د پښتون ژغورنې غورځنګ مشر منظور پښتین ویلي، چې پښتانه نه یوازې دا چې خوندي نه دي، بلکې د انسان په سترګه ورته نه کتل کېږي.

هغه زیاته کړې چې د ریاست لخوا د پښتنو وژنې، بې‌درکه کول، او پر هغوی د ظلم دوامداره پالیسۍ د ریاست اصلي کړنې دي.

منظور پښتین په خپلو تازه څرګندونه کې ویلي چې په سوات کې د مرګ له خولې څخه د ماشومانو، ښځو او سړو چیغې دولت ولیدې؛ خو د ژغورنې هېڅ هڅه یې ونه کړه.

همداراز یې د لکي مروت پېښه یاده کړه چې پکې د پاکستاني پوځ لخوا ۱۶ بې‌ګناه کسان په ډرون برید کې ووژل شول.

هغه د کوټې د مصور خان یادونه هم کړې، چې شپږ میاشتې مخکې لادرکه او اوس یې مړی موندل شوی دی او دا پېښه د ریاست بې‌پروايي ښيي.

منظور پښتین ادعا کړې چې پنجاب د پښتنو او بلوڅو وسایل لوټي او هغوی د څو پارلماني څوکیو په لالچ کې سره وېشي.

د روسیې د امنیت شورا مرستیال یوري کوکوف ویلي، مسکو په افغانستان کې د داعش د پلانونو له امله ژور اندېښمن دی.

نوموړي ویلي، داعش هڅه کوي له افغانستانه د منځنۍ آسیا هېوادونو، په تېره تاجیکستان او ازبکستان، له لارې روسیې ته خپل نفوذ وغځوي.

روسیه، سره له دې چې د طالبانو له حکومت سره نږدې اړیکې لري، لا هم د خپلو پولو او سیمې امنیت ته جدي اندېښنه لري.

د ترکیې د بهرنیو چارو وزیر هاکان فیدان ویلي، اسراییل نه‌شي کولی د ایران اټومي تاسیسات له‌منځه یوسي.

هغه زیاته کړې چې ترکیې هغه مهال ایران ته خبر ورکړی و، چې د امریکا الوتکې د برید پر مهال په هوا کې وې.

فیدان ویلي، امریکا د جګړې په حالت کې نه ده.

د ترکیې د “TRT” تلویزیون د راپور له مخې، د ایران یو شمېر اټومي تاسیسات د وروستیو بریدونو پر مهال زیانمن شوي دي، خو امکان شته چې د ایران او امریکا تر منځ اتومي توافق وشي.

د بشري حقونو سازمان هه‌نگاو وايي، ایران درې افغان اتباع د مشهد په مرکزي زندان کې اعدام کړي دي.

هه‌نګاو وایي، چې د اعدام شویو کسانو له ډلې پاشاه او احمد نومې کسان پېژندل شوي، خو د درېیم کس هویت لا نه‌دی څرګند.

یاد سازمان زیاتوي، چې دغه کسان د نشه یي توکو په قاچاق نېول شوي وه.

دا اعدامونه د سرطان په ۴مه ترسره شوي؛ خو تر اوسه یې ایران رسمي تائید نه‌دی کړی.

د جمعې په ناوخته ساعتونو او د شنبې په سهار د تهران شاوخوا سیمو کرج، اسلام‌شهر، بیدگنه، ملارد او پرند کې د چاودنو د غږونو او د هوايي دفاعي سیستمونو د فعالېدو راپورونه ورکړل شوي دي.

تر دې دمه د ایران رسمي سرچینو د دغو پېښو په اړه څه نه‌ دي ویلي.

دا هم لا روښانه نه‌ده چې غږونه د دفاعي عملیاتو پایله وه که ځمکنۍ چاودنې وې.

د ایران د بهرنیو چارو وزیر عباس عراقچي ویلي، که د امریکا ولسمشر ډونالډ ټرمپ له ایران سره د اټومي هوکړې غوښتونکی وي، باید د علي خامنه‌يي په وړاندې له سپکاوي ډډه وکړي.

عراقچي په ایکس کې لیکلي، «موږ خپل ارزښت پېژنو او بل چاته د برخلیک پرېکړې اجازه نه ورکوو.»

هغه زیاته کړې، اسراییلو د ایران له بریدونو د خلاصون لپاره امریکا ته پناه وړې، چې دا چاره د ایران د ولس لپاره د توهین وړ ده.

د امریکا ولسمشر ډونالډ ټرمپ وایي، هېله لري چې ډیر ژر د اسرائیل او حماس ترمنځ اوربند وشي.

‏ولسمشر ټرمپ خبریالانو ته ویلي چې فکر کوي اوربند ته نږدې شوی او ښایي راتلونکې اونۍ د دواړو لوریو ترمنځ اوربند وشي.

د امریکا ولسمشر له نړیوالو وغوښتل چې د دوی په څیر د غزې سره خپلو بشري مرستو ته دوام ورکړي.

د مېدان وردګ سیمه‌ ییز چارواکي وایي چې د تېرې شپې سختو ورښتونو له امله په نرخ، چک، سیداباد او دایمیرداد ولسوالیو کې سېلابونه راوتلي، چې خلکو ته یې درانه مالي زیانونه اړولي دي.

د طالبانو حکومت تر واک لاندې د ولایت مقام له لوري خپره شوې خبرپاڼه وایي، که څه هم تر اوسه د انساني تلفاتو راپور نه‌ دی ورکړل شوی؛ خو سېلابونو ګڼې لارې د ترافیکو پر مخ بندې کړي دي.

سربېره پر مېدان وردګ، سېلابونو تېره ورځ د افغانستان په یو شمېر نورو ولایتونو کې هم زیانونه اړولي، چې ځینو سیمو ته د لاسرسي ستونزې او د خلکو د استوګنې کورونه او کرنیزې ځمکې یې زیانمنې کړي دي.

ځایي طالب چارواکي وایي د مرستې ټیمونه هڅه کوي تر څو د اغېزمنو شویو سیمو سړکونه بېرته خلاص او له اړمنو کورنیو سره مرسته وشي.

د طالبانو حکومت د امربالمعروف او نهې عن المنکر وزارت ویاند سیف السلام خیبر ویلي، چې هلمند کې د اووه کلنې نجلۍ پلار او د هغې ۴۵ کلن خاوند ونیول شول.

د نوموړي په خبره، پلار یې دا ماشومه د پیسو په مقابل کې ورکړې وه؛ خو ورسپارل کېدو سره سم پرې مسؤلین خبر شوي او دواړه یې نیولي.

خیبر زیاتوي، چې یاد کسان محکمې ته سپارل شوي دي.

د آلبانیا لومړي وزیر ادی راما ویلي چې هېواد یې له ټولنې څخه د افغان ښځو د ایستلو پر وړاندې چوپ نه پاتې کېده؛ نو ځکه یې خپلې دروازې د فعالو او ورزشکارو افغان ښځو پر وړاندې پرانېستې.

د افغانستان د ستراتیژیکو مطالعاتو انستیتوت ویلي چې راما ته «د سولې لپاره د کلتورونو همکارۍ- ابن سینا نړیواله جایزه» ورکړل شوې.

راما د جایزې د اخېستلو پر مهال ویلي، چې د افغان ښځو مبارزه یوازې د دوی لپاره نه ده، بلکې زموږ لپاره هم ده او په وینا یې دا د انسانیت د روح مبارزه ده.