د امریکا او ایران ترمنځ د ملګرو ملتونو د عمومي اسمبلۍ پر مهال د احتمالي ډیپلوماتیکو خبرو تمې د تېلو پر بازار اغېز کړی او د خام تېلو بیې لږې لوړې شوې دي.
د رویټرز د راپور له مخې، د برېنټ خامو تېلو د نومبر قرارداد ۲۲ سېنټه لوړ شوی او یو بېرل یې ۱۰۰.۵۷ ډالرو ته رسېدلی دی.
همداراز د امریکا د لویدیځ ټکساس انټرمیډیټ (WTI) د اکتوبر قرارداد چې د پای ته رسېدو په حال کې دی، ۲ سېنټه زیات شوی او یو بېرل یې ۹۵.۸۰ ډالرو ته رسېدلی دی.
د لویدیځ ټکساس انټرمیډیټ د نومبر قرارداد چې ډېرې معاملې پرې کېږي، هم ۱۳ سېنټه لوړ شوی او یو بېرل یې ۹۲.۴۹ ډالرو ته رسېدلی دی.
د بازار څارونکي وايي، پانګهوال د امریکا او ایران ترمنځ د اړیکو او احتمالي خبرو پرمختګونه څاري، ځکه د دواړو هېوادونو ترمنځ هر ډول بدلون د انرژۍ پر نړیوال بازار اغېز کولی شي.
