د طالبانو حکومت د صنعت او سوداګرۍ وزارت سرپرست نورالدین عزیزي وایي، د صنعتي سیمو د قانون توشیح او له بهره راستنو شویو سوداګرو ته د اسانتیاوو مقرره د شیخ هبتالله له لوري تصویب شوې ده.
هغه وايي، تېر کال په هېواد کې ۲۷ سوداګریز نندارتونونه جوړ شوي او ۱۷ نړیوالو نندارتونونو کې یې کورني تولیدات نندارې ته وړاندې کړي دي.
عزیزي زیاتوي چې اوس د افغانستان سوداګري له ۱۰۰ څخه زیاتو هېوادونو ته غځېدلې او د بېلابېلو هېوادونو سره یې ۱۶ اقتصادي هوکړې هم لاسلیک کړي دي.
د سوریې د ولسمشرۍ ماڼۍ اعلان کړی چې د سویډا په جنوبي سیمه کې د دروزي ټولنې او ځایي قبیلو ترمنځ د نښتو د پای ته رسولو لپاره به ځانګړې ځواکونه واستول شي.
دا اقدام د امنیتي او سیاسي تدابیرو په چوکاټ کې ترسره کېږي.
همداراز، د کورنیو چارو وزارت ځواکونه د درعا ـ سویډا پر لویه لاره لیدل شوي، چې د وروستي امر په تمه دي.
اسرائیل هم سوریایي ځواکونو ته د محدودې داخلې اجازه ورکړې ده.
دا په داسې حال کې ده، چې په دروزو کې د قومي نښتو له امله تر ۳۰۰ زیات کسان ووژل شول.
د “زن آنلاین پوهنتون” د افغان نجونو لپاره د آنلاین زده کړو د رسمي پېژندنې لیکلی وړاندیز اروپایي پارلمان ته سپارلی دی.
دا وړاندیز د پوهنتون له خوا، د ۱۷ زره محصلینو په غوښتنه، د فرید سالنګي له لوري وړاندې شوی دی.
د دغې غوښتنې هدف د هغو نجونو لپاره د زدهکړې فرصت برابرول دي چې له حضوري تعلیم څخه محرومې شوې دي.
د طالبانو حکومت له واک ته رسېدو وروسته د نجونو پرمخ ښوونځي او پوهنتونونه تړلي، چې پراخ نړیوال غبرګونونه یې راپارولي؛ خو دا پرېکړه لا هم نه ده بدله شوې.
د اوکراین نوې لومړۍ وزیرې یولیا سویریدینکو ویلي، هېواد یې له امریکا سره د یوې هوکړې پر جزییاتو کار کوي، څو واشنګټن د کییف د ډرون جوړونې کورني صنعت کې پانګونه وکړي.
دا څرګندونې یوه ورځ وروسته له هغه شوې چې ولسمشر زېلېنسکي له نوې کابینې وغوښتل چې د وسلو صنعت پراخ او له نړیوالو شریکانو سره همکاري زیاته کړي.
امریکایي لوري تر اوسه په دې اړه څه نه دي ویلي.
اسرائیل او سوریې د ترکیې، اردن او نورو ګاونډیو په ملاتړ د سویډا ولایت کې د اوربند هوکړه کړې.
ترکیه کې د امریکا سفیر تام باراک ویلي، ټولې خواوې دې وسلې پر ځمکه کېږدي او د یووالي لپاره دې کار وکړي.
اسرائیل سوریایي ځواکونو ته د سویډا محدودې داخلې اجازه ورکړې چې د شخړو د پای ته رسولو هڅه وکړي.
دمشق هم ویلي چې د امنیت او ثبات د راوستلو لپاره ځانګړي ځواکونه لیږي.
اسرائیل ژمنه کړې چې د دروزی اقلیت ملاتړ به کوي.
وروسته تر هغې، چې دروزو کې قبیلوي شخړې رامنځته شوې، اسرائیل پر سوریې بریدونه پیل کړل.
د فاریاب د ولایتي شورا پخوانی غړی او د عبدالرشید دوستم پخوانی قوماندان، محب الله میرازد په میمنه ښار کې ترور شوی دی.
سرچینې وایي چې وسلهوالو پر نوموړي ډزې کړې او له سیمې تښتېدلي دي.
نوموړی تازه د طالبانو حکومت د بلنې له لارې افغانستان ته راستون شوی و.
د طالبانو حکومت تر اوسه د دې پېښې په اړه څه نهدي ویلي.
د امریکا ولسمشر ډونالډ ټرمپ اعلان وکړ چې ژر به ۱۰ نور یرغمل شوي له غزې څخه آزاد شي.
هغه دا خبرې سپینې ماڼۍ کې کړې او د خپل ځانګړي استازي، ستیف ویتکاف، هڅې یې وستایلې.
دا په داسې حال کې ده چې د حماس د نظامي څانګې ویاند ویلي که د اوربند خبرې بریالۍ نه شي، حماس به نور له موقتي اوربند سره موافقه ونه کړي.
د افغانستان کرېکټ بورډ اعلان کړی چې د شپږیزې لیګ لسم پړاو به نن (شنبه) په دوو سیالیو پیل شي.
په لومړۍ لوبه کې امو نهنګان له بست ساتونکو سره مخامخ کېږي، او دویمه سیالي به د مس عینک اتلانو او سپینغر لوبډلې ترمنځ وي.
جهادي مشر شیخ الحدیث والقران استاد عبدالرب رسول سیاف ویلي، د طالبانو له خوا د ښځو نیول او د نارینهوو له خوا زندان ته وړل نه یوازې شرعاً ناروا دي، بلکې د اسلامي عزت، افغانۍ غیرت او انساني مروت ښکاره سپکاوی دی.
استاد سیاف لیکلي:«طالبه! له خدایه وډار شه!
پر ښځو لاس اچول، د نارینهوو لخوا د هغوی نیول، او بیا زندان ته لېږل چې هلته هم نارینه زندانساتونکي وي، نه یوازې دا چې د دین او شریعت خلاف کار دی، بلکې د اسلامي عزت، افغانۍ غیرت او انساني مروت ښکاره سپکاوی هم دی.»
جهادي مشر استاد عبدالرب سیاف دا کار د شریعت په نوم تر ټولو ستره جفا بللې او د طالبانو له حکومت یې غوښتي چې له دې ډول کړنو لاس واخلي.
دا په داسې حال کې ده چې په ټولنیزو رسنیو کې خپرې شوې ویډیوګانې ښيي چې د طالبانو ځواکونو کابل کې له بازارونو او تفریحي ځایونو څخه نجونې نیولي او له ځانه سره یې وړي دي.
ایران کې پخواني سفیر عبدالغفور لېوال د طالبانو حکومت رئیس الوزرا ملا محمد حسن اخوند او د پاکستان د بهرنیو چارو وزیر اسحاق ډار روغبړ ته غبرګون کې لیکلي، چې د واکمن استبداد له هرڅه د پاکستانیت تورې زرڼې څاڅي.
دغه روغبړ، چې د ټولنیزو رسنیو د کاروونکو پام را اړولی، یو شمېر طالبانو دا د افغاني کلتور برخه ګڼلې؛ خو لېوال وایي، که دا کلتور پالل کېږي، نو ولې بیا له پاکستانه د ورکړل شوي ناسم دیني تفسیر له امله د افغانانو نور کلتورونه تر پښو لاندې شول.
د لېوال په خبره، په افغاني فرهنګ کې تر دې نور زیات ارزښتونه شته، چې اوس تر پښو لاندې دي.