د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنټ ویلي چې د ملګرو ملتونو له نورو کارپوهانو سره یوځای یې له پاکستانه غوښتي چې د هغو افغانانو جبري ستنول ودروي چې ښايي له ځورونې، ربړونې او د بشري حقونو له جدي سرغړونو سره مخ شي.
بېنټ په یوه خپاره کړي پیغام کې ویلي، هغه افغانان چې له خطر سره مخ دي باید خوندي او د لاسرسي وړ لاره ولري، څو خپل حالت ثبت کړي، قضیې یې په انفرادي ډول و ارزول شي او د ارزونې تر بشپړېدو پورې له جبري ستنولو خوندي پاتې شي.
هغه په ځانګړې توګه د ښځو او نجونو، بې سرپرسته ماشومانو، د بشري حقونو مدافعانو، خبریالانو، پخوانیو قاضیانو، څارنوالانو، وکیلانو او پخوانیو امنیتي کارکوونکو په اړه اندېښنه ښودلې چې ښايي افغانستان ته له ستنېدو وروسته له جدي خطرونو سره مخ شي.
د ملګرو ملتونو دې چارواکي د پاکستان د طبي او ستوماتولوژۍ د زده کړو موسسو کې د افغان محصلینو د جبري ستنولو په اړه هم اندېښنه څرګنده کړې او ویلي یې دي چې دا موضوع په ځانګړې توګه د ښځینه محصلینو لپاره د اندېښنې وړ ده، ځکه په افغانستان کې د ښځو لوړو زده کړو او طبي زده کړو ته لاسرسی محدود دی.
بېنټ ټینګار کړی چې د نه جبري ستنولو اصل باید رعایت شي او هېڅوک باید داسې ځای ته بېرته ونه لېږل شي چې هلته د جدي بشري حقونو د سرغړونو له واقعي خطر سره مخ کیږي.
