د خیبر پښتونخوا په بېلابېلو سیمو کې اووه پاکستاني پوځيان وژل شوي دي.
سیمهييزې سرچینې وايي، چې د شمالي وزیرستان په بېلابېلو سیمو کې د ایف سي ځواک سرتیری، پولیس افسر او دوه نور پوځیان وژل شوي دي.
د سرچینو د معلوماتو له مخې، دغه راز بیا د سوات په خوازه خېلو سیمه کې هم یو پولیس افسر د نامعلومه کسانو له لوري وژل شوی دی.
یاد کسان تر ډېره له وسله والو سره په مخامخ جګړه کې وژل شوي دي.
سرچینې زیاتوي، چې د لکي مروت به ګنډي چوک کې د عملیاتو پر مهال دوه پوځیان وژل شوي او درې نور ټپیان شوي هم دي.
د نړۍ د مسلمانانو شورا مشر محمدالعیسی د اسلامي همکاریو سازمان ناسته کې ویلي، چې د ښځو د زدکړو له حقونو په کُلي یا جزيي شکل منکرېدل او بیا دا اسلام پورې تړل ناسم عمل دی.
نوموړی زیاتوي حلالو ته حرام ویل لویه ګناه ده.
هغه د طالبانو حکومت ته په اشارې ویلي چې خپلو پرېکړو ته اسلامي بڼه ورنه کړي.
د یادونې ده چې یادې ناستې طالب چارواکي هم بلل شوي وو؛ خو ګډون یې پکې ونه کړ.
د افغان ښځو یو شمیر افغان فعالانې چې مشري یې شبنم صالحي او سپوژمۍ اکبرزۍ کوي د مغرضو کړیو ضد او د افغان اتلانو په ملاتړ د اَظیسيسي او بریتانیا پارلمان په ګډون یو شمیر اړوندو ادارو ته د لیک استولو او ایکس سپیسونو له لارې د افغانستان د کریکټ څخه ملاتړ څرګند کړی دی.
میرمن اکبرزۍ په خپل ایکس پاڼې لیکلي چې افغان میرمنې د نارینه وو او ښځینه وو دواړو او د هیواد د ملي کرکټ ټیم لپاره د دوامداره ملاتړ غوښتنه کوي.
هغې لیکلي:«د جنګسالارۍ او ویجاړونکي سیاست برعکس، موږ ښځې، په نړیوالې ټولنې غږ کوو چې د افغانستان ملاتړ وکړي، او په دې هېواد کې د جنسیتي توپیر د له منځه وړلو او په رسمیت پیژندلو لپاره عملي ګامونه پورته کړي.»
د بشري حقونو پخوانۍ غړې او د پوهنتون استادې شبنم صالحي بیا افغان لوبغاړي د خلکو ترمنځ د یوالي سمبول بولي او لیکلي چې د دوی تحریم کول هغه ملت منزوي کوي چې دمخه یې ستونزې زغملي دي.
صالحي لیکلي:«د افغان سپورټ ټیمونو په نښه کول افغانانو ته زیان رسوي، نه طالبانو ته، ددې پرځای راځئ د افغان میرمنو او مدني ټولنو د ملاتړ په زیاتولو تمرکز وکړو.»
د بلاروس د بهرنیو چارو وزارت لومړي مرستیال لوکا شیویچ د طالبانو حکومت د بهرنیو چارو وزارت له سیاسي مرستیال شیر محمد عباس ستانکزي سره کتلي دي.
د یاد وزارت مرستیال ویاند ضیاء احمد تکل ویلي، چې په دې لیدنه کې د افغانستان او بلاروس تر منځ په اقتصادي او سیاسي اړیکو او نورو ګډو همکاریو خبرې وشوې.
په یاده ناسته کې لوکا شیویچ ویلي چې دوی غواړي له افغانستان سره په بېلابېلو برخو کې د همکاریو لپاره بنیاد کېږدي.
د غزې په شمال کې ۴ اسرائیلي سرتېري وژل شوي دي.
د اسرائیل پوځ اعلان کړی، چې په دې برید کې یې یو افسر او یو بل سرتېری ټپیان شوي دي.
سرچینه زیاتوي، دوی په سیمه کې عملیات کړي، چې د حماس درې جنګیالي یې هم وژلي دي.
د یادونې ده، چې په غزه کې د جګړې له پیل راهیسې د دوی د وژل شویو سرتېرو شمېر ۴۰۳ تنو ته رسیږي.
واشنګټن پوسټ ورځپاڼې په یوه مقاله کې لیکلي، چې ښايي ټرمپ پر ایران د اعظمي فشار پالیسي له عملي کولو کار واخلي.
دغې مقاله کې زیاته شوې، چې ښايي ټرمپ لږ تر لږه اسرائیل سره هوکړه وکړي؛ ترڅو د ایران اټومي تاسیسات په نښه کړي.
مقاله زیاتوي، ایران اوس مهال له ګڼو ستونزو سره مخ دی او د امریکا دا اقدام به یې نور هم ستونزو سره مخ کړي.
د سرچینې په خبره، که څه هم د ایران د اوسني حکومت پر وړاندې په کور دننه ذهنیت جوړ نه دی؛ خو که د دوی پر اټومي تاسیساتو بریدونه وشي؛ نو ښايي په کور دننه د دغه حکومت پر وړاندې ذهنیت یو شي.
پاکستان کې د اسلامي همکاریو سازمان ناستې په څنډه کې د افغانستان لپاره د پاکستان ځانګړي استازي صادق خان د افغانستان لپاره د یوناما له مشرې روزا اتونبایووا سره کتلي دي.
صادق خان په دغه ناسته کې ویلي، چې پاکستان کې دا ناسته د نړیوالو لپاره ښه فرصت دی چې په افغانستان کې د بشري بحران په اړه خبرې اترې وکړي.
هغه ویلي، نړیوال باید له افغانستان سره خپلو مرستو او ملاتړ ته دوام ورکړي.
د یادونې ده، چې یادې ناستې ته د طالبانو حکومت هم وربلل شوی وو؛ خو برخه یې په کې وانخیسته.
لاس انجلس کې د یو شمېر افغانانو کورونه هم سوځېدلې دي.
لیکوال او استاد زمان ستانیزي پرخپله ایکس پاڼه لیکلي، چې هلته یې کور او کتابونه سوځېدلي دي؛ خو خپله ورنه روغ راوتي دي.
بل لورته سرچینې وايي، چې هلته د یو شمېر نورو افغانانو کورونه هم سوځېدلې دي.
د یادونې ده، چې په لاس انجلس کې د اور لګېدنې له کبله د اوښتو تلفاتو شمېر ۱۶ تنو ته لوړ شوی دی.
لیکوال: شاه محمود میاخیل
د جمهوري دولت د ملي دفاع وزارت سرپرست
د هر چا چې مصارف د مشروع عاید نه زیات وي نو پوه شئ چې فساد یې کړې دی او د غیر مشروع عاید نه مصارف کوي.
پروژوي کسان هغه کسان دي چې د افغانستان تجزیه غواړي، د افغان کلمه نه مني او هره ورځ د ولس په منځ کې د نفاق نوې سوژې مطرح کوي او د افغانانو انرژي بیځایه مصرفوي.
دغه پروژوي کسان د سیمې او نړۍ د استخباراتو لخوا مؤظف شوي چې د افغانانو توجه په افغانستان کې د یو منل شوي، قانونمند او ولسواکه نظام د جوړیدو نه بلې خواته واړوي. له بده مرغه یو شمیر ځوانان په غیر اګاهانه توګه د دوی خبرې بدرګه کوي.
د پروژوي کسانو د مخنیوي لپاره مؤثره لار، اګنورول دي ځکه دغه پروژوي کسان غواړي چې د خلکو توجه ځانونو ته واړوي. دغه کسان په داخل د افغانستان کې خو پریږده په خپل کور او سیمه کې هم نفوذ نه لري او نه څه کولې شي. ډیر پرې سر مه خوږوې.
د ټولو لپاره پکار ده خپله توجه اصلي مسلې ته واړوي چې افغانستان بیا د نیابتي جګړې میدان نشي او ټول افغانان د قانون په چوکاټ کې په شریکه سره ژوند وکړي.
په یویشتمې پیړۍ کې حکومتولي او پرمختګ یوازې او یوازې د یو ولسواکه او قانونمند نظام په موجودیت کې شتون پیدا کولې شي.
په ولسواکه نظام کې قومي، سمتي، ژبني ټیکه داران او د اسلام د نوم نه د سؤ استفادې کولو کسان رول نه لري.
په ولسواکه او قانونمند نظام کې د افرادو رول کم او د قانون او سیستم رول مهم وي. د افغانستان د جمهوري غوښتونکو خوځښت په استازولې، مونږ افغانستان کې ثبات او قانونمند نظام د چوکۍ او پروژو د اخستلو لپاره نه غواړو بلکې ټولو افغانانو ته د قانون په چوکاټ کې د مساوي حقوقو غوښتونکي یو.
په افغانستان کې د واحد، خپلواک او ولسواکه نظام په هیله چې د نفې او انحصار د قدرت سیاست او تبعیض پکې نه وي.
په داسې حال کې چې د ولسي جرګې پخوانۍ غړې فوزیه کوفي په دې موخه د انګلستان له پارلمان څخه په یو لیک کې غوښتي چې د افغانستان د کرکټ ملي لوبډلې سره په چمپینز ټرافي کې لوبې لغوه اعلان کړي، چې د کرکټ لوبډلې د يو شمیر طالب مشرانو سره عکسونه اخیستي؛ خو د کورنۍ غړې یې د یو لوړ پوړي طالب چارواکي سره واده کړی.
یوې باوري سرچینې حماسه میډیا ته ویلي چې د فوزیه کوفي خور “مریم کوفي” د طالبانو د استخباراتو ریاست د مالي تفتیش له رئیس هدایت الله جابر سره واده کړی.
هېره دې نه وي چې تر دې وړاندې فوزیه کوفي قطر کې له طالبانو سره د افغان حکومت د مذاکراتي پلاوی غړې وه او په مرکو کې یې ویلي وو چې طالبانو ورته ویلي، چې تغیر یې کړی.