د کابل پخواني والي احمدالله علیزي د طالبانو حکومت او پاکستان ترمنځ د اختر په مناسبت اعلان شوی اوربند یو مهم او نېک پرمختګ بللی او ویلي یې دي چې دا اقدام کولای شي د دواړو لورو ترمنځ د باور فضا پیاوړې کړي.
ښاغلي علیزي ویلي، چې دغه اوربند د سولې او تفاهم لپاره نوې هیلې راژوندۍ کړې دي او که دواړه لوري د خبرو او تفاهم لاره خپله کړي، نو شونې ده چې شته ستونزې په سولهییز ډول حل شي.
هغه همداراز د سیمې له مهمو هېوادونو، په ځانګړي ډول ترکیې، قطر او سعودي عربستان څخه غوښتي چې د منځګړیتوب رول لا فعال کړي، تر څو د خبرو اترو بهیر پیاوړی او دایمي سولې ته زمینه برابره شي.
نوموړي زیاته کړې چې د دغه ډول اوربندونو دوام نه یوازې د افغانستان او پاکستان په ګټه دی، بلکې د ټولې سیمې ثبات او امنیت ته هم مثبت اغېز لري.
