پخواني ولسمشر حامد کرزي په کنړ او هلمند ولایتونو کې د ملکي وګړو پر کورونو د پاکستان هوايي بریدونه په کلکو ټکو غندلي او دا یې د افغانستان پر حریم تېری او د هېواد د ملي حاکمیت نقض بللی دی.
کرزي ویلي، په دغو بریدونو کې د ښځو او ماشومانو په ګډون یو شمېر افغانان وژل شوي او ټپیان شوي دي.
نوموړي له قرباني شویو کورنیو سره خواخوږي څرګنده کړې ده.
هغه ویلي، افغانان به د بهرني تېري پر وړاندې په ګډه له خپل هېواد دفاع کوي او له پاکستاني مشرانو یې غوښتي چې د ښځو او ماشومانو د وژلو پر ځای خپلې «جګړهمارې او دښمنانه» پالیسۍ بیا وارزوي او له افغانستان سره د ښه ګاونډیتوب پر بنسټ تعامل وکړي.
