د لبنان د پارلمان مشر نبي بري ویلي، دی کولی شي تضمین ورکړي چې حزبالله به د هر ډول اوربند پرېکړې ته په بشپړه، هر اړخیزه او سمدستي توګه ژمن پاتې شي.
خو نوموړي پوښتنه کړې چې څوک به وکولای شي اسرائیل دې ته اړ کړي چې پر لبنان خپل روان بریدونه او پوځي عملیات ودروي.
بري ټینګار کړی چې د اوربند د بریالي کېدو لپاره باید دواړه لوري جګړه ودروي او یوازې د یوه لوري ژمنتیا بسنه نه کوي.
د نوموړي څرګندونې په داسې حال کې مطرح کېږي چې د اسرائیل او حزبالله ترمنځ نښتې لا هم روانې دي او اسرائیلي ځواکونو په سوېلي لبنان کې خپل پوځي عملیات پراخ کړي دي. اسرائیل وایي هدف یې د حزبالله د پوځي وړتیاوو کمزوري کول دي، خو لبناني چارواکي وایي دغو عملیاتو ملکي وګړو او عامه تاسیساتو ته درانه زیانونه اړولي دي.
هم مهاله د لبنان لومړي وزیر هم د سمدستي اوربند غوښتنه کړې او ټینګار یې کړی چې د روانې شخړې د حل یوازنۍ لار سیاسي خبرې اترې دي.
