د ماشومانو د ژغورنې نړیوال سازمان Save the Children وايي، په افغانستان کې د پنځو کلونو کم عمره ماشومان د حادې خوارځواکۍ له جدي بحران سره مخ دي او له هرو ۱۰ ماشومانو شاوخوا یو یې په دې وضعیت اخته دی.
دغه سازمان وايي، د نړیوالو مرستو د کمېدو له امله د افغانستان په بېلابېلو سیمو کې روغتیايي خدمتونه هم له جدي ستونزو سره مخ شوي او نږدې ۶۰۰ روغتیايي مرکزونه تړل شوي یا یې فعالیتونه ځنډول شوي دي.
د ماشومانو د ژغورنې نړیوال سازمان خبرداری ورکوي چې د روغتیايي او تغذیې خدمتونو د تمویل کمښت د هغو ماشومانو ژوند ګواښي چې د خوارځواکۍ درملنې ته اړتیا لري.
د دغه سازمان په وینا، د افغانستان په شمال کې ځینې روغتیايي مرکزونه د لسګونو زرو خلکو لپاره د روغتیايي خدمتونو یوازنۍ سرچینه ده خو د مرستو د کمېدو له امله د دغو مرکزونو د راتلونکي په اړه هم اندېښنې زیاتې شوې دي.
د ماشومانو د ژغورنې نړیوال سازمان یا Save the Children له نړیوالې ټولنې غوښتي چې د افغانستان د روغتیايي او تغذیې خدمتونو د دوام لپاره بېړنۍ مرستې زیاتې کړي.
