د قطر مرستیال لومړي وزیر شیخ سعود بن عبدالرحمن بن حسن بن علي آل ثاني د شانګري-لا امنیتي غونډې ته ویلي چې دوی د هرمز تنګي له لارې د تګ راتګ لپاره د دایمي محصول یا ټال اخیستلو سره جوړ نه دي.
نوموړي زیاته کړې که د سمندري لارې د بېرته پرانیستلو او خوندیتوب لپاره موقتي فیس وټاکل شي، لکه د سمندري ماینونو پاکول، نو قطر چمتو دی چې په دې اړه خبرې اترې وکړي.
قطر داسې مهال دا ډول څرګندونې کوي چې د هرمز تنګي د امنیت او نړیوالې سوداګرۍ او دغه راز د خوندي تګ راتګ لپاره د فیس ټاکلو په اړه خبرې او نړیوالې اندېښنې زیاتې شوې دي.
هرمز تنګی د نړۍ له مهمو سمندري لارو څخه ګڼل کېږي او د نړیوالو انرژۍ صادراتو یوه لویه برخه له همدې لارې لېږدول کېږي.
