړې چې د اختر په رخصتیو کې دې هم هېوادوالو ته غوره او پر وخت روغتیايي خدمات وړاندې کړي او روغتیايي مرکزونه دې په بشپړ ډول فعال وساتل شي.

د روسیې د امنیت شورا مرستیال الکساندر وندديکتوف ویلي، مسکو چمتو دی چې د طالبانو د حکومت او پاکستان ترمنځ د اختلافاتو په حل کې مرسته وکړي.

ونددیکتوف دا څرګندونې د پاکستان د لومړي وزیر د ملي امنیت له مرستیال سلاکار ازاد سجاد خان سره د لیدنې پر مهال کړې دي.

نوموړي ویلي، روسیه غواړي د افغانستان او پاکستان ترمنځ پر ډیورنډ کرښه وضعیت بېرته عادي شي او دواړه لوري خپلې ستونزې د خبرو او ډیپلوماسۍ له لارې حل کړي.

هغه زیاته کړې، که اسلام‌اباد مناسب وګڼي، روسیه چمتو ده چې په دې بهیر کې هر اړخیزه مرسته او همکاري وکړي.

دغه لیدنه د مسکو د نړیوال امنیتي فورم په څنډه کې ترسره شوې، په داسې حال کې چې د پاکستان او د طالبانو د حکومت ترمنځ اړیکې په وروستیو میاشتو کې د سرحدي او امنیتي ستونزو له امله ترینګلې شوې دي.

روسیې تر دې وړاندې هم څو ځله د دواړو لورو ترمنځ د منځګړیتوب لپاره خپل چمتووالی څرګند کړی و.

په بنګله‌دېش کې یوه سپینه مېښه چې پر سر یې زېړ وېښتان دي، د امریکا د ولسمشر ډونالډ ټرمپ په نوم په ټولنیزو رسنیو کې ډېره مشهوره شوې ده.

دغه مېښه چې د لوی اختر د قربانۍ لپاره بازار ته وړاندې شوې وه، د اختر په لومړۍ ورځ د ځایي چارواکو له لوري له حلالېدو ژغورل شوې ده.

راپورونه وایي، وروسته له هغې چې د مېښې انځورونه او ویډیوګانې پر ټولنیزو شبکو ډېرې خپرې شوې، چارواکو پرېکړه وکړه چې نوموړې مېښه به د قربانۍ پر ځای د بنګله‌دېش پلازمېنې ډاکه یوه ژوبڼ ته ولېږدول شي.

د مېښې ځانګړې بڼې او د “ټرمپ” په نوم شهرت د خلکو پام ځانته اړولی او په انټرنېټ کې یې پراخ غبرګونونه راپارولي دي.

ایراني ځواکونو اعلان کړی چې په کویټ کې یې د امریکا یوه پوځي اډه د توغندیز برید هدف ګرځولې ده.

د ایران دولتي رسنیو ویلي، دا اقدام د امریکا وروستیو بریدونو ته “ځوابي غبرګون” و.

تر اوسه د برید د مرګ‌ژوبلې او زیانونو په اړه رسمي معلومات نه دي خپاره شوي، خو سیمه کې امنیتي حالت ترینګلی شوی او امریکايي ځواکونو د لوړې تیارسۍ اعلان کړی دی

د حزب اسلامي مشر ګلبدین حکمتیار په خپل اختریز پیغام کې ویلي چې د افغانستان د روان بحران د حل، واقعي سولې او ثبات یوازینۍ لار دا ده چې ټول اغېزمن داخلي لوري له قید او شرط پرته صادقانه مذاکراتو ته کښېني او پر اساسي ملي اصولو توافق وکړي.

هغه ټینګار کړی چې افغانان باید نور د قدرت ترلاسه کولو او په واک کې د پاتې کېدو لپاره د جګړې لار ونه کاروي او نه هم د بهرنیو هېوادونو په ملاتړ د خپلو سیالانو د ماتولو هڅه وکړي.

د نوموړي په وینا، کورنۍ جګړه باید “د تل لپاره تحریم او پای ته ورسول شي.”

حکمتیار همداراز ویلي چې د هېواد مشر باید د خلکو د اکثریت په خوښه وټاکل شي، نه د زور او تحمیل له لارې.

هغه زیاته کړې چې مشر باید “امیر وي، نه آمر”، یعنې د ولس په مشوره حکومت وکړي، د خلکو پر وړاندې ځان مسئول وبولي او د خپلو پرېکړو حساب ورکړي.

نوموړي د اسلامي اصولو پر بنسټ د اهل، امانتدار او وړ اشخاصو د ټاکلو غوښتنه هم کړې او خبرداری یې ورکړی چې د اړیکو، قومولۍ او شخصي ملګرتیا پر اساس ګمارنې د ملت او نظام پر وړاندې خیانت ګڼل کېږي.

د امریکا د بهرنیو چارو وزیر مارکو روبیو د سپینې ماڼۍ د کابینې په غونډه کې ویلي، وروستۍ موخه دا ده چې ایران هېڅکله اټومي وسلې ترلاسه نه کړي.

روبیو ټینګار کړی چې وروستیو پېښو یو ځل بیا وښوده چې ایران د نړۍ د ترهګرۍ تر ټولو ستر ملاتړی هېواد دی او باید د داسې وسلو د ترلاسه کولو اجازه ورنه کړل شي.

هغه ویلي، د امریکا د ولسمشر ډونالډ ټرمپ لومړیتوب تل مذاکرات او د ډیپلوماسۍ له لارې یوې هوکړې ته رسېدل و، او دا بهیر د سټیو ویټکاف، جیرډ کوشنر او د ولسمشر د مرستیال جی‌ډي وېنس له لارې دوام لري.

د امریکا د بهرنیو چارو وزیر زیاته کړې، که د یوې موافقې زمینه برابره شي، واشنګټن د هغې ملاتړ کوي او د پرمختګ ځینې نښې هم لیدل شوې دي.

هغه خبرداری ورکړی، که ډیپلوماسي نتیجه ورنه کړي، ولسمشر نور انتخابونه هم لري.

روبیو ټینګار کړی چې تر هغه وخته چې ډونالډ ټرمپ ولسمشر وي، ایران به هېڅکله اټومي وسلو ته لاسرسی پیدا نه کړي.

د امریکا د بهرنیو چارو وزیر مارکو روبیو د سپینې ماڼۍ د کابینې په غونډه کې ویلي، وروستۍ موخه دا ده چې ایران هېڅکله اټومي وسلې ترلاسه نه کړي.

روبیو ټینګار کړی چې وروستیو پېښو یو ځل بیا وښوده چې ایران د نړۍ د ترهګرۍ تر ټولو ستر ملاتړی هېواد دی او باید د داسې وسلو د ترلاسه کولو اجازه ورنه کړل شي.

هغه ویلي، د امریکا د ولسمشر ډونالډ ټرمپ لومړیتوب تل مذاکرات او د ډیپلوماسۍ له لارې یوې هوکړې ته رسېدل و، او دا بهیر د سټیو ویټکاف، جیرډ کوشنر او د ولسمشر د مرستیال جی‌ډي وېنس له لارې دوام لري.

د امریکا د بهرنیو چارو وزیر زیاته کړې، که د یوې موافقې زمینه برابره شي، واشنګټن د هغې ملاتړ کوي او د پرمختګ ځینې نښې هم لیدل شوې دي.

هغه خبرداری ورکړی، که ډیپلوماسي نتیجه ورنه کړي، ولسمشر نور انتخابونه هم لري.

روبیو ټینګار کړی چې تر هغه وخته چې ډونالډ ټرمپ ولسمشر وي، ایران به هېڅکله اټومي وسلو ته لاسرسی پیدا نه کړي.

د طالبانو د حکومت د دفاع وزیر مولوي محمد یعقوب مجاهد مسکو ته د سفر په ترڅ کې د نړیوال امنیتي کنفرانس په څنډه کې د روسیې د امنیت شورا سکرتر سرګي شویګو سره لیدلي.

یاد وزارت په خپله اېکس پاڼه لیکي چې په دغه لیدنه کې دواړي لوري پر دوه اړخیزو همکاریو او نورو مهمو موضوعاتو غږېدلي.

د طالبانو د حکومت د دفاع وزارت یرپرست یعقوب مجاهد تېره ورځ د یو پلاوي په مشرۍ د روسیې فدراسیون په کوربتوب په نړیوال امنیتي کنفرانس کې د ګډون لپاره مسکو ته ولاړ.

دغه کنفرانس کې د سیمې او نړۍ د ګڼو هېوادونو امنیتي او دفاعي چارواکو ګډون کړی او په کې د سیمه‌ییز امنیت، ګډو امنیتي ننګونو او دوه اړخیزو همکاریو په اړه بحث او نظرونه شریکوي.

د اوکراین لوړپوړو پوځي چارواکو ویلي چې د روسیې پر ضد جګړه کې راتلونکې شپږ میاشتې ډېرې مهمې دي او ښایي د جګړې مسیر بدل کړي.

د اوکراین د درېیم پوځ قول اردو قوماندان انډري بلټسکي ویلي چې روسي ځواکونه ستړي شوي او د پراخو پرمختګونو توان یې د لاسه ورکړی.

په همدې حال کې، اوکراین په روسي سیمو او کریمیا کې د ډرون او Storm Shadow توغندیو بریدونه زیات کړي دي، چې له امله یې د روسیې ځینې پوځي او اقتصادي مرکزونه زیانمن شوي دي.

بل لور ته، روسیې هم پر کیف او نورو ښارونو د توغندیو او ډرون پراخ بریدونه کړي دي.

پوځي شنونکي وایي چې جګړه اوس د ټکنالوژۍ، ډرونونو او اوږد واټن بریدونو نوي پړاو ته داخله شوې ده، او دواړه هېوادونه هڅه کوي د احتمالي سولې خبرو مخکې خپل دریځ پیاوړی کړي.

سپینې ماڼۍ د ایران د دولتي رسنیو هغه راپورونه رد کړي چې ګواکې د امریکا او ایران ترمنځ د احتمالي تفاهم‌لیک ځینې مادې افشا شوې دي.

سپینې ماڼۍ ویلي، هغه معلومات چې د ایران رسنیو خپاره کړي، په بشپړه توګه جعلي او بې‌بنسټه دي او باید پرې باور ونه شي.

د امریکا حکومت ټینګار کړی چې د روانو احتمالي خبرو او تفاهمونو په اړه رسمي دریځ یوازې د باوري او رسمي سرچینو له لارې اعلانېږي.