د یمن حوثي ډلې ادعا کړې چې د صعده ولایت په فضا یې د سعودي عربستان یوه کشفي بېپیلوټه الوتکه نسکوره کړې ده.
د حوثیانو پوځي ویاند یحیی سري په یوه خبرپاڼه کې ویلي، د «کرایل» (Karayel) ډوله بېپیلوټه الوتکه هغه مهال په نښه شوې چې د صعده ولایت په هوايي حریم کې یې د دوی په وینا «دښمنانه فعالیتونه» ترسره کول.
یحیی سري ویلي، دغه الوتکه د «مناسبې وسلې» په وسیله ویشتل شوې او حوثیان به د هېواد د حاکمیت د دفاع او د هر ډول سرغړونې پر وړاندې خپل غبرګون ته دوام ورکړي.
تر اوسه سعودي عربستان د حوثیانو د دغې ادعا په اړه څه نه دي ویلي. خو په دې وروستیو کې د یاد هېواد پر وړاندې د حوثي ډلې امنیتي ګواښونه زیات شوي دي.
