قطر د افغانستان او پاکستان ترمنځ د کوچني اختر په مناسبت د اعلان شوي لنډمهالي اوربند هرکلی کړی او دا ګام یې یوه مثبته هڅه بللې ده.

د قطر د بهرنیو چارو وزارت په یوه اعلامیه کې هیله څرګنده کړې چې دا لنډمهالی اوربند به د یو دوامدار اوربند لپاره زمینه برابره کړي.

یاد وزارت ټینګار کړی چې د خبرو اترو او سوله‌ییزو حل‌لارو غوره کول د شخړو د حل تر ټولو اغېزناکه لاره ده.

همدارنګه، د قطر د بهرنیو چارو وزارت ژمنه ښودلې چې په دې برخه کې به له سیمه‌ییزو او نړیوالو شریکانو سره په همغږۍ خپلو ډیپلوماټیکو هڅو ته دوام ورکړي.

د ننګرهار پخواني والي ضیاالحق امرخېل ویلي، پاکستان د افغانستان پر وړاندې ځکه د تکبر او برلاسۍ چلند کوي چې زموږ داخلي کمزورۍ یې په سمه توګه درک کړې دي.

نوموړي ویلي، چې د افغانانو تر ټولو ستره ستونزه خپلمنځي نه‌یووالی او د یو بل د حقونو نه منل دي.

د هغه په وینا، تر هغه چې افغانان یو بل ونه مني او متقابل درناوی رامنځته نه کړي، د بهرنیو فشارونو او لاسوهنو پر وړاندې به کمزوري پاتې شي.

امرخېل زیاته کړې چې که افغانان د زغم، تفاهم او یووالي لاره خپله کړي او خپل نظرونه پر یو بل ونه تپي، نو کولای شي یو قوي، متحد او پر ځان بسیا ملت جوړ کړي.

هغه ټینګار کړی چې یووالی، متقابل احترام او ملي همغږي د افغانستان د ځواک بنسټ جوړوي او یوازې د همدې ارزښتونو له لارې هېواد کولای شي له اوسنیو ننګونو بریالی ووځي.

د هند د سینما وتلي لوبغاړي سونیل شټي په کابل کې د روږدو کسانو د درملنې پر یوه روغتیايي مرکز د پاکستاني پوځ هوایي برید “ویجاړوونکی” بللی او د جګړو د درولو غوښتنه یې کړې ده.

هغه په خپله ایکس پاڼه لیکلي: «هغه څه چې په کابل کې پېښ شوي، ډېر دردناک او ویجاړوونکي دي. ټولې جګړې باید ودرېږي.»

نوموړي زیاته کړې چې هند د بشریت ترڅنګ ولاړ دی او ټینګار یې کړی چې سوله یوازینۍ لار ده، څو د بې‌ګناه خلکو ژوند وژغورل شي.

د طالبانو حکومت سترې محکمې اعلان وکړ چې سبا پنجشنبه په افغانستان کې د کوچني اختر لومړۍ ورځ ده.

دوی ویلي، چې ‏د رؤیت هلال مرکزي هئيت د رئیس او قاضي القضات شیخ عبدالحکیم حقاني، د رسمي اعلان له مخې سبا پنج‌شنبه د نېکمرغه کوچني اختر (شوال المکرم) لومړۍ ورځ ده.

د یادونې ده چې سعودي عربستان د جمعې ورځ د کوچني اختر لومړۍ ورځ اعلان کړه.

د طالبانو حکومت ویاند ذبیح‌الله مجاهد اعلان کړی چې د پاکستان پر وړاندې “رد الظلم” په نوم دفاعي عملیات به د راتلونکي نېکمرغه کوچني اختر په مناسبت لنډمهاله ودرول شي.

د نوموړي په وینا، دغه پرېکړه د اسلامي هېوادونو د منځګړیتوب غوښتنو ته په کتو شوې ده، چې پکې سعودي عربستان، ترکیه او قطر شامل دي.

مجاهد ویلي، چې «اسلامي امارت» د دغو هېوادونو له نېک نیت څخه مننه کوي او ټینګار یې کړی چې د افغانستان د ملي امنیت، حاکمیت او د خلکو د ژوند خوندیتوب د دوی اساسي او شرعي مسوولیت دی.

په اعلامیه کې راغلي، که هر ډول ګواښ رامنځته شي؛ نو «اسلامي امارت» به هر ډول احتمالي تېري ته په مېړانه ځواب ورکړي.

د یادونې ده چې د پاکستان حکومت هم اعلان کړی چې افغانستان کې روان بریدونه به په موقتي ډول وځنډوي.

د سعودي عربستان د الحرمین پاڼې ویلي، چې د شوال میاشتې هلال په سعودي عربستان کې ونه لیدل شو او کوچنی اختر به د جمعې په ورځ د ۲۰۲۶ کال د مارچ په ۲۰مه ولمانځل شي.

د طالبانو حکومت سترې محکمې تر اوسه څه نه دي ویلي.

د بریتانیا لومړي وزیر، کی‌یر استارمر د ایران د جګړې په اړه په خپلو تازه څرګندونو کې د سیاسي هوکړې پر اړتیا ټینګار کړی دی.

استارمر ویلي، که څه هم د امریکا پوځي عملیاتو د ایران پوځي وړتیا تر یوه حده کمزورې کړې؛ خو اساسي پوښتنه دا ده چې د جګړې له پای وروسته به څه پېښ شي.

هغه زیاته کړې چې د ایران د حکومت د فعالیتونو د مهار لپاره—لکه اټومي پروګرام، بالستیک توغندي، نیابتي ډلې او نړیوالو سمندري لارو ته ګواښ—یو منظم سیاسي چوکاټ او هوکړه اړینه ده.

دا څرګندونې په داسې حال کې کېږي چې بریتانیا او نورو اروپایي هېوادونو تر دې مخکې هم د جګړې پر ځای پر ډیپلوماټیکو حل‌لارو ټینګار کړی دی.

د پاکستان حکومت اعلان کړی چې افغانستان کې روان بریدونه به په موقتي ډول وځنډوي.

د معلوماتو له مخې، دغه وقفه به د ۲۰۲۶ کال د مارچ له ۱۸مې پیل او د مارچ تر ۲۴مې پورې دوام وکړي.

د پاکستان د معلوماتو وزیر ویلي چې دا پرېکړه د کوچني اختر د رارسېدو په مناسبت شوې او د یو شمېر اسلامي هېوادونو لکه سعودي عربستان، قطر او ترکیه د ډیپلوماتیکو هڅو او غوښتنو په پایله کې اخیستل شوې ده.

دوی ویلي چې دا ګام د اسلامي ارزښتونو او دودونو د درناوي په موخه اخیستل شوی؛ خو خبرداری یې ورکړی چې که د دې مودې په ترڅ کې د پولې پورې غاړې برید، ډرون حمله یا کوم ترهګریز عمل ترسره شي، نو عملیات به سمدستي بېرته پیل او لا سخت شي.

د پاکستان حکومت دغه راز ویلي چې د پولې په اوږدو کې وضعیت له نږدې څاري او بشپړ چمتووالی لري.

قطر کې د طالبانو حکومت سفیر سهیل شاهین ویلي چې د.«اسلامي امارت» اساسي پالیسي دا ده چې د افغانستان خاوره به د هېڅ هېواد پر ضد نه کارول کېږي.

نوموړي ټینګار کړی چې دا ژمنه د دوحې تړون برخه هم ده او «اسلامي امارت» ورته ژمن پاتې دی.

شاهین زیاته کړې چې لکه څنګه چې افغانستان اجازه نه ورکوي د بل چا پر ضد یې خاوره وکارول شي، همداسې تمه لري چې نور هېوادونه هم اجازه ورنکړي چې د هغوی خاوره د افغانستان پر ضد وکارول شي.

د رویټرز د راپور له مخې، په افغانستان کې د یوناما ځینو سرچینو ویلي چې په کابل کې د روږدو د درملنې پر یوه مرکز د شوي هوايي برید له امله لږ تر لږه ۱۴۳ کسان وژل شوي دي.

راپور زیاتوي چې دغه شمېر د لومړنیو معلوماتو پر بنسټ وړاندې شوی او کېدای شي بدلون ومومي.

بل لور ته، د طالبانو حکومت ویلي وه چې په همدې برید کې تر ۴۰۰ ډېر کسان وژل شوي او له ۲۵۰ زیات نور ټپیان دي.