‏د طالبانو حکومت د بیا واکمنېدو څلورمې کلیزې په درشل کې، د ملګرو ملتونو د ښځو د برابرۍ ادارې ځانګړې استازې سوزان فرګوسن ویلي، چې پر افغان ښځو او نجونو لګول شوي بندیزونه اوس د خلکو د ورځني ژوند برخه ګرځېدلي او هېڅ محدودیت نه‌دی لرې شوی.

هغې دا د ښځو د حقونو تر ټولو ستر نړیوال ناورین وباله چې مخ په عادي کېدو روان دی.

فرګوسن ټینګار وکړ، چې ۴۰ سلنه افغان ښځې لا هم د بدلون هیله لري او نړۍواله ټولنه باید د هغوی د بنسټیزو حقونو او اقتصادي ونډې ملاتړ ته دوام ورکړي.

د ملګرو ملتونو د شمېرو له مخې، شاوخوا ۸۰ سلنه نجونې له زده‌کړو، کار او روزنیزو فرصتونو بې‌برخې دي چې د هېواد اقتصاد ته به تر ۲۰۲۶ کال پورې نږدې ۹۲۰ میلیونه ډالر زیان ورسوي.

یاد سازمان ویلي چې افغانستان کې ښځې په کابینه او سیمه‌ییزو جوړښتونو کې هیڅ ګډون نه‌لري.

د دې سازمان په وینا، د ایران او پاکستان څخه د ۱.۷ میلیونه کډوالو جبري ستنېدل، چې ډېری یې ښځې او نجونې دي، د ناورین ژورتیا ډېره کړې ده.

د طالبانو حکومت مشر شیخ هبت‌الله اخوندزاده د څلورمې کالیزې په مناسبت په خپاره کړي پیغام کې ویلي، چې تر دې وروسته دې وزیران او کابینه د سرپرست کلیمه نه کاروي.

هغه په یوه اعلامیه کې ویلي، چې د دوی په راتګ پنځوس کلن اشغال پای ته ورسېد او افغانان د ښه امنیت خاوندان شول.

نوموړي له خپلو چارواکو غوښتي، چې له ولس سره ښه رویه وکړي.

هغه دغه راز د فلسطین خلکو ته هم دعا کړې.

د بخښنې نړۍوال سازمان په یوه تازه اعلامیه کې ویلي، چې د طالبانو له واکمنۍ وروسته د افغانستان قانوني چوکاټ له منځه تللی او پر ځای یې د طالبانو د «اسلامي شریعت» له سخت‌دریځه تفسیر څخه الهام اخیستی نظام حاکم شوی دی.

اعلامیه کې راغلي، چې دغه نظام بې‌ثباتي، خپلسرې محکمې، شکنجې او عامه مجازات رامنځته کړي دي.

یاد سازمان ټینګار کړی چې طالبان باید ژر تر ژره د قانوني تشې د پای ته رسولو لپاره اساسي قانون بېرته رامنځته کړي او د بشري حقونو مراعت تضمین کړي.

د راپور له مخې، د طالبانو تر راتګ مخکې افغانستان د اساسي قانون، ټاکل شوې ولسي جرګې او درې‌پړاوه قضایي سیستم لرونکی و؛ خو اوس محاکمې د څو کسانو له لوري د شخصي دیني تفسیر پر بنسټ ترسره کېږي.

د بخښنې نړۍوال سازمان له نړیوالې ټولنې غوښتنه کړې، چې پر طالبانو فشار راوړي څو د قانوني نظام، قضایي خپلواکۍ او بشري حقونو درناوی بېرته ټینګ کړي.

د طالبانو حکومت ویاند ذبیح الله مجاهد وايي، له ټولو هېوادونو سره غوره اړیکې غواړي او دا د دوی د ازادۍ تقاضا هم ده.

هغه ویلي، له هیچا سره د نورو پر سر دوښمني نه کوي.

مجاهد زیاتوي، له ټولو ګاونډیو هېوادونو سره د دوی اړیکې ښې دي.

هغه د طالبانو حکومت د څلورمې کالیزې په مناسبت یو ټویټر سپیس کې ویلي، چې د سیمې له هېوادونو سره اړیکې د پخوا په پرتله ښې شوې دي.

د طالبانو حکومت ویاند ذبیح الله مجاهد وايي، د منځنۍ او جنوبي اسیا ترمنځ د وصل یوازینۍ نقطه افغانستان دی او دواړه لوري اړتیا لري، چې له افغانستان سره غوره تعامل کړي.

د هغه په خبره، د سیمې هېوادونه د خپلو ګټو لپاره هم افغانستان سره غوره اړیکې غواړي او د افغانستان جیوپولیټک ارزښت د دې سبب شوی، چې دا سیمه اوس په ارزښتناکې سیمې بدله شي.

نوموړی وايي، دوی هڅه کوي، چې افغانستان د سیمې هېوادونو د وصل په نقطه بدل کړي.

د طالبانو حکومت ویاند ذبیح الله مجاهد وايي، په خلکو باید داسې کار وشي، چې خپله په ځان باندې شرعي احکام عملي کړي.

هغه د طالبانو حکومت د څلورمې کالیزې په مناسبت ویلي، چې په ټول افغانستان کې باید دې ته کار وشي، چې خلک له فشار پرته شرعي احکام ومني.

مجاهد وايي، د خلکو له لوري په خپله د شرعي احکامو منل تر دې غوره دي، چې په هغوی دا احکام په زوره ومنل شي.

ټاکل شوې امریکایي ولسمشر ډونالډ ټرمپ د خپل روسيي سیال ولادیمیر پوتین سره د امریکا په الاسکاي کې وګوري.

ولسمشر ټرمپ سپینې ماڼۍ کې خبریالانو ته وویل چې ۲۵ سلنه ددې چانس شته چې خبرې په ښه شکل مخته لاړې نه شي.

ولسمشر ټرمپ وویل که د ولسمشر پوتین سره یې خبرې ښې مخې ته لاړې شي؛ نو د راتلونکې ناستې لپاره به د اکراین ولسمشر ولادیمیر زلنسکي، د اروپايي هیوادونو د یو شمیر مشرانو او د بریتانیا د لومړي وزیر په ګډون په الاسکای کې دوهمه ناسته وکړي.

الاسکای د روسیې سره شاوخوا ۶۰ کیلو متره فاصله لري.

د خیبرپښتونخوا په کورمې ولسوالۍ د علیزۍ په سیمه کې د نامعلومو وسله‌والو په برید کې درې پولیس وژل شوي دي.

چارواکي وايي، برید کوونکو لومړی د پولیسو پر موټر لاسي بم وغورځاوه او وروسته یې پر هغوی ډزې وکړې.

د پېښې وروسته په سیمه کې د شکمنو د نیولو عملیات پیل شوي دي.

پخواني ولسمشر حامد کرزي پر نورستان د پاکستان بریدونه وغندل.

کرزي پر خپله ایکس‌پاڼه لیکلي، چې پاکستان باید د افغانستان ملي حاکمیت ته درناوی وکړي.

د کرزي يه خبره، اسلام اباد باید له کابل سره نیکو اړیکو جوړولو ته را ودانګي.

د یادونې ده، چې وړمه ورځ د پاکستان له لوري پر نورستان بریدونه شوي وو؛ خو د طالبانو حکومت چارواکو یې په اړه څه ونه ویل.

بل لورته ټولنیزو رسنیو کې د یادو بریدونو په اړه خبرونه لاس په لاس شوي وو.

د ایټالیا د لامپدوسا ټاپو ته نېږدې د کډوالو دوه کښتۍ ډوبې شوي چې له امله یې لږ تر لږه ۲۶ کسان مړه او ۶۰ نور ژغورل شوي دي.

د ملګرو ملتونو د کډوالو د ادارې په وینا، په دواړو کښتیو کې شاوخوا ۹۵ کسان سپاره وو چې له لیبیا نه یې اروپا ته سفر کاوه.

د ژغورل شویو کسانو له ډلې ۵۶ نارینه او څلور ښځې دي.

چارواکي وايي، ښايي نور کسان لا هم ورک وي.

د یادونې ده چې د روان کال له پیل راهیسې په منځني مدیترانه کې د اروپا پر لور د تګ پر مهال لږ تر لږه ۶۷۵ کسان ژوند له لاسه ورکړی دی.