د بحرین د بهرنیو چارو وزیر عبداللطیف بن راشد الزیاني د اکتوبر په ۷مه د دوه ورځني رسمي سفر لپاره اسلاماباد ته ورسېد.
د پاکستان د بهرنیو چارو وزارت وايي، الزیاني به د پاکستان د بهرنیو چارو له وزیر اسحاق ډار سره د پاکستان او بحرین د وزیرانو ګډې کمېټې د درېیمې غونډې مشري وکړي.
د وزارت په وینا، په دې غونډه کې به د دواړو هېوادونو ترمنځ پر سوداګرۍ، پانګونې، اقتصادي همکاریو، دفاع او امنیت، کار او کاري ځواک او کلتوري اړیکو خبرې وشي.
دواړه لوري به د سیمې او نړۍ پر وروستیو پرمختګونو او په نړیوالو بنسټونو کې د ګډې همکارۍ په اړه هم خبرې وکړي.
