د امریکا جمهوري غوښتونکي سناتور لینډسي ګراهام په تل‌ابیب کې د ایران د وضعیت په اړه ویلي چې اوس د تهران په اړه دوه لارې شته چې یوه دیپلوماتیکه او بله نظامي لاره ده.

ګراهام ویل: «یو لوری دیپلوماتیک دی چې د دې حکومت د ختمېدو لپاره د امنیتي ګټو په پام کې نیولو سره کار وکړي، او بل لوری نظامي انتخاب دی.»

هغه زیاته کړې چې د ایران حکومت او مشر یې، آیت‌الله، د ۱۳۵۷ کال راهیسې په خپل کمزوري حالت کې دي، اقتصاد یې ګډوډ شوی، پوځ یې کمزوری شوی او خلک په کوڅو کې اعتراضونه کوي.

هغه همدارنګه ویلي چې د حکومت د بدلیدو امکان شته او که څه هم خطرونه شته، حاضر دی دا ریسک ومني.

ګراهام ټینګار کړی چې د ایران خلک کولی شي د امریکا، اسراییل او سیمه‌ییزو هېوادونو لپاره لوی متحد وي.

راپورونه وایي چې تېره ورځ د باجوړ د امنیتي پوستې برید کې لږ تر لږه ۱۳ کسان وژل شوي، چې په کې ملکي وګړي هم شامل دي.

د راپورونو په خبره، په دې برید کې ۱۱ امنیتي سرتېري او دوه تنه ملکیان وژل شوي.

د راپورونو په وینا، په وژل شویو کسانو کې یو شپږ کلن ماشوم هم شامل دی.

دې برید کې ۷ تنه نور ټپیان شوي هم دي چې د روغتیایي وضعیت په اړه یې څه نه دي ویل شوي.

ویل کېږي چې د ژغورنې عملیات پای ته رسېدلي، او د مدرسې ودانۍ د پاکولو او امنیتي تصفیه کېدو لاندې ده.

د امریکا ولسمشر ډونالډ ټرمپ ویلي چې په جینوا کې د امریکا او ایران ترمنځ روانو خبرو کې به په نامستقیم ډول ښکېل وي.

ټرمپ له رسنیو سره په خبرو کې ټینګار کړی چې واشنګټن هڅه کوي له تهران سره یوې هوکړې ته ورسېږي او زیاته کړې یې ده چې ایران به هم د احتمالي پایلو په پام کې نیولو سره د هوکړې لور ته مایل شي.

هغه د هوکړې جزییات نه دي څرګند کړي، خو ویلي یې دي چې دی به د خبرو بهیر له نږدې تعقیب کړي.

دا څرګندونې وروسته له هغې شوې چې د ایران د بهرنیو چارو وزیر عباس عراقچي د یادو خبرو لپاره جینوا ته رسېدلی.

تر اوسه د دواړو لورو له خوا د رسمي اجنډا او د احتمالي هوکړې د څرنګوالي په اړه بشپړ معلومات نه دي خپاره شوي.

د متحده عربي امارات ولسمشر محمد بن زید النهیان له مغزي شریان یا دماغي سکتې ناروغۍ سره مخ دی.

د رسنیو راپورونه وایې تر دې دمه رسمي سرچینو ددې ناروغۍ په اړه جزییات نه دي خپاره کړي.

په همدې حال کې، د ترکیې د ولسمشر رجب طیب اردوغان او د یونان د لومړي وزیر کیریاکوس میتسوتاکیس سفرونه متحده عربي اماراتو ته د روغتیايي ستونزو په خاطر لغوه شوي دي.

د متحده عربي اماراتو چارواکو
خپل هیواد د ولسمشر د روغتیا په اړه رسمي بیان نه دی ورکړی.

د افغان سولې لپاره د امریکا پخواني ځانګړي استازي زلمي خلیل‌زاد د ټولنیزې شبکې اېکس له لارې د افغانستان د کرېکټ ملي لوبډلې لوبډلمشر راشد خان ته د نوي نړۍوال ریکارډ مبارکي ویلې ده.

راشد خان تېره ورځ په روان نړیوال شل اوریز جام کې د متحده عربي امارات پر وړاندې لوبه کې خپلې ۷۰۰ وېکټې پوره کړې او د کرېکټ په ډګر کې یې بله تاریخي لاسته راوړنه ثبت کړه.

راشدخان ته د دغه ریکارډ مبارکي ګڼو نړیوالو لوبغاړو او سیاستوالو ورکړې ده.

د پاکستان د پخواني لومړي وزیر عمران خان زامنو ویلي چې د خپل پلار د روغتیايي وضعیت په اړه سخت اندېښمن دي او ادعا کوي چې پاکستان ورته د سفر ویزې نه ورکوي.

د راپورونو له مخې، قاسم او سلیمان خان چې په لندن کې مېشت دي، غواړي پاکستان ته ولاړ شي او له خپل پلار سره وویني، خو د ویزو غوښتنې یې لا نه دي منل شوې.

دوی وایي عمران خان په بند کې د سترګو له جدي ناروغۍ کړېږي او مناسبې درملنې ته اړتیا لري.

پاکستاني چارواکو بیا دغه تورونه رد کړي او ټینګار یې کړی چې د نوموړي طبي معاینات او درملنه روانه ده او اړوند معلومات محکمې ته سپارل شوي دي.

د پنجاب اعلی وزیره مریم نواز وایي، د خیبرپښتونخوا اوسېدونکي لا هم له عصري اسانتیاوو بې‌برخې دي او ایالتي حکومت د ټکنالوژۍ او پرمختګ لپاره کافي کار نه دی کړی.

هغې دغه څرګندونې د ګجرات پوهنتون په یوه غونډه کې وکړې او ویې ویل چې په پنجاب کې زده‌کوونکو ته د هون‌هار بورسونو، لپ‌ټاپونو او فني زده‌کړو پراخ پروګرامونه برابر شوي؛ خو په وینا یې، په خیبرپښتونخوا کې ورته اسانتیاوې نشته.

نوموړې په غیرمستقیم ډول د پاکستان تحریک انصاف د واکمنۍ دورې ته هم اشاره وکړه او زیاته یې کړه چې هلته د عملي پرمختګ پر ځای زیاتره شعاري سیاست شوی دی.

مریم نواز دا هم وویل چې د لارو بندول او اعتراضونه، چې د زنداني پخواني لومړي وزیر عمران خان د خوشې کېدو لپاره روان دي، د خیبرپښتونخوا پر اقتصاد منفي اغېز کوي.

د خیبر پښتونخوا د باجوړ په ماموند تحصیل، ملنګي سیمه کې پر مدرسه د شوي ځانمرګي برید په تړاو، ځایي چارواکو تازه معلومات ورکړي دي.

د رسمي سرچینو له مخې، تر دې دمه د ۷ تنو پولیسو او فرنټیر کور (FC) هغه مړي له کنډوالو راایستل شوي چې په برید کې وژل شوي وو.

د ژغورنې عملیات لا هم دوام لري او امکان شته چې د مړو او ټپیانو شمېر نور هم لوړ شي.

د خیبر پښتونخوا د باجوړ په ماموند تحصیل ، ملنګي سیمه کې د یوې دیني مدرسې دننه زوروره چاودنه شوې چې له امله یې ودانۍ په بشپړه توګه نړېدلې ده.

د سیمه‌ییزو امنیتي سرچینو د معلوماتو له مخې، دا برید د موټر بم ځانمرګي برید په وسیله ترسره شوی.

چارواکي وایي، یاده مدرسه پخوا د پاکستاني طالبانو د اړوندو ډلو د پټنځای په توګه کارېده، خو دا مهال د امنیتي ځواکونو او پولیسو تر کنټرول لاندې وه.

د چاودنې د شدت له امله د نږدې کور یو ماشوم وژل شوی او درې کسان سخت ټپیان شوي دي.

تر دې دمه په یاده مدرسه کې د موټر بمب برید له امله د وژل شویو کسانو جسدونه نه دي راویستل شوي او پولیس ترې په لیرې واټن کې قرار لري.

په یاد برید کې د مرګ ژوبلې د زیاتېدو وېره شته.

د امریکا د بهرنیو چارو وزارت په افغانستان کې د طالبانو حکومت له لوري د امریکایي وګړو د نیولو په اړه سخت غبرګون ښودلی او غوښتنه یې کړې چې ټول بندیان باید بې له ځنډه خوشې شي.

د وزارت یوه ویاند ټامي بروس ویلي، واشنګټن دا موضوع په مستقیم ډول د طالبانو له حکومت سره شریکه کړې او ټینګار یې کړی چې له هغوی سره د هر ډول رغنده اړیکو لومړی شرط د ټولو امریکایانو ازادول دي.

امریکا د طالبانو له حکومت غوښتي چې د «یرغمل نیونې ډیپلوماسي» پای ته ورسوي.

په همدې حال کې د سپینې ماڼۍ د ملي امنیت شورا د ترهګرۍ ضد رئیس سبسشین ګروکا ویلي، ډونالډ ټرمپ په دې موضوع جدي دی او که پاتې امریکایان خوشې نه شي، د طالبانو حکومت ته به بدې پایلې ولري.

هغه په ځانګړي ډول د ډنیس کویل او محمود شاه حبیبي د ازادۍ غوښتنه کړې ده.

واشنګټن خپلو اتباعو ته هم خبرداری ورکړی چې افغانستان ته دې سفر نه کوي، او ټینګار یې کړی چې تر هغې به ارام نه شي څو ټول امریکایان خپلو کورونو ته ستانه شوي نه وي.