د امریکا پخوانی ولسمشر او د ولسمشرۍ ټاکنو ته نوماند ډونالډ ټرمپ وايي، هغه جنرالان چې له افغانستان ووتل، له هغوی طالبان ښه جنګیالي دي.
ډونالډ ټرمپ له شان راین سره مرکه کې ویلي، چې د دوحې له مذاکراتو وروسته یې د ۱۸ میاشتو په موده کې پر امریکايي پوځیانو د برید نه کولو په خاطر د ملا عبدالغني برادر او د طالبانو د همکارۍ ستاینه وکړه.
ډونالډ ټرمپ ویلي، چې کاملا هرېس او جوبایډن د متحده ایالاتو اعتبار له منځه وړی دی.
ټرمپ زیاته کړې چې له افغانستان یې د وتو پرېکړه حتمي وه، خو په خبره یې په قدرت او په باعزته توګه وتل یې غوښتل.
ټرمپ دغه راز ویلي، چې دا د بایډن د ادارې احمقانه وتل وو چې روسیې ته یې پر اوکراین د برید کولو زړورتیا ورکړه.
