د پاکستان د دفاع وزیر خواجه محمد آصف ویلي، چې اسلامآباد له نهم سپتمبر ۲۰۰۱ وروسته د افغانستان د جګړې پر مهال له ترهګرو ملاتړ کړی دی.
هغه له سيانان سره په مرکه کې دا هم منلې چې د امریکا له خوا د شوروي ضد جګړه کې د پاکستان ملاتړ یوه تېروتنه وه.
آصف د امریکا په دوهګوني چلند نیوکه کړې او ویلي یې دي، چې واشنګټن د خلکو نومونه د ترهګر یا غیر ترهګر په توګه ټاکي یا یې باسي.
اصف د سراجالدین حقاني نوم له تور لیسته د لرې کولو په اړه ویلي: «دوه یا درې میاشتې مخکې د حقاني د نیولو لپاره جایزه اعلان شوې وه، اوس نه یوازې دا چې نوموړی آزاد دی، بلکې جایزه هم لغوه شوې. اوس پوښتنه دا ده چې څوک پرېکړه کوي څوک ترهګر وي او څوک نه؟»
هغه دا څرګندونې داسې مهال کړې، چې د هند او پاکستان ترمنځ نښتې دوام لري او دواړه لوري یو بل ته د زیانونو اړولو ادعا کوي.
