د سپینې ماڼۍ ویاندې کارولین لوویت اعلان وکړ چې متحده ایالات به د چیني توکو پر وارداتي تعرفو کې هېڅ ډول یو اړخیز کمښت ونه کړي.
نوموړې له فاکس نیوز سره خبرو کې ویلي: «د تعرفو د یو اړخیز کمښت پرېکړه نه ده شوې. دا یوه پیاوړې او همغږې پالیسي ده چې د هېواد د ملي ګټو پر بنسټ ولاړه ده.»
دا څرګندونې په داسې حال کې کېږي چې چین پر واشنګټن فشارونه زیات کړي څو د سوداګریزو خبرو پر مهال تعرفې راکمې کړي.
د چین حکومت مخکې له دې، په رسمي ډول د تعرفو د کمولو غوښتنه کړې وه.
د سپینې ماڼۍ چارواکو بیا ټینګار کړی چې تر هغه چې چین خپلې سوداګریزې ژمنې عملي نه کړي، د تعرفو د کمښت هېڅ پلان نه لري.
چین هم په غبرګون کې پر امریکايي توکو تعرفې لوړ کړې دي.
