په ملګرو ملتونو کې د افغانستان دایمي استازي نصیر احمد فایق د دغه سازمان د عمومي اسامبلې په غونډه کې د افغانستان د وضعیت د هواري لپاره د نړیوالې ټولنې د پرېکنده او متحد اقدام غوښتنه وکړه.

نصیر احمد فایق له هېوادونو هم وغوښتل چې د نړیوالو قوانینو له مخې د افغانستان د جنسیتي توپیر پر وړاندې ودرېږي.

نوموړي دې غونډې ته په خپله وینا کې د افغانستان وضعیت خورا د اندېښنې وړ وباله.

ښاغلي فایق وویل چې د طالبانو تر واک لاندې افغانستان د بشري حقونو او د ټولنیز، اقتصادي او سیاسي وضعیت په برخو کې له ژور بحران سره مخ دی.

فایق همداراز ویلي، چې د طالبانو تعلیمي سیستم د ریښتینې روزنې پر ځای په افراطیت او د طالبانو لپاره د نویو ځواکونو په روزلو تمرکز کوي چې دا به په افغانستان او سیمه کې د لا زیاتې بې ثباتۍ لامل شي.

د امریکا استخبارات وایي، چې روسیه، چین او ایران د امریکا د ولسمشرۍ د انتخاباتو په درشل کې د امریکایانو ترمنځ نقاق ته لمن وهي.

دې چارواکو د نوم نه ښودلو په شرط ویلي، د دې دریو هېوادونو اجنټانو د امریکا له تېرو انتخاباتو څخه زده‌کړه کړې ده.

دوی دغه راز ویلي چې دغه روزل شوي کسان ښه چمتووالی لري چې په را روانو انتخاباتو کې لاسوهنه وکړي.

د دوی په وینا ښايي دا اجنټان د فزیکي ګواښونو او تشدد هڅه وکړي او ډېر امکان شته چې د انتخاباتو په بهیر کې د ناسمو معلوماتو د خپرولو عملیات ترسره کړي.

یادو هېوادونو د امریکا دغه تورونه رد کړي دي.

د امریکا ولسمشر جوبایډن د دغه هېواد ټاکنو ته نوماند ډونالډ ټرمپ دیموکراسي ته ګواښ بللی.

بایډن ویلي، ټرمپ باید له سیاسي پلوه بندي شي.

هغه تور پور کړې، چې نوموړي په نیو همشییر کې د ټاکنیز کمپاین پر مهال پر ډیموکراتانو نامناسبې نیوکې کړې دي.

د بایډن په خبره، ټرمپ غواړي د امریکا د اساسي قانون خوندیتوب له پامه وغورځوي.

د اسرائیل پوځ ویلي، چې د لبنان د حزب الله د وژل شوي مشر حسن نصرالله احتمالي ځای ناستی هاشم صفی الدین لا دمخه د دغه هېواد د پوځ په یوه برید کې وژل شوی دی.

د رویټرز خبري اژانس د راپور له مخې د اسراییلو پوځ ویلي چې هاشم صفی الدین درې اونۍ مخکې د بیروت په جنوبي ښارګوټي کې په یوه برید کې وژل شوی دی.

دا په لبنان کې د حزب الله د مشر احتمالي ځای ناستي هاشم صفي الدین د مړینې لومړنی رسمي تایید دی.

تر دې مخکې اسرایلو ویلي و، چې ښايي نوموړی د بیروت په څنډه کې د خپلو ځواکونو په بریدونو کې وژل شوی وي.

قزاقستان د ترکمنستان-افغانستان-پاکستان-هند د ګازو د نل‌لیکې (ټاپي) په جوړولو کې ګډون ته لېوالتیا ښودلې.

اذرنیوز خبري اژانس د قزاقستان د لومړي وزیر له قوله ویلي چې له ترکمنستان سره مذاکرات روان دي څو د دې پروژې په برخه کې د قزاقستان ممکنه ونډه وارزول شي.

د TAPI ګاز نل‌لیکه ټولټال ۱،۸۱۴ کیلومتره اوږده ده او د څلورو هېوادونو له خاورې تېرېږي: ترکمنستان – ۲۱۴ کیلومتره، افغانستان – ۷۷۴ کیلومتره، پاکستان – ۸۲۶ کیلومتره، چې بیا د هند تر پولو پورې رسېږي.

په ملګرو ملتونو کې د افغانستان پخواني استازي محمود صیقل د قطر او اندونیزیا ترمنځ د تحصیلي بورسونو د هوکړه لیک د لاسلیک په تړاو ویلي، چې دغه هوکړه لیک په داسې حال کې شوی چې ګواکي افغانستان په قطر پورې تړاو لري.

ښاغلي صیقل ویلي، چې قطر د افغانستان د اوسني وضعیت مسوول دی او همدوی افغانستان د ښځو په زندان او د ترهګرو په ځاله بدل کړی دی.

نوموړي زیاته کړې، چې قطر طالبان بیا ځلې واک ته ورسول او اوس د افغانستان په استازیتوب له اندونیزیا سره تحصیلي هوکړه لیک لاسلیکوي.

صیقل دغه راز ویلي چې په افغانستان پورې اړوند هر ډول هوکړه لیک کې باید د د دغه هېواد د مشروع حکومت د استازي لاسلیک هم وي.

د یادونې ده چې دوه ورځې وړاندې د قطر او د اندونیزیا ترمنځ دغه هوکړه لیک لاسلیک شوی، چې په اساس یې یو شمېر افغان محصلین به په اندونیزیا کې تحصیلي بورسیې ترلاسه کړي.

د افغانستان کرکټ بورډ غوراوي کمېتې، د بنګله‌دېش پر وړاندې د درې یو ورځنیو لوبو لپاره د لوبغاړو نوملړ اعلان کړ.

کرکټ بورډ د دې لوبو لپاره د حشمت‌الله شهیدي په لوبډلمشرۍ ۱۹ لوبغاړي انتخاب کړي دي.

ټاکل شوې، چې یادې سیالۍ د روان کال د نومبر میاشتې په ۶مه نېټه د متحده عربي اماراتو په شارجه لوبغالي کې پیل شي.

د لوبغاړو نوملړ کې حشمت الله شهیدي، رحمت شاه، رحمن الله ګربز، اکرام عليخیل، عبدالمالک، ریاض حسن، درویش رسولي، صدیق اتل، عظمت الله عمرزی، محمدنبي، ګلبدین نائب، راشدخان، ننګیال خروټی، الله محمدغضنفر، نوراحمد لکڼوال، فضل الحق فاروقي، بلال سمیع، نوید ځدراڼ او فریداحمد ملک ټاکل شوي دي.

د هند لومړی وزیر نریندرا مودي وايي، په اوکراین کې جګړه باید په سوله‌ییزه توګه پای ته ورسېږي.

د بریکس له سرمشریزې سره هم‌مهاله نریندرا مودي د روسیې ولسمشر ولادیمیر پوتین ته ویلي چې، هند په اوکراین کې سوله غواړي.

نریندرا مودي دا څرګندونې داسې مهال کوي چې د روسیې په کازان کې د بریکس سازمان سرمشریزه پيل شوې ده.

د یادونې ده چې ولادیمیر پوتین به د دې غونډې په څنډه کې د ملګروملتونو له عمومي منشي انتونیو ګوتېریش سره وګوري.

د کابل په بازارونو کې افغانۍ په بې مخینې ډول لوړه شوې ده.

د کابل په بازارونو کې نن یوه افغانۍ له لس زره ایراني تومان سره تبادله کېږي.

نن سهار د افغانۍ ارزښت ۹۷۰ زرو تومان ته رسېده؛ خو درې بجې بیا د افغانیو قیمت لس زرو تومان ته پورته شو.

د یادونې ده، چې د نورو بهرنیو اسعارو پر وړاندې هم د افغانیو بیه لوړه شوې، چې نن یو ډالر په ۶۶.۷۲ افغانۍ تبادله کېږي.

پداسې حال کې چې نن د بریکس سازمان ناستې لومړۍ ورځ ده؛ خو د طالبانو حکومت لا هم تمه لري چې دغې ناستې ته به وبلل شي.

د طالبانو حکومت د صنعت او سوداګرۍ وزارت سرپرست نورالدین عزیزي ویلي، تمه لري چې په روانې او یاهم راتلونکي ناسته کې د ګډون بلنه ورکړل شي.

د یادونې ده چې د طالبانو حکومت تر دې وړاندې له روسیې څخه په یو لیک کې غوښتی وو چې په دغه ناسته کې د ګډون بلنه ورکړي.