د سعودي د تېلو ستر شرکت ارامکو د یمن د حوثيانو له برید وروسته د جازان د تېلو چاڼځای تړلی دی.
د رویټرز د راپور له مخې، دغه چاڼځای چې هره ورځ د ۴۰۰ زره بېرلو تېلو د پروسس ظرفیت لري، د جولای په ۲۷مه د برید له امله وتړل شو.
راپورونه وایي، په برید کې د ګازو د پروسس یوه برخه او د تېلو د زېرمو ساحه زیانمنه شوې ده.
سعودي ارامکو ویلي چې د ترمیم چارې به بشپړې کړي او تمه ده چې چاڼځای د اګست تر ۱۵مې بېرته فعالیت پیل کړي.
د حوثيانو پوځي ویاند یحیی سري ادعا کړې چې دوی په جازان او ینبع کې د سعودي ارامکو پر تاسیساتو بریدونه کړي دي.
د برید یوه ویډیو هم په ټولنیزو رسنیو کې خپره شوې چې په کې د جازان له چاڼځای
د لوګي پورته کېدل ښکاري.
