د کرکټ نړیوالې شورا پرون د جون له ۲۱مې تر ۲۸مې نېټې د ښځو د کرکټ نړیوالې اوونۍ په نوم نومولې.
آیسيسي ویلي، د دې نوښت موخه دا ده چې په ټوله نړۍ کې د ښځو کرکټ ته وده ورکړل شي، د ښځینه لوبغاړو لاسته راوړنې وستایل شي او لا زیاتې نجونې کرکټ ته وهڅول شي.
د سږ کال د نمانځنې په لړ کې د نړۍ په نږدې ۶۰ هېوادونو کې بېلابېل فعالیتونه ترسره کیږي.
استرالیا، پاکستان او سریلانکا د هغو هېوادونو له ډلې دي چې د ښځو د کرکټ د ودې لپاره یې ځانګړي پروګرامونه اعلان کړي دي. په پاکستان کې به له ۱۵۰ زیاتې د پوهنتون زده کړیالانې او له ۱۰۰ ډېر د ۱۹ کلونو کم عمره لوبغاړې په روزنیزو او کرکټ فعالیتونو کې برخه واخلي.
د ښځو د کرکټ نړیواله اوونۍ لومړی ځل په ۲۰۲۵ کال کې د اکتوبر له ۱۶مې تر ۲۲مې پورې د ښځو د یو ورځني نړیوال جام پر مهال ترسره شوې وه. د ICC په وینا، د لومړۍ دورې بریالیتوب د دې لامل شو چې سږکال هم دا نوښت هم تکرار شي.
