د پخواني جمهوري نظام د بهرنیو چارو وزیر حنیف اتمر، په کابل کې د پاکستاني پوځ د بشري جنایت په اړه ویلي دي، چې د بې ګناه روږدو ناروغانو «امید» روغتون پېښه، د ملکي وګړو پر وړاندې یو وحشیانه جنګي عمل دی، چې د ده په وینا د معاصرو جګړو له تر ټولو سختو پېښو څخه ګڼل کېږي.
اتمر په خپله ایکس پاڼه لیکلي، چې د پاکستاني پوځ لخوا پر بې ګناه وګړو برید، هو بهو د اسرائیلي پوځ ته ورته کارکردګي ده او د دوهمې غزې د جوړیدو جنایتکارانه عمل دی.
هغه د پاکستان پوځ ته په اشارې ویلي چې د داسې پېښو عاملان باید د نړیوالو قوانینو له مخې مسؤل وګڼل شي او د عدالت له مخې حساب ورکړي.
نوموړي له نړیوالې جزايي محکمې (ICC) او نورو نړیوالو حقوقي ادارو غوښتي چې د دغې پېښې په اړه بېطرفه څېړنه وکړي او د عاملانو پر ضد دې اقدام ترسره کړي.
اتمر همداراز ټینګار کړی چې د ملکي وګړو پر ضد د هر ډول تاوتریخوالي په وړاندې چوپ پاتې کېدل د عدالت له اصولو سرغړونه ده او نړیواله ټولنه باید د قربانیانو د حقونو د خوندیتوب لپاره جدي دریځ غوره کړي.
