د امریکا د استازو جرګې د بهرنیو اړیکو د کمېټې مشر برایان مست او د دې کمېټې د جنوبي او مرکزي آسیا د برخې مشر بیل هویزنگا، کانګرس ته په یوه لیک کې غوښتنه کړې چې ولسمشر ټرمپ د ادارې د افغان کډوالو د سیاست په اړه دې علني استماعیه غونډه جوړه شي.
په لیک کې ویل شوي، سره له دې چې د کانګرس دواړو ګوندونو پراخ ملاتړ ښودلی، د ټرمپ ادارې د افغان متحدینو په اړه مهم او ښايي نه جبرانېدونکي بدلونونه کړي؛ خو تر اوسه یې وضاحت نه دی ورکړی.
د بهرنیو اړیکو کمېټه وايي، هغه افغانان چې له امریکا سره یې همکاري کړې او اوس له خطر سره مخ دي، مستحق دي چې له دولت او کانګرس څخه واضح تضمینونه او مشخص پلانونه ترلاسه کړي.
