د پاکستان د خیبر پښتونخوا ایالت په دېره اسماعیل خان ولسوالۍ کې د دارازینډه سیمې د «امان مېله» پر ګډې امنیتي پوستې چاودنه شوې ده.
د ژغورنې ادارې «ریسکیو ۱۱۲۲» په وینا، د چاودېدونکو توکو ډک موټر له پوستې سره تر ټکر وروسته چاودلی، چې له امله یې لږ تر لږه ۱۱ کسان وژل شوي او ۳۰ نور ټپیان دي.
د ریسکیو ډلې وايي، د پېښې له سیمې څخه د وژل شویو کسانو جسدونه را ایستل شوي او ټول ټپیان د درملنې لپاره روغتونونو ته لېږدول شوي دي.
د پېښې په اړه څېړنې روانې دي او امنیتي ځواکونه سیمې ته رسېدلي دي.
