د افغانستان په اړه د «مسکو فارمټ» اتمه مشورتي غونډه نن د اکټوبر په ۵مه، د روسیې په پلازمېنه مسکو کې پیل شوه.
په دې غونډه کې د افغانستان، روسیې، ایران، چین، هند، پاکستان، قزاقستان، قرغیزستان، تاجکستان او ازبکستان ځانګړي استازي او لوړپوړي چارواکي ګډون کوي.
بلاروس او مصر هم د مېلمنو په توګه غونډې ته بلل شوي دي.
د طالبانو حکومت د بهرنیو چارو وزیر امیرخان متقي په مشرۍ یوه پلاوی هم په غونډه کې ګډون کوي.
ټاکل شوې متقي د افغانستان د روان وضعیت په اړه خبرې وکړي او د غونډې په څنډه کې د روسیې د بهرنیو چارو له وزیر سرګي لاوروف سره هم وګوري. لاوروف د غونډې له پیلېدو مخکې له متقي سره لیدلي دي.
د غونډې په اجنډا کې له افغانستان سره د سیمې د هېوادونو سیاسي او اقتصادي همکارۍ، د ترهګرۍ او نشهیي توکو پر وړاندې مبارزه او سیمهییز امنیت شامل دي.
د افغانستان او پاکستان ترمنځ وروستي کړکېچونه هم د بحث له مهمو موضوعاتو بلل شوي دي.
تمه ده چې د غونډې په پای کې د ګډونوالو له لوري ګډه خبرپاڼه هم خپره شي.
دا غونډه یو ځل بیا داسې مهال ترسره کیږي چې له روسیې پرته د طالبانو حکومت لا هم د سیمې هېوادونه په رسمیت نه پېژني خو ډیپلوماتیکې اړیکې او تعاملات یې ورسره دوامداره ساتلي دي.
