د طالبانو حکومت تر کنټرول لاندې د افغانستان د سوداګرۍ او پانګونې خونې اجرائیه پلاوي د «سرطان تخصصي خیریه روغتون» د جوړېدو طرحه تصویب کړې ده.
د خونې د معلوماتو له مخې، دغه روغتون به په لومړي پړاو کې د ۱۰۰ بسترو ظرفیت ولري او د سرطان ناروغانو، په ځانګړي ډول بېوزلو او اړمنو کسانو د تشخیص او درملنې لپاره به جوړ شي.
د خونې رئیس سید کریم هاشمي ویلي، د سرطان د درملنې لوړ لګښتونه ګڼې افغان کورنۍ له ستونزو سره مخ کړې دي او دا پروژه د هېوادوالو لپاره یوه بشري او ملي هڅه ده.
د سوداګرۍ او پانګونې خونې اجرائیه پلاوي پرېکړه کړې چې د دې روغتون د جوړېدو لپاره د ځمکې، طبي تجهیزاتو، مالي سرچینو او د مدیریت د څرنګوالي د ارزونې په موخه یوه مسلکي کمېټه جوړه شي.
