د فرانسې خبري اژانس د لبنان د دوو امنیتي سرچینو په حواله چې نومونه یې نه دي په ډاګه کړي، راپور ورکړی چې د لبنان د اردو او وسله والو سوریانو ترمنځ له جګړې وروسته، د سوریې نوي حکومت هیواد ته د لبناني اتباعو په ننوتلو نوي بندیزونه لګولي دي.

یاد اژانس ویلي، چې د بشارالاسد حکومت له نسکورېدو او د تحریرالشام واک ته له رسیدو وروسته، دا پرمختګونه د دواړو ګاونډیو ترمنځ د ډیپلوماتیکو شخړو لومړۍ قضیه ده چې تاریخ یې کړکیچن دی.

د یادونې ده چې لبناني اتباعو ته مخکې اجازه ورکړل شوې وه چې له ویزې پرته سوریې ته ننوځي او یوازې د خپلو پاسپورټونو یا شناختي کارتونو په کارولو سره ننوځي.

په ورته وخت کې د لبنان د عامه امنیت یوه چارواکي ویلي، چې د لبنانیانو پرمخ د سوریې د پولې تړلو دوی حېران کړي دي.

د پښتونخوا د ملي عوامي ګوند مشر محمود خان اڅکزي د پاکستان په حکومت کلکې نیوکې کړي.

ښاغلي اڅکزي د جمعې په ورځ یو مطبوعاتي کانفرنس ته خپله وینا کې ویلي، چې د پاکستان حکومت، دغه هېواد د خانه جنګۍ لوري ته روان کړی دی.

نوموړي ویلي، چې پاکستان کې هره ورځ له ۲۰ څخه تر ۳۰ تنو پورې وژل کیږي؛ خو په دغه هېواد کې په قلم اؤ اسمبلۍ کې په خبرو کولو بندیز دی او په داسې حالت کې خبره په افغانستان کې تر بمبارۍ رسېدلې ده.

د هغه په خبره، دا مهال چې پاکستان له کومو حالاتو تېریږي هغه ټولو ته معلوم دي خو غیر اییني اؤ غیر جمهوري واکمنانو سره ددې هیڅ فکر نشته.

نوموړی دا څرګندونې داسې مهال کوي، چې د جمعې په ورځ د اپېکس کمیټې غونډې ته د پاکستان لومړي وزیر شهباز شریف پخپله وینا کې وویل، پاکستان د پولې د پورې غاړې څخه کېدونکې دراندازۍ ته غاښ ماتوونکی ځواب ورکړی دی اؤ بیا به یې هم ورکوي.

د امریکا منتخب ولسمشر ډونالډ ټرمپ اعلان وکړ، چې مورګان اورتګاس یې د منځني ختیځ لپاره د امریکا د ځانګړي استازي مرستیاله ټاکلې ده.

مورګان اورتګاس د ډونالډ ټرمپ په لومړۍ اداره کې د امریکا د بهرنیو چارو وزارت ویانده وه.

د یادونې ده چې تېره ورځ مایک جانسن، چې د ډونالډ ټرمپ ملاتړی دی، د دوهم ځل لپاره د امریکا د استازو جرګې مشر وټاکل شو.

مایک جانسن، چې د ډونالډ ټرمپ ملاتړی دی، د دوهم ځل لپاره د امریکا د استازو جرګې مشر وټاکل شو.

د امریکا د استازو په مجلس کې د جمعې په ورځ د ددغې څوکۍ لپاره رایه اچونه وشوه.

سي‌ان‌ان ویلي، چې په دې رایو کې جانسن په پیل کې د خپل ګوند د ځینو غړو د ملاتړ د نشتوالي له امله د ماتې په لاره کې و؛ خو د هغه مخالفینو په وروستۍ دقیقه کې د هغه د ملاتړ لپاره خپلې رایې بدلې کړې.

جانسن ددې رایې اچونې په پای کې د ۲۱۸ رایو په ګټلو سره بریالی شوی دی.

مایک جانسن د امریکا د استازو جرګې د رییس په توګه له بیا ټاکل کېدو وروسته په خپلو لومړنیو څرګندونو کې ویلي، چې نوی کانګرس به د خلکو غږ واوري او په وینا یې، د ده لومړیتوب به د امریکا د سرحدونو دفاع وي.

د پاکستان پولیسو قومندان اختر حیات ادعا کړې چې په پښتونخوا کې جنګېدونکي وسله وال ۳۵ سلنه افغانان دي.

د هغه په خبره، په دغه سیمه کې ۱۸۸ اورپکې فعالیت کوي، چې افغانستان سره له فرضي کرښې ګټه پورته کوي.

نوموړی وایي، یادو ډلو په اسماعیل خان، ټانک، بانو او لکي مروت ولسوالیو کې پناه ځایونه جوړ کړي دي.

د حیات په خبره، دا سیمې اوس د اورپکو په مرکز بدلې شوې دي.

د اسلام اباد په I-9 سیمه کې تېره شپه د پولیسو پر یو سټیشن برید شوی.

پاکستانۍ رسنۍ وایي، چې پولیسو نن سهار هغه راکټ موندلی چې د پولیس سټیشن پر بهرني دېوال لګېدلی.

د سرچینې د معلوماتو له مخې، له لومړنیو شواهدو داسې ښکاري چې برید ټي‌ټي‌پي کړی وی.

تر اوسه د برید د تلفاتو په اړه څه نه دي ویل شوي.

د یادونې ده چېI-9 د اسلام اباد با امنه سیمه ګڼل کېږي.

د طالبانو د لوړو زده کړو وزارت امر کړی چې د پوهنتونونو او خصوصي ښوونیزو مؤسسو استادان باید د دولتي پوهنتونونو له لارې و ګمارل شي.

دې وزارت په یوه خبرپاڼه کې د پوهنتونونو او خصوصي ښوونیزو مؤسسو د استادانو د کموالي یادونه کړې او ویلي یې دي چې د دې ادارو د علمي کادرونو د ګمارنې د چټکتیا لپاره یې یو لارښود ترتیب کړی دی.

د طالبانو د لوړو زده کړو وزارت ویلي چې د دې لارښود له مخې، خصوصي پوهنتونونه او ښوونیزې مؤسسې دې ژر تر ژره خپل خالي بستونه اعلان او د کاندیدانو لېست دې دولتي پوهنتونونو ته واستوي، څو د ګمارنې پروسه له همدې پوهنتونونو څخه پر مخ یوړل شي.

دې وزارت ټینګار کړی چې د خصوصي او دولتي پوهنتونونو مسئولین دې ترتیب شوی لارښود په دقت سره مطالعه کړي او د علمي کدرونو د غړو د جذب د کړنلارې له مخې دې د خصوصي ښوونیزو مؤسسو د استادانو د ګمارنې دوسیې په چټکۍ وګوري.

د پاکستان د بهرنیو چارو وزیر اسحق ډار په ۲۰۲۱ کال کې کابل ته د ای‌ایس‌ای د مشر جنرال فیض حمید پر راتګ سخته نیوکه کړې او ویلي یې دي، چې د یوې پیالې قهوې په بدل کې یې د ټي‌ټي‌پي غړي ازاد او پاکستان یې نا امنه کړ.

اسحق ډار ویلي، د پوښتنې ځای دی، چې له ۴۰ زرو څخه تر ۴۵ زره جنګیالیو ته څنګه اجازه ورکړل شوه چې د پاکستان خاورې ته داخل شي.

د یادونې ده چې جنرال فیض حمید د طالبانو حکومت تر واک ته رسېدو وروسته کابل ته راغی او دلته یې د ” دود پتي ” چایو ډک ګیلاس سره اېستل شوي عکس ګڼ غبرګونونه را وپارول.

د خيبرپښتونخوا د بنو ضلعې په داود شاه سيمه کې نامعلومو وسله والو يو پوليس په ډزو وژلى دى.

سرچینې وایي، چې هغه سخت ټپي شوی و او روغتون ته په لاره کې د ټپونو له امله یې ساه ورکړه.

تر اوسه ددې پېښې مسولیت کوم چا نه دی منلی.

د فرانس پرس خبري آژانس راپور ورکړی چې د المان او فرانسې د بهرنیو چارو وزیران د سوریې پلازمېنې دمشق ته تللي دي.

د المان د بهرنیو چارو وزارت په یوه خبرپاڼه کې ویلي چې د دغه سفر موخه له سوریې سره مرسته کول دي، تر څو دغه هېواد یو ځل بیا د یو فعال هېواد په توګه پر خپل قلمرو بشپړ کنټرول ولري.

د آلمان د بهرنیو چارو وزیرې، انالینا باربوک، د دمشق سفر او د سوریې د موقت حکومت له چارواکو سره د لیدو په اړه وویل، چې د تحریر الشام ځواکونو په اړه د بدبینۍ سربېره، دوی باید د سوریې خلکو سره د ملاتړ لپاره دا مهم فرصت له لاسه ورنه کړي.

د آلمان د بهرنیو چارو وزارت په وینا، د فرانسې د بهرنیو چارو وزیر، ژان نوئل بارو، او انالینا باربوک به د اروپايي اتحادیې په استازیتوب د سوریې د موقت حکومت له مشر، احمد الشرع، سره وویني.