د الجزیرې نړیوالې خبري شبکې د راپور له مخې، د اسراییلي پوځیانو له لوري د غزې تړانګې پر بېلابېلو سیمو هوايي بریدونه شوي، چې په ترڅ کې یې لږ تر لږه ۹۱ تنه وژل شوي دي.
د راپور له مخې، یواځې ۴۸ کسان د غزې ښار کې وژل شوي دي.
د غزې سیمهییز حکومت د رسنیو دفتر وايي، ډېری قربانیان په هغو سیمو کې وژل شوي چې اسراییل تر دې وړاندې د “خوندي سیمو” په توګه اعلان کړې وې.
یاد بریدونه داسې مهال ترسره کېږي، چې نړیوالې ټولنې پر اسراییل د ملکي تلفاتو د زیاتوالي او بشري قوانینو د نقض له امله سختې نیوکې کړې دي.
د امریکایي رسنیو د راپورونو له مخې، د شمالي کارولینا ایالت په ساوتپورت ښار کې د یکشنبې په ورځ د ډزو له امله درې تنه وژل شوي او اته نور ټپیان شوي دي.
د ABC ټلویزیوني شبکې د راپور پر بنسټ، ډزې له یوې کښتۍ شوې دي.
د ساوتپورت ښاروال دا پېښه تایید کړې او ویلي یې دي چې مجرم نیول شوی او دا مهال تر پوښتنو لاندې دی.
تر اوسه د دې برید علت نه دی روښانه شوی.
بریتانیا، فرانسې او جرمني په یوه ګډه اعلامیه کې پر ایران باندې د بندیزونو د فعالېدو په تړاو ټینګار کړی چې ایران هېڅکله باید د اټومي وسلو د ترلاسه کولو یا پراختیا هڅه ونه کړي.
دغو هېوادونو د ملګرو ملتونو له غړو غوښتي چې د بندیزونو د پلي کولو ملاتړ وکړي.
په اعلامیه کې ویل شوي چې د ایران له خوا د ژمنو د پرلهپسې نقض له امله، درې اروپایي هېوادونه مجبوره شول د میکانیزم ماشه فعال کړي او د ملګرو ملتونو ټول پخواني پرېکړه لیکونه بېرته نافذ شي.
اعلامیه زیاتوي چې د ایران د غني شویو یورانیمو ټولې زېرمې د اټومي انرژۍ د نړیوال اژانس له څارنې بهر دي او تهران د لوړ غلظت لرونکي یورانیمو د ساتلو لپاره هېڅ غیرپوځي دلیل نه لري.
د دوی په وینا، هېڅ هېواد چې د وسلو د پروګرام نیت ونه لري، په دې کچه یورانیم نه غني کوي.
اروپایي درې هېوادونو ټینګار کړی چې د بندیزونو بېرته راتګ د ډیپلوماسۍ د پای معنا نه لري او دوی به د خبرو او سیاسي لارو چارو تعقیب ته دوام ورکړي.
هغوی له ایران غوښتي چې له هر ډول پاروونکو کړنو ډډه وکړي او خپلو د اټومي تړونونو د پلي کولو ژمنو ته بېرته را وګرځي.
د پاکستان د دفاع وزیر خواجه اصف اعتراف کړی چې د افغانستان په کورنیو چارو کې د اسلاماباد لاسوهنه ستره تېروتنه وه.
هغه په یوه تازه مرکه کې ویلي چې د روسیې پر ضد جګړه کې د افغانانو ملاتړ ته اړتیا نه وه او دا پرېکړه د پاکستان لپاره منفي پایلې لرلې.
اصف د هغه وخت د پوځ مشر جنرال ضیاالحق «ډیکتاتور» بللی او ټینګار یې کړی چې هغه د امریکا د رضایت او اړیکو د پراختیا لپاره ګامونه پورته کړي وو، چې وروسته یې د سیمې وضعیت لا پیچلی کړ.
د چارو ادارې پخواني رییس فضل محمود فضلي ویلي، هغه کسان چې د افراطیت د مرکزونو د څارنې لپاره د هماغو هېوادونو مرسته غواړي، کومو چې په خپله دغه مرکزونه جوړ کړي او د افراطیت فکري مفکورې یې پیاوړې کړې دي.
ښاغلي فضلي په خپله ایکسپاڼه لیکلي، چې دغه کسان په حقیقت کې یا په ژوره ناپوهۍ اخته دي او یا د هماغو هېوادونو د افراطي مدرسو د پروژو ترڅنګ د لېبرالو بهیرونو د پروژو همکاران دي.
نوموړی زیاتوي، دا کار په لوی لاس د هېواد د ځوان نسل لیدلوری ګډوډوي او مغشوشوي.
د هغه په وینا، د جهادي او افراطي مدرسو د نړیوالو لېبرالو ملاتړو او بسپنه ورکوونکو په تشخیص کې ګنګسیت د افغانستان روانه غمیزه لا پسې اوږدوي.
د امریکا د بهرنیو چارو وزیر مارکو روبیو د ملګرو ملتونو د بندیزونو د بیا فعالېدو په تړاو ویلي چې دا اقدام روښانه پیغام لري.
روبیو ویلي، چې نړۍ به د ګواښونو پر وړاندې تسلیم نه شي او تهران باید ځواب ووایي.
روبیو د ولسمشر ډونالډ ټرمپ دریځ ته په اشارې ټینګار کړی چې ډیپلوماسي لا هم یوه لاره ده او هوکړه د ایران د خلکو او نړۍ لپاره غوره نتیجه ګڼل کېږي.
هغه ایران ته بلنه ورکړې چې په نیک نیت مستقیمې خبرې ومني.
نوموړي خبرداری ورکړی که هوکړه رامنځته نه شي، واشنګټن به له خپلو متحدینو سره سم ټول بندیزونه پلي کړي څو د ایران مشرتابه د فشار لاندې د خلکو او نړیوال امنیت په ګټه پرېکړې وکړي.
د داعش خراسان څانګې یو لوړپوړی عملیاتي قومندان د بلخ ولایت په مزارشریف ښار کې د ناپېژاندو وسلهوالو لخوا وژل شوی دی.
سرچینې وايي، محمد احساني چې د تاجک قوم غړی و، د تاجکستاني ځانمرګو د روزنې او پاکستان ته د لېږد مسوول و.
نوموړی د پېښور د کوچه ریسالدار د جومات په چاودنه کې، چې په ۲۰۲۲ کال کې ۶۷ کسان پکې وژل شوي وو، د اصلي همکارانو له ډلې ګڼل کېده.
سرچینې زیاتوي چې احساني چې په مستعار نوم انوار پېژندل کېده، د پاکستان په خیبر پښتونخوا کې د داعش مهم فعال و.
په هندوستان کې د بالیووډ مشهور اداکار او سیاستوال ویجای د یوې سترې غونډې پر مهال د ګڼې ګوڼې له کبله خونړۍ پېښه رامنځته شوې ده.
د رويټرز د راپور له مخې، دا پېښه د تامیل ناډو په ایالت کې شوې چې لږ تر لږه ۲۳ کسان پکې مړه شوي دي.
د هندي رسنیو د معلوماتو پر بنسټ، د مړو شمېر تر ۲۹ تنو رسېدلی او شاوخوا ۵۰ تنه نور ټپیان شوي دي.
د ټپیانو د درملنې لپاره ۲۰ روغتیايي ډلې سیمې ته استول شوې دي.
د تامیل ناډو د روغتیا وزیر، سوبراهمانیان، هم د ۲۹ کسانو د مړینې خبر تایید کړی دی.
د آلمان د کورنیو چارو وزارت اعلان کړی چې د دې وزارت لوړپوړي چارواکي به د اکتوبر په میاشت کې کابل ته سفر وکړي.
د جرمني رسنیو په راپور کې ویل شوي، دغه سفر د دې لپاره دی چې له طالبانو سره د هغو افغانانو د شړلو په اړه خبرې وشي چې په جرمني کې مجرمان او خطرناک بلل کېږي.
چارواکي وايي دا بهیر به په پټه ترسره شي او هڅه کېږي د ځانګړو الوتنو پر ځای د عادي ملکي الوتنو له لارې ترسره شي.
د آلمان د کورنیو چارو وزیر، الکساندر دوبرینټ ټینګار کړی چې د پناهغوښتونکو شړل باید منظم ترسره شي او همدا لامل دی چې کابل کې مستقیمې خبرې کوي.
یاده دې وي چې تر دې وړاندې د قطر په منځګړیتوب دوه پروازونه شوي او په وروستي پرواز کې د ۲۰۲۵ د جولای په میاشت کې ۸۱ افغان مهاجر له آلمان څخه ایستل شوي وو.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارد بینېټ ویلي، چې د طالبانو له لوري د نجونو د زده کړو مخنیوی د افراطیت ښکاره بېلګه ده او په دې ډول پالیسۍ سره د افغانستان د راتلونکې نسل راتلونکی له منځه ځي.
نوموړي د ملګرو ملتونو په غونډه کې ویلي، له افغانستانه راغلي مستند راپورونه کولای شي نړیوالې محکمې اغېزمنو نړیوالو اقداماتو ته وهڅوي.
ښاغلي بینېټ زیاته کړې، چې د افغانانو، په ځانګړي ډول د دیني عالمانو غږ اورېدل او د افراطیت د نظریو پر وړاندې د خبرو لپاره زمینه برابرول ډېر مهم دي او باید ورته پام وشي.
هغه ټینګار کړی، چې د طالبانو له خوا د مدني ټولنې د غږونو ټکول، د مخالفانو ځپنه او د وېرې خپرولو اقدامات، د نړۍ د خلکو له سترګو پټ نه دي او د دایمي څار لاندې پاتې کېږي.