رویټرز د ایراني چارواکو په حواله ویلي، چې په غزه کې د اوربند موافقه کولی شي د ایران له خوا پر اسرائیلو د مستقیم برید مخه ونیسي.
یوه ایراني چارواکي د نوم نه ښودلو په شرط رویټرز ته ویلي، چې که د غزې په اړه خبرې ناکامې شي او یا دا احساس وکړي چې اسراییل د خبرو ځنډول غواړي، ایران به له خپلو متحدینو لکه حزب الله سره مستقیم بریدونه وکړي.
دغه ایراني چارواکي دا نه ده څرګنده کړې چې دغه هیواد څومره وخت غواړي چې له پوځي غبرګون څخه مخکې د خبرو اترو پرمختګ ته لاره هواره کړي.
دا په داسې حال کې ده چې د اسماعیل هنیه له وژلو وروسته ایران پر اسرائیلو د برید ګواښونه کوي؛ خو تر اوسه د ایران له لوري هېڅ ډول اقدام نه دی شوی.
