د ایران د بهرنیو چارو وزیر عباس عراقچي د فرانسوي سیال سره په ټیلیفوني خبرو کې د امریکا د وروستیو ګواښونو په اړه سخت غبرګون ښودلی دی.
عراقچي ویلي، هغه ګواښونه چې د امریکا له لوري د ایران پر زیربناوو د بریدونو په تړاو مطرح شوي، د جګړې د جرم او نسلوژنې عادي کول دي.
نوموړي ټینګار کړی، که دا ګواښونه عملي شي، نو ایران به قاطع او سخت ځواب ورکړي.
وړاندې د امریکا ولسمشر ډونالډ ټرمپ ویلي و، که ایران تر دوشنبې هوکړه ونکړي پر پلونو او زیربناوو د بریدونو سربیره به یې پر یورانیو د تسلط هڅه هم وکړو.
د ایران د بهرنیو چارو وزارت ویاند اسماعیل بقایی، د امریکا د ۱۵ مادېیز وړاندیز د جګړې د پای لپاره غیرعادي او غیرمنطقي وبلل.
نوموړي وویل، تهران خپلې غوښتنې بشپړې کړي، خو د اعلان مناسب وخت به خپله ټاکي.
بقایی ټینګار وکړ چې ایران د هیڅ فشار او ضربالاجل پرواګیر نه دی او د دې پلان ژر ځواب ورکول باید د تسلیمۍ په معنا ونه ګڼل شي.
هغه څرګنده کړه چې د منځګړیو له لارې خبرې د ضعف نښه نه ده او ایران چمتو دی هر وخت خپل موقف روښانه اعلان کړي.
د اوزبیکستان د بهرنیو چارو وزارت مرستیال بابر عثمانوف د طالبانو حکومت د بهرنیو چارو وزیر امیرخان متقي سره لیدنه کړې ده.
دا لیدنه د افغانستان او منځنۍ آسیا د مشورتي خبرو اترو د لومړۍ ناستې په څنډه کې ترسره شوې، چې دواړو لورو پکې د دوه اړخیزو اړیکو د پیاوړتیا، شته فرصتونو او د سیمې پر روان وضعیت خبرې او د نظر تبادله کړې ده.
په دې کتنه کې، امیرخان متقي د اوزبیکستان له پلاوي مننه کړې او ټینګار یې کړی چې د مشورتي ناستې پر مهال د وړاندې شوو نظریاتو او وړاندیزونو پر بنسټ باید راتلونکي ګامونه په ګډه همغږي شي.
هغه د دواړو هېوادونو ترمنځ د اړیکو پرمختګ مثبت بللی او د لا زیاتې همکارۍ غوښتنه یې کړې ده.
بل لور ته، بابر عثمانوف د دې سیمهییز نوښت ملاتړ کړی او د کابل او تاشکند ترمنځ د وروستیو پرمختګونو یادونه کړې او ټینګار یې کړی چې دواړه هېوادونه باید خپلې اړیکې نورې هم پراخې کړي.
د اسراییلو لومړي وزیر بنیامین نتنیاهو اعلان کړی چې د ایران د سپاه پاسداران د استخباراتو رییس مجید خادمي یې په یو ځانګړي عملیات کې وژلی دی.
نتنیاهو په خپل پیغام کې زیاته کړې چې د قدس ځواک اړوند د ۸۴۰م واحد قوماندان، چې د نړۍ په کچه د اسراییلو او یهودي وګړو پر وړاندې د بریدونو مسوول ګڼل کېده، هم له منځه وړل شوی دی.
هغه ټینګار کړی چې اسراییل به د خپلو اتباعو پر وړاندې هر ډول ګواښ ته سخت ځواب ورکړي، او ویلي یې دي چې «هر څوک چې د اسراییلو پر ضد ترهګري رهبري کړي، پایله به یې مرګ وي.»
د امریکا له ټاکلي ضربالاجل سره هممهاله، د ایران او امریکا ترمنځ د روان کړکېچ د پای ته رسولو لپاره یو نوی چوکاټ وړاندې شوی؛ خو تهران د هرمز تنگي د سمدستي پرانیستلو غوښتنه نه ده منلې.
د راپورونو له مخې، دا وړاندیز چې د پاکستان په منځګړیتوب جوړ شوی، په کې سمدستي اوربند او له ۱۵ تر ۲۰ ورځو پورې د خبرو اترو پړاو شامل دی، څو د اوږدمهاله حل لپاره زمینه برابره شي.
خو ایراني چارواکو ویلي چې دوی له ضربالاجلونو سره موافق نه دي او باور لري چې واشنګټن لا هم د یوه دوامدار او واقعي سولې لپاره چمتووالی نه لري.
بل لور ته، رویټرز د خپلو سرچینو له قوله راپور ورکړی چې د تهران او واشنګټن ترمنځ د ۴۵ ورځني اوربند په اړه خبرې لا هم روانې دي او هڅې دوام لري چې د جګړې د پراخېدو مخه ونیول شي.
د اسراییلو د دفاع وزیر یسرائیل کاتز ادعا کړې چې د دغه هېواد ځواکونو په تهران کې د ایران د سپاه پاسداران د استخباراتي سازمان یو لوړپوړی چارواکی له منځه وړی دی.
کاتز ویلي، په دې عملیاتو کې مجید خادمي، چې د سپاه پاسداران د استخباراتي جوړښت له مهمو څېرو او د درېیو ارشد مسؤلینو له ډلې څخه و، په نښه او «خنثی» کړل شو.
د هغه په وینا، خادمي د جګړهییزو “جنایتونو” له مستقیمو مسؤلینو څخه ګڼل کېده.
د ایران د بهرنیو چارو وزارت ویاند اسماعیل بقایي وایي، هغه ځای چې امریکایي الوتکو د اصفهان په سوېل کې ناسته کړې، له هغه ځای سره چې مخکې ادعا شوې وه، توپیر لري او دا احتمال شته چې دغه عملیات د «فریب» په موخه ترسره شوي وي.
بقایي ویلي، ښايي د دغو تحرکاتو تر شا د یورانیومو د انتقال هدف موجود وي.
نوموړي همداراز د سیمې د وروستیو کړکېچونو په اړه خبرداری ورکړ او ټینګار یې وکړ چې ایران به د هر ډول ګواښ پر وړاندې کلک دریځ خپل کړي.
د ایران د سپاه پاسداران د اطلاعاتو د سازمان مشر، مجید خادمی، د امریکا او اسرائیل په ګډو بریدونو کې وژل شوی دی.
د ایران تسنیم خبري اژانس د هغه د وژل کېدو خبر تایید کړی او ویلي یې دي چې نوموړی د “شهادت” لوړ مقام ته رسېدلی دی.
مجید خادمي د سپاه پاسداران د اطلاعاتي جوړښت له مهمو کلیدي څېرو څخه ګڼل کېده او د امنیتي او استخباراتي چارو په رهبرۍ کې یې مهم رول درلود.
د رویټرز د راپور له مخې، د ایران او امریکا ترمنځ د روان کړکېچ د پای ته رسولو لپاره یوه دوهپړاویزه طرحه وړاندې شوې چې پکې لومړی سمدستي اوربند او ورپسې دایمي هوکړه شامله ده.
د رویټرز د باخبره سرچینو په حواله، دا طرحه د دې احتمال برابروي چې تهران به له اټومي وسلو تېر شي او په بدل کې به پرې نړیوال بندیزونه کم او کنګل شوې شتمنۍ به یې ازادې شي.
سرچینې زیاتوي، که دا وړاندیز ومنل شي، نه یوازې به جګړه سمدستي ودرېږي، بلکې د هرمز تنګي مهمه سمندري لار به هم بېرته پرانیستل شي.
په ورته مهال، راپورونه ښيي چې د پاکستان د پوځ قومندان د منځګړیتوب هڅو په ترڅ کې له لوړپوړو امریکايي او ایراني چارواکو سره جلا جلا اړیکې نیولې دي، چې پکې د امریکا مرستیال ولسمشر جی ډي وانس، ځانګړی استازی سټیو ویتکاف او د ایران د بهرنیو چارو وزیر عباس عراقچي شامل دي.
د طالبانو حکومت مرستیال ویاند حمدالله فطرت ویلي چې د راستنېدونکو افغانانو لپاره په زابل، سمنګان، کندز او سرپل ولایتونو کې د دایمي استوګنې لپاره ځمکې وېش شوې دي.
حمدالله فطرت ویلي چې تر اوسه پورې د ۸۲۶۵ څخه زیاتو کورنیو لپاره ځمکې وېشل شوي او د ځمکو وېش به په راتلونکې کې هم دوام ولري.
د هغه په وینا، دغه اقدام د راستنېدونکو کورنیو د اسانتیا او دایمي استوګنې د برابرولو لپاره ترسره شوی، څو هغوی وکولای شي په خپلو سیمو کې باثباته ژوند پیل کړي.