د ترکیې پولیسو د ۴۳ افغانانو په شمول ۱۴۸ کډوال نیولي دي.

ترکیي رسنیو ویلي، چې یاد کډوال له دغه هېواد څخه د غیر قانوني کډوالو د اېستلو لپاره ترسره شویو عملیاتو کې نیول شوي.

په دغو کسانو کې درې انساني قاچاق کوونکي هم شامل دي.

دا کسان د سنبلې له ۱۲مې تر اتلسمې پورې په اتو بېلابېلو عملیاتو کې نیول شوي دي.

دا په داسې حال کې ده چې وړمه ورځ د ملګرو ملتونو د کډوالو سازمان راپور ورکړی وو چې د اګست میاشتې له ۲۵ مې تر ۳۱ مې پورې ۶۳ زره افغانان خپل هېواد ته را ستانه شوي او ۹۶ زره نور ترې وتلي دي.

لیکوال: افغان سیاستوال او پخوانی والي محمد حلیم فدایي

‎تازه دانګلستان او اروپا په ګډون په بهر کې د افغان سفارتونو تړل د ۲۰۲۱ کال د اګست په میاشت کې د طالبانو له واک ته رسیدو وروسته د افغانستان په سیاسي وضعیت پورې تړلي څو مهم عوامل دي:

د طالبانو عدم مشروعیت او عدم رسمیت:
‎ وروسته له هغه چې طالبانو د افغانستان واک تر لاسه کړ، د برتانیا او اروپايي هېوادونو په ګډون ټوله نړۍ طالبان د مشروع حکومت په توګه په رسمیت نه پېژني. په بهر کې د افغانستان په سفارتونو کې معمولاً داسلامي جمهوریت د چارواکو له خوا کار کاوه. د جمهوریت په نسکوریدو سره د دغو سفارتونو حیثیت ناڅرګند شو.

ډېپلوماتانو او طالبانو ترمنځ عدم تعامل:
‎ د افغانستان د اسلامي جمهوریت لخوا ټاکل شوي ډیری افغان دیپلوماتانو د طالبانو د رژیم له استازیتوب څخه ډډه وکړه. دا په کابل کې د طالبانو د حکومت او په بهر کې د افغان ډیپلوماتیکو ماموریتونو ترمنځ د کړکیچ لامل شو، چې د دوی د فعالیت وړتیا یې اغیزمنه کړه.

مالي او عملیاتي ننګونې:
‎ په بهر کې د افغانستان سفارتونه دجمهوریت له نسکورېدو وروسته له مالي ستونزو سره مخ شول. د طالبانو رژیم د افغانستان بهرنیو شتمنیو ته د لاسرسي لپاره مبارزه کوله، چې په لویه کچه د لویدیځو حکومتونو لخوا کنګل شوي وو. د تمویل او مالي منابعو پرته، ډیری سفارتونه نشي کولی خپلو فعالیتونو ته دوام ورکړي.

د طالبانو له لورې د ډېپلوماتانو برطرفي:
‎ طالبانو هڅه وکړه چې جمهوریت ته وفادار ډیپلوماټانو پر ځای خپل کسان وګماري. په هرصورت، ډیری کوربه هیوادونو د طالبانو لخوا ګمارل شوي ډیپلوماتانو ته د اعتبار ورکولو څخه انکار وکړ، چې د نورو ډیپلوماتیکو ناکامیو او بالاخره د ډیری افغان سفارتونو د تړلو لامل شو.

بشري او سیاسي ملاحظات:
‎ کوربه هیوادونه لکه انګلستان او اروپایي هیوادونه هم د طالبانو تر کنټرول لاندې سفارتونو ته د دوی په خاوره کې د فعالیت اجازه ورکولو په اړه اندیښمن دي. په دغو پریکړو کې د بشري حقونو په ځانګړې توګه د نجونو تعلیم او د ښځو د حقونو مسالې مهم رول درلود.

د طالبانو تاریخ او له ترهګرو ډلو سره اړېکي:
‎ طالبان په تاریخي ډول له افراطي ډلو لکه القاعدې او داعش سره اړیکې لرلې. که څه هم طالبانو ژمنه کړې چې اجازه به ورنکړي چې افغانستان د تروریستي فعالیتونو د اډې په توګه وکارول شي، خو ډیری هیوادونه د دې ډاډ په اړه شکمن دي. داسې انديښنې شته چې ښايي دغه هېواد يو ځل بيا د تروريستي سازمانونو په پټنځاى بدل شي چې په بهر کې له ډيپلوماټيکو مرکزونو څخه د ناوړه موخو لپاره کار اخلي. له القاعدې سره یې اړېکې ډېرې ثابتې اما له نورو ترهګرو ډلو سره د پراخېدو په حال کې دي.

‎اسلامي دولت – خراسان ولایت چې د لویدیځ او اوس دطالبانو دواړو مخالفه ډله ده، د ترهګرۍ په اړه اندېښنې زیاتې کړي دي. د دې ډلې توان چې په افغانستان کې بریدونه ترسره کړي او په بالقوه توګه په بهر کې خپل نفوذ پراخ کړي، د نړیوالې ټولنې لپاره د اندیښنې وړ ده. خصوصا داعش ډله هم د طالبانو په پیروي په خپلو عملیاتو کې له ځانمرګو برېدونو استفاده کوي.

د افراطیت زیاتوالی:
واک ته د طالبانو راتګ، د افراطي ډلو او افرادو لپاره د پټنځای په توګه د افغانستان بدلېدل، د نړیوال افراطیت د خپریدو په اړه ویره راپورته کړې. د افغانستان سفارتونه که چېرې طالبانو ته و سپارل شي د سخت دریځو عناصرو لپاره هدف ګرځیدلی شي یا حتی د سخت دریځو ډلو لخوا کارول کیدی شي.

د غیر قانوني فعالیتونو لپاره د ډېپلوماتیک پوښښ په توګه کارول:
داسې اندیښنې شتون لري چې د طالبانو تر کنټرول لاندې ډیپلوماټیک ماموریتونه د غیرقانوني حتی تروریستي فعالیتونو لپاره د محاذ په توګه کارول کیدی شي، یا د افراطي افرادو او ډلو حرکتونو ته اسانتیاوې برابرولای شي. د طالبانو په رژیم باندې د باور نشتوالي ته په پام سره، کوربه هیوادونه ممکن د دې احتمال په اړه محتاط وي چې له سفارتونو څخه په داسې لارو ناوړه ګټه پورته شي چې ددوی امنیت تهدیدوي. دلته ددې هم امکان شته چې هغه سیاسي مخالفین چې بهر کې مېشت دي له همدې ډیپلوماټیک پوشش څخه په استفادې هم هدف وګرځوي.

پراخې امنیتي اندېښنې:
ډیری هیوادونه ویره لري چې په افغانستان کې بې ثباتي د پراخې سیمه ایزې بې ثباتۍ لامل کیدی شي چې په غیر مستقیم ډول په نړیوال امنیت اغیزه کولی شي. د کډوالو راتګ، د مخدره موادو قاچاق او د وسلو خپرېدل هغه نورې اندېښنې دي چې په افغانستان کې له امنیتي وضعیت سره تړلې دي. ډیپلوماتیک ماموریتونه کولی شي د دې مسلو د اداره کولو لپاره مرکزي ټکي شي.

د کوربه هېوادونو دخپل امنیت ارزونه:
د انګلستان او اروپايي هیوادونو په څیر هیوادونه په منظمه توګه خپل امنیتي چاپیریال ارزوي. د طالبانو د حکومتوالۍ په اړه ناڅرګندتیا، له سخت دریځو ډلو سره د هغوی اړیکې او پراخ جیو پولیټیکل خطرونو احتمالاً د افغان سفارتونو د تړلو یا د هغوی د عملیاتو د محدودولو پر پرېکړو اغېز کړی وي.

‎په لنډه توګه، په داسې حال کې چې په بهر کې د افغانستان د سفارتونو د تړلو اصلي لامل ډیپلوماټیک او مالي مسایل دي، د بشري حقونو څخه سرغړونه، جنستي اپارتاید، د تروریزم، افراطیت او له افغانستان څخه د پراخو امنیتي ګواښونو په اړه اندیښنې هم په دې پریکړو کې مهم رول لوبوي. خصوصا په درې کالونو هغه فرضیه چې طالبان اصلاح شوې دي، نه یوازې ناسمه ثابته شوه بلکې لا افراطي او لا بدتر شوي دي.

یادونه: حماسه میډیا د یوې بې پرې رسنۍ په توګه د ټولو سیاستوالو ، لیکوالو او نظر خاوندانو لیکنو او نظریاتو ته درناوی لري، دا لیکنه د حماسه میډیا نظر نه څرګندوي بلکې د لیکوال نظر دی او مونږ یې کټ مټ دلته خپروو.

د افغانستان لپاره د امریکا سفارت مرستیال ډن براوون وایي، دوی به هیڅ وخت د افغان نجونو لپاره د زده کړو حقونو له غوښتنو لاس وانخلي.

ډن براوون ویلي، افغانستان کې له شپږم ټولګي پورته ۱.۴ میلیونه نجونې له زده کړو بې برخې دي.

هغه یو وار بیا افغان ماشومانو ته د امریکا تحصیلي بورسو له ورکړې ډاډ ورکړی.

دا په داسې حال کې ده چې له درې کالو زیاته موده کېږي چې افغانستان کې له شپږم ټولګي پورته ښوونځي تړلي.

د امریکا د بهرنیو چارو وزارت یو وار بیا له افغانستآن څخه د امریکایي ځواکونو د وتلو له پرېکړې دفاع کړې.

یاد وزارت په یوه خبرپاڼه کې د امریکا د استازو جرګې د بهرنیو اړیکو کمېټې وروستی راپور رد کړی دی.

دوی ویلي، امریکا ته د تر ټولو اوږدې جګړې پای ته رسول اسان کار نه وو.

یاد وزارت زیاته کړې چې د امریکا لپاره د دغې جګړې پای ته رسول اړین وو.

د یادونې ده چې د امریکا د استازو جرګې د بهرنیو اړیکو کمېټې په خپل راپور کې له افغانستان څخه د امریکایي ځواکونو د اېستلو پر بهیر تونده نیوکه کړې.

ناروې کې د افغانستان سفارت وایي، چې د سپټمبر په ۱۲مه به خپل فعالیتونه وتړي.

یاد سفارت ویلي، د ناروې هېواد په اروپایي هېوادونو کې د سفارتونو او قونسلګریو لپاره د طالبانو حکومت پرېکړه یوه حقوقي لانجه بللې او ویلي یې دي چې دغه پرېکړه د اجرا وړ ده.

له سفارت څخه تېره شپه ناوخته په خپره شوې خبرپاڼه کې راغلي چې دا ودانۍ به د دغه هېواد د بهرنیو چارو وزارت ته وسپاري.

اروپايي ټولنې د طالبانو حکومت د امرباالمعروف د قانون په اړه ویلي، چې دوی نشي کولای نور دغه ډول وضعیت تحمیل کړي.

یادې ټولنې زیاته کړې، دا قانون د نجونو او ښځو د لا ضعیفه کېدو په معنی دی.

دغې ټولنې زیاته کړې، چې دوی په افغانستان او ټولو هغو ځایونو کې چې بشري حقونه تر پښو لاندې کېږي، کار کوي.

دوی دغه راز افغانستان کې د ملګرو ملتونو د ځانګړي راپور ورکوونکي ریچارډ بنټ د ماموریت مودې غځولو غوښتنه هم کړې.

د خیبر پښتونخوا په جنوبي وزیرستان کې پر پاکستاني پوځیانو ریموټ کنټرول ماین چاودنه کړې چې شپږ تنه یې ټپیان کړي دي.

دا چاودنه د “واڼه رستم” سیمه کې شوې، چې څلور ملکیان هم پکې ټپیان دي.

تر اوسه چا د دغې پېښې مسؤلیت نه دی منلی.

بل لورته مسؤلین وایي چې د پېښې عاملینو د نیولو هڅې کوي.

یو شمېر باوري سرچینې وایي، د بدري قطعې پخوانی قومندان عبدالحمید خراساني د طالبانو حکومت په زندان کې له ۱۱ ورځو بند تېرولو وروسته ازاد شوی دی.

د سرچینې د معلوماتو له مخې، نوموړی د صنعت او سوداګرۍ د سرپرست وزیر نورالدین عزیزي او پروان والي قدرت الله امین په ضمانت خوشې شوی.

ویل کېږي چې خراساني د ایران او پاکستان پر وړاندې د خپلو څرګندونو له کبله د تهران په غوښتنه نیول شوی وو.

لیکوال: استاد عبدالغفور لیوال

په روستیو کې خواشیني خبرونه خپاره شول:

• څو میاشتې وړاندې په جرمني کې د یوه افغان په چړو یو جرمنی پولیس ووژل شو او څو تنه نور بد بد ټپیان شول.
• لږ روسته له لندن څخه بد خبرونه راغلل، چې افغانانو تاوتریخوالي ته لاس اچولی.
• بیا په فرانسه کې د افغانانو یو اعتراضي لاریون په تاوتریخوالي واوښت، داکیسې راروانې وې، چې…
• همدا څو ورځې مخکې په پاریس کې د افغان ځوانانو د خپلمنځي اخ و ډب شرموونکې ویډیوګانې لاس په لاس شوې
• بل خبر راغی، چې په جرمني کې د افغانانو په واده کې شخړه پېښه شوه، په چړو یې سره وهل، چې پولیسو یې د خلاصون لپاره اقدام وکړ، په دې شخړه کې پینځه پولیسان ژوبل شول…
  زموږ د تاریخي غمیزې یوه کوشنۍ بېلګه همدا ده، چې هم په پردیو غوسه یو او هم په ځان. خو تاوان تر هر بل چا ځانونو ته ډېر اړوو.
  یوه پایله يې دا وه، چې همدا څو ورځې مخکې د جرمنانو د صبر کاسه ډکه شوه. ۲۸ افغانان یې چې ګواکې مجرمان وو، په الوتکه کې کېنول او مخامخ يې په کابل کې کوز کړل. دا نور هېوادونه هم بحث کوي، چې جرمني ته ورته اقدام وکړي.
  پوهېږم، چې د دې کرښو په لوستو به ګڼ افغانان استدلال کوي، چې جرمي او جنايي پېښې هرځای او د هر چا تر منځ پېښیږي او په دې کې افغانان استثنا نه دي.
  بل استدلال به دا وي، چې افغانان په اوږمهالي کړکېچ کې زېږېدلي او رالوی شوي دي، د دوی روزنه تاوتریخجنه ده او ګواکې په تاوتریخجنو ولسونو کې دا پېښې کېدوني دي.
  بل ډول استدلال هم کیږي: زموږ حکومتونه ملامت وو، د سمې روزنې لپاره یې هڅه نه کوله…
  ځینې به خبره سیاسي کوي، چې دا د پلانیانو یا بستانیانو له لاسه.
  خو دا یو استدلال هم موږ له هغې ملامتۍ ایستلای نه شي، چې باید په خپل حال مو فکرکولو ته مجبور کړي او د ټولیزې اصلاح لپاره ګډه ټولیزه حللاره و هڅه وپلټو. د هغه او دغه په ملامتولو او ښکنځلو هېڅ ستونزه حل کېدلای نه‌شي، بلکې لا پسې ژوره و پېچلې کیږي.
  ټولنه له انسانانو رغېدلې، انسانان په کورنیو کې رالوییږي. کورنۍ – په تېره بیا په ختیزو ټولنو کې – د روزنې لومړنۍ زانګو ده. د ملي هویت او پېژاند زیانمنولو په وړاندې زموږ کورنۍ، زموږ ټولنیز ژوند چاپېریال او زموږ واکمنۍ ټول مسئولیت لري.
  هغه میندې و پلرونه، چې خپلې ګاڼې، زمکې و کورونه پلوري، پور و وام کوي او د خپلې ډوډۍ پیسې بسپنه کوي، چې یو زوی بهر ته ولیږي. هم یې په وطن کې له بدو پېښو خوندي کړي، هم یې راتلونکې ورروښانه کړي او هم په دې تمه وي، چې هلته به کار وکړي او دوی ته به څه ګټه وټه ولېږي، خو همدا زامن دلته له مستۍ یا ناپوهۍ چړې واروي او د ځانونو، خپلو هېوادوالو یا کوربنو وینې بهوي. کاشکې میندو او پلرونو پرځان د دومره سختیو د زغملو ترڅنګ خپل زلمکیان سم روزلي هم وای او د ترخې خدای پامانۍ پرمهال یې دا هم ورته ویلي وای، چې جګړې مه کوئ، د خپلو کورنیو، وطن او ملت نوم مه‌بدوئ.
  د پاریس پر سړکونو د بدرنګه شخړې بدمعاشان یا د جرمني په واده کې سره لاس په ګریوان خپلوان د خپلو دغو لنډغریو لپاره دلایل نه لري. که تاسو یې وپوښتئ، چې ولې؟ باور لرم چې ځواب درته ویلای نه شي. موږ به یې په نورو د ملامتۍ وراچولو هڅې وکړو، دلایل به راپیدا کړو، خو ځانونه به قانع نه‌کړلای شو.
  زه د جمهوریت په کلونو کې هم په اروپايي و امریکايي ښارونو کې ګرځېدلی یم، اوس هم ډېرو ښارونو ته ځم. د رېلګاډو په تم‌ځایونو، بازارونو، پلورنځیو او عامه ځایونو کې ځينې ډلې ډلې افغان زلمیان ګورم، له ورایه له خپلو بدو جامو پېژندل کیږي. پړانګي (کوماندو) پتلنونه و جمپرونه، پرې رازوړنده لمنې، تیز نیلي یا تک سور کمیس پرتوګ، د ځینو پکولونه پر سر، یا توني کړای شوې ولول غوړې څڼې، د ځینو برګ خیرن دسمالونه په غاړو، پورته کش کړې پایڅې، پس‌قات کرمچونه یا قومانداني بوټونه، لینګي بربنډ او د جونګیو په شان کاواک کاواک تلل، په لوړ غږ خبرې، چیغې، خنداګانې، لاس اچول… یعنې څه؟
  له سختو لارو راتېریږي، هر یو یې ګڼې ترخې خاطرې لري، چې په لاره یې ملګري و عزیزان مړه شوي یا ورک دي، دلته یې د منلو یا قبولۍ کارونه ځنډیږي، کار موندلای نه‌شي، ژورخپګان سره لاس وګریوان دي… دا هرڅه د دوی مجبوریت ګڼلای شو. په دې ټولو کې پردي ملامت دي، خو د دا ډوله جامې اغوستل، بدمعاشي کول، نجونې ځورول او شخړې و چړې وارول دا د چا له لاسه؟ او په دې کې څوک ملامت دي؟
  ځینې یې چې دلته په افراطي بڼه د مستبدې واکمنۍ پلوي او د دوی د سپینولو تبلیغات کوي، کله چې ونیول شي او د کډوالۍ د منلو لپاره ورکړي کیسونه یې ورته راوباسي نو ډېرو يې دا ادعا کړې وي، چې د واکمنې ډلې له ډاره راغلي دي. دلته د کوربه هېواد مسئولین ترې پوښتي: په کېس کې دې راغلې خبرې سمې دي، که دا اوسني تبلیغات دې؟!
  دوی دې پوښتنې ته هېڅ ځواب نه لري.
  هېره دې نه وي، چې د بهرمېشتو افغانانو په اړه تصویر بیخي تک‌تور هم نه‌دی، په ګڼو ښارونو کې افغان ځوانان کارکوي، زیار باسي، زدکړې کوي، ځلیږي، بریاوې لري. ځينې افغانان لوی لوی کاروبارونه لري، په کوربنو هېوادونو کې لوړو دریځونو ته رسېدلي دي، ټولنیزې مرستې کوي، ځوانمرده انسانان هم په کې کم نه دی. د دوی په اړه ښه خبرونه هم شته، خو ډېر نه خپریږي. له بده مرغه تل دا بد او بدناموونکي خبرونه دي، چې د سرې د اور په شان چټک خپریږي او بهرمېشتې افغان ټولنې ته حیثیتي زیان وراړوي.
  عربان، تورکان، دافریقايي هېوادو کډوال، چینایان، هیندیان، د ختیزې اروپا له هېوادو راغلي او په روستیو کې یوکراینیان هم په لویدیزو هېوادونو کې کډوال دي، په دوی کې هم جرمونه پېښيږي، دوی هم بې‌ازاره موسیچې نه دي، خو دوی له افغانانو سره دوه توپیرونه لري: لومړی توپیر یې دا دی، چې په دوی کې کاریګر، په سوداګرۍ بوخت او ګټندوی زیات دي او جرایم له مستۍ کوي، د دیپورت کېدو ویره هم ډېره نه لري، ځکه هېوادونه یې ودان او هوسا دي. دویم توپیر یې دا دی، چې په خپلو منځونو کې سخت سره متحد او متفق دي. د دوی ترمنځ خپلمنځي شخړې اول خو نه پېښيږي، که وي هم دومره شرموونکې نه‌دي لکه زموږ.
  د دوی په شان موږ افغانان د مستۍ او بدمعاشي حق نه لرو، یو خو له یوه ډېر خوار، ویجاړ، جهل وجګړه ځپلي هېواده راغلي یو، بل په موږ هر یوه پورې د یوې کورنۍ ژوند او د امید سترګې ګنډلې دي. دا تظاهر هم ډېر کوو، چې ګواکې وطن مو راباندې ګران دی، مسلمانان یو او خپل ملي هویت ښه پالو، نو که د ځانونو او خپلو کورنیو پروا نه ساتو د افغان او افغانستان د ابرو او حیثیت فکر خو باید وکړو.

تاوان زموږ دی

اول باید دا ومنو، چې د دې کړنو تاوان زموږ دی.

• وژل کیږو، ټپیان کیږو، نیول کیږو، زنداني کېږو او بد ښکارو.
• خپل، د خپلو کورنیو او وطن نوم بدوو، افغان و افغانستان بدناموو او په خپل تاریخ کې بد نوم په میراث پرېږدو.
• لویدیزې ادارې دقیقې دي، هرڅه څاري. ژر غبرګون نه ښيي، خو باید باور ولرو، چې دوی اسناد ټولوي، هرڅه ګوري او بیا پرېکړه کوي، قوانین بدلوي او له خپلو هېوادونو څخه مو شړي، بندیانوي مو، ځوروي مو او د وراړولې بدنامۍ له لاسه نور بیچاره و مجبور افغانان چې راځي نه منل کیږي او په دې توګه د نورو افغان کډوالو په حق کې ظلم کوو.

حللارې

موږ نه ملي حکومت لرو، نه ملي بنسټونه چې زموږ له حقونو دفاع وکړي، له بدمرغیو مو بچ کړي او ښه مو وروزي.
مسئولیت د کورنیو او مخورو افغانانو دی.
ټول هغه پلرونه، میندې، خویندې و وروڼه و خپلوان چې بچي یې لویدیځ ته رالېږلي باید له دوی سره منظم اړیکي وساتي او که شوني وي هره ورځ یا په اونۍ کې څو ځلې له خپلو زلمکیو او ځوانانو سره خبرې وکړي. ویې پوښتي چې څه کوي؟ چېرته ځي؟ ولې ځي؟ له چا سره ګرځي؟ څه ستونزې لري؟ له څه ځوریږي؟ او څه پلانونه لري؟ ان چې ودې پوښتي: څه خوري؟ او څه ډول جامې اغوندي؟ څومره پیسې ګټي او څنګه یې لګوي؟
بهر میشتي افغان بنسټونه (ټولنې، فرهنګي و دیني بنیادونه) دې د امکان تر بریده له زلمیانو سره اړیکي ساتي او هڅه دې کوي چې واړه اختلافونه او دوښمنۍ په دودیزو لاروچارو ورحل کړي، چې لویې شخړې ورڅخه جوړې نه‌شي.
ملي غونډې او فرهنګي پروګرامونه ورته جوړ کړي او هلته له فرهنګي ابزارو کار واخلي او هویتي و ناموسي سرې کرښې ورپه‌ګوته کړي.
بهرمیشتي مخور افغانان، پوهان او ټولنیز شخصیتونه باید په دې اړه جدي بحثونه راپیل کړي، چې د داسې بدو پېښو ریښې او عوامل وپېژندل شي او د مخنیوي لارې چارې یې وموندل شي. همدا مخور شخصیتونه او ټولنې ښايی له کوربنو دولتونو اوبنسټونو سره د منظمو اړیکو او بحثونو په راپیلولو سره د هغوی مرسته وغواړي او د دغو ځوانانو د ستونزو په حل کې مشوره ورکړي.
هغه افغانې و نړیوالې رسنۍ چې غږ یې تر دغو ځوانانو رسیږي، ښايي په دې اړه ځانګړې خپرونې ولري او دغه ځوانان له قوانینو او هغو حقوقي وضعیتونو څخه خبر کړي، چې د داسې تخطیو د تکرار له امله ورسره مخامخ کیږي.
په یوټیوب، ټیک ټاکونو، فیسبوک، X اونورو ټولنیزو جالپاڼو کې بوخت افغانان چې ډېر کتونکي، اورېدونکي او لوستونکي لري، هم په دې برخه کې اغېزناکه ونډه لرلای شي.
د دې ربړې مخنیوی زموږ ټولو ګډ مسئولیت دی. افغانان متل کوي، چې: « غریب خدای کړې، خیرن چا کړې؟»
موږ به جهل‌وجنګ ځپلي یو، خو که خپل ملي هویت او حیثیت په لوی لاس ویجاړوو او زیان وراړوو، په دې کې هیڅوک ملامت نه دي. بل منطق یې دا دی، چې د افغانستان د کړکېچ لاملونه پردي دي، خو د رغون، ژغورنې او بدلون مسئولیت مو یوازې خپل دی، دا ویجاړې بل څوک راجوړولای نه‌شي.

د افغانستان لپاره د ایران ځانګړی استازی حسن کاظمي قمي ايي، د پولې امنیت، د ترهګرۍ مخنیوي او له نشه‌يي توکو سره د مبارزې په برخه کې یې له طالبانو سره خبرې کړي دي.

د ایراني رسنیو د خبر له مخې، نوموړي ویلي، چې له پاکستان او ایران سره یې پر پوله د دېوال پلان د عملي کېدو په حال کې دی.

نوموړی په داسې حال کې دا څرګندونې کوي، چې د طالبانو حکومت وايي، اوس مهال نشه‌يي توکي له ایران څخه افغانستان ته قاچاق کېږي.