بلوچستان کې د ځمکې پر سر شخړه شوې، چې له امله یې دواړو لورویو ته مرګ ژوبله اوښتې.

له سیمې څخه سرچینې وايي، چې په دغه پېښه کې لس تنه مړه او پنځلس نور ټپيان دي.

د سرچینې د معلوماتو له مخې، قومي مخورو د شخړې د زیاتېدو د مخنیوي هڅې پیل کړې دي.

‏د غزې روغتیا وزارت خبر ورکوي چې د اسراییلي ځواکونو په ډزو کې لږترلږه ۶۷ فلسطینیان وژل شوي دي.

دغه پېښه هغه مهال رامنځته شوه چې خلک په شمالي غزه کې د ملګرو ملتونو مرستو ته انتظار وو.

اسراییلو په دغو سیمو کې د بې ځایه شویو خلکو د ایستلو نوې هدایتونه هم صادر کړي دي.

د یادونې ده، چې په دغه برید کې ګڼ شمېر نور کسان ټپیان شوي دي.

د طالبانو حکومت په یوې خپرې کړې اعلامیه کې د فلسطین په غزه کې د ښځو او ماشومانو پر ضد د اسرائيلي ځواکونو دوامداره بمبارۍ، لوږې، تندې، ناروغیو او کلابندۍ ته سخت غبرګون ښودلی دی.

اعلامیه کې راغلي چې «اسلامي امارت» دغه ظلمونه په کلکو ټکو غندي او دا یې له انساني، اسلامي او نړیوالو اصولو سره ښکاره تضاد بللی دی.

د طالبانو حکومت له اسلامي هېوادونو، مسلمانو ملتونو او ټولو مؤثرو نړیوالو اړخونو غوښتنه کړې چې د غزې مظلومو خلکو، په ځانګړې توګه ښځو او ماشومانو ته د بېړنیو بشري مرستو د رسېدو لپاره عاجل اقدام وکړي.

په اعلامیه کې خبرداری ورکړل شوی چې که نړیوال او اسلامي امت په دې برخه کې بې‌پروایي وکړي، نو د الله تعالی له سخت عذاب سره به مخ شي.

د طالبانو حکومت د کورنیو چارو سرپرست وزیر خلیفه سراج‌الدین حقاني د پاکستان د کورنیو چارو له وزیر سید محسن نقوي او مل پلاوي سره وکتل.

په دې لیدنه کې دواړو خواوو د همکاریو پر پراخولو، امنیت، نشه‌يي توکو ضد مبارزې، او افغان کډوالو ته د آسانتیاوو پر برابرولو ټینګار وکړ.

حقاني د باور فضا د ستونزو د حل کلیدي وبلله او زیاته یې کړه، چې ستونزې باید د خبرو له لارې حل شي.

په ورته مهال بیا نقوي ژمنه وکړه چې سوداګرو او خلکو ته به آسانتیاوې برابروي او ګډ کار ته به دوام ورکوي.

تهران کې د طالبانو حکومت سفارت تایید کړه چې ۱۸ کلن افغان ځوان امیر طاها رضایي، چې مړی یې په ایران کې د دماوند په سیمه کې موندل شوی و، د دوه ایراني اتباعو له لوري وژل شوی دی.

سفارت ویلي، چې د طالبانو حکومت سفیر دا موضوع له ایراني چارواکو سره شریکه کړې.

دوی ټینګار کوي، چې د پېښې عاملین باید له قانوني جزا سره مخ شي.

د یادونې ده، چې د هغه د وژل کېدو په تړاو یو تن نیول شوی وو، چې پر خپل جرم یې اعتراف هم کړی.

د پاکستان د کورنیو چارو وزیر محسن نقوي او د افغانستان په چارو کې د دې هېواد ځانګړی استازی محمد صادق خان د یو پلاوي په مشرۍ کابل ته رسیدلي دي.

د طالبانو حکومت د کورنیو چارو وزارت لومړي مرستیال محمد نبي عمري د حامد کرزي په نړیوال هوایي ډګر کې د پاکستاني پلاوي هرکلی وکړ.

ویل کیږي چې د نقوي د سفر موخه، دوه اړخیزې اړیکې، افغان کډوال او د ټي‌ټي‌پي اړوند مسایلو خبرې اترې ښودل شوي.

یوه طالب چارواکي حماسه میډیا ته وویل، چې تر هغه چې یو باصلاحیته پاکستاني پلاوی د ستونزو هوارۍ په موخه سفر ونه کړي په دې ډول نمایشي سفرونو ستونزې نه حل کیږي.

دا په روانه اونۍ کې دوهم پاکستاني لوړپوړی پلاوی دی چې کابل ته سفر کوي.

د ازموینې د ملي ادارې مشر عبدالباقي حقاني کابل کې د یوې غونډې پرمهال د کانکور عمومي اول نمره اعلان کړ.

ښاغلي حقاني، سید موسی د سید داود سادات زوی د ۳۵۶ نمرو په اخیستو د کانکور عمومي اول نمره اعلان کړ.

حقاني په ترتیب سره محمد طاهر د محمد نذیر زوی دوهم نمره او حمزه د عبدالطیف زوی دریم نمره اعلان کړ.

نوموړي وویل چې د تیر کال په پرتله ۲۰ زره ډېرو زده کوونکو په کانکور کې ګډون کړی وو.

هغه وویل چې یولک پنځه سوه اته څلویښت کسانو ګډون کړی وو، چې د لوړو زده کړو وزارت یوازې د یو لک کسانو د جذب وړتیا لري.

د ایران د بهرنیو چارو وزارت د خراسان رضوي د استازولۍ مشر احمد معصومي‌فر اعلان کړی چې د افغان کډوالو د وتلو مهلت د سنبلې تر ۱۵پورې تمدید شوی دی.

نوموړي ویلي، که له دې نېټې وروسته بې‌اسناده افغانان له هېواده ونه وځي، د اقامت جریمه به پرې ولګول شي.

د نوموړي په وینا، د تمدید دلیل د هوا تودوالی او د لازم زیربناوو نه شتون دی.

دا په داسې حال کې ده، چې ایران په دې وروستیو کې سلګونه زره افغان کډوال را اېستلي دي.

د پاکستان رسنۍ خبر ورکوي چې د دغه هېواد د کورنیو چارو وزیر، محسن نقوي، د یکشنبې په ورځ، د چنګاښ ۲۹مه، کابل ته سفر کوي.

د راپورونو له مخې، دا به د نوموړي یو ورځنی سفر وي، چې په ترڅ کې به د طالبانو حکومت له مشرانو، په ځانګړي ډول د دوی د کورنیو چارو له وزیر سراج‌الدین حقاني سره وویني.

د طالبانو حکومت تر اوسه د دې سفر په اړه څه نه‌دي ویلي.

دا د محسن نقوي لومړی سفر دی چې د طالبانو حکومت تر واکمنۍ لاندې افغانستان ته کوي.

د سعودي عربستان شهزاده الولید بن خالد بن طلال بن عبدالعزیز، چې شل کاله په کوما کې و، نن مړ شو.

هغه په ۲۰۰۵ کال کې د یوې ټرافیکي پېښې وروسته کوما ته تللی و او په دې موده کې ورته «شهزاده ویده» نوم ورکړل شوی و.

د هغه د جنازې لمونځ به د دوشنبې په ورځ د ماسپښین وروسته په امام ترکی بن عبدالله جومات کې ترسره شي.