د ملګرو ملتونو د سیاسي استازولۍ مشرې روزا اتونبایووا ویلي، د افغانستان روان اقتصادي بحران د رسنیو پر فعالیتونو ژور اغېز کړی، او د عایداتو کمېدو له امله ګڼ شمېر رسنۍ خپل فعالیتونه بند کړي دي.
هغې زیاته کړې چې د طالبانو د حکومت له خوا د بیان پر ازادۍ محدودیتونه زیات شوي، چې له کبله یې د رسنیو کارکوونکي له جدي ګواښونو، نیونې، شکنجې او بد چلند سره مخ دي.
اتونبایووا په ځانګړي ډول د ښځینه ژورنالیستانو وضعیت د اندېښنې وړ بللی او ویلي چې دوی له ځانګړو خطرونو او خنډونو سره مخ دي.
نوموړې د رسنیو د خوندي فعالیت لپاره د مناسب چاپېریال رامنځته کولو غوښتنه کړې ده.
