په پاکستان کې د طالبانو پخواني سفیر ملا عبدالسلام ضعیف د افغانستان په ختیځو ولایتونو کې د وروستیو بریدونو غندنه کړې او هغه یې د هېواد پر حریم «بېشرمانه تېری» بللی دی.
ښاغلي ضعیف ویلي، په دې بریدونو کې ګڼ افغانان زیانمن شوي او دا عمل د پاکستان له ظالمانه کړنو سره تړاو لري.
نوموړي زیاته کړې، پاکستان په خپلو سازشي موخو کې ناکام شوی او اوس هڅه کوي چې د نړۍ پام د درواغو او دسیسو له لارې ځان ته واړوي.
د جمهوري حکومت د ملي دفاع وزارت سرپرست شاه محمود میاخېل په ننګرهار او خوست کې د پاکستاني ځواکونو وروستي بریدونه غندلي.
نوموړي ویلی، چې له تاریخ باید یو څه زدکړه وشي.
هغه زیاته کړې، چې غمیزې په کاذب غرور او کاذب روایتونو نه ختمیږي بلکې وطن نور هم تباه کوي.
د یادونې ده، چې تېره شپه پاکستان د خوست او ننګرهار پر یو شمېر سیمو بریدونه کړي وو.
د طالبانو حکومت تر اوسه په دې اړه څه نه دي ویلي.
د پاکستان د پنجاب ایالت پراخې سیمې د ستلج، راوي او چناب سیندونو د اوبو د زیاتوالي له امله ډوبې شوې دي.
چارواکي وايي، تر اوسه لږ تر لږه ۱۵ تنه مړه شوي او له ۶۰۰ زرو ډېر کسان اغېزمن شوي دي.
د راپورونو له مخې، د سختو بارانونو او د هند له بندونو د اوبو خوشې کېدل د سېلابونو اصلي لاملونه دي.
تر اوسه له ۱۵۰ زرو زیات کسان او لسګونه زره څاروي خوندي ځایونو ته لېږدول شوي او په ۷۰۰ کلیو کې د مرستې کمپونه جوړ شوي دي.
ملي ادارې د طبیعي پېښو د مدیریت خبرداری ورکړی، که د قادراباد بند مات شي، د حافظاباد او چنیوټ سیمې به له لوی ګواښ سره مخ شي.
د ننګرهار پخواني والي ضیاءالحق امرخېل د خوست او ننګرهار د وروستیو ډرون بریدونو غندنه کړې او هغه یې د افغانستان پر خاوره ښکاره تجاوز بللی دی.
ښاغلي امرخېل د پېښې د قربانیانو کورنیو ته تسلیت ویلی.
هغه په خپله ایکسپاڼه لیکلي:«واضحه ده چې پاکستان د تاریخ په اوږدو کې بیا بیا ثابته کړې چې په افغانستان کې هیڅ نظام او حکومت نه غواړی، مهمه نه ده چې هغه د کوم فکر او کومه ډلیې وي.»
نوموړي دغه راز ویلي، اړینه ده چې ټول افغانان د ملي یووالي په ساتلو سره د دې هېواد د هر ډول لاسوهنې او دښمنانه کړنو مخنیوی وکړي.
مډرن ډیپلوماسي په یوه مقاله کې لیکلي، پاکستان چې د طالبانو د واکمنېدو پر مهال د سرحدي امنیت هیله لرله، اوس دغه هیلې له منځه تللې او د طالبانو رژیم ورته په مستقیم امنیتي ګواښ بدل شوی دی.
راپور زیاتوي، له ۲۰۲۲ کال وروسته چې د «ټيټيپي» سره د سولې خبرې ناکامې شوې، په پاکستان کې بریدونه زیات شوي دي.
دوی ویلي چې یوازې د ۲۰۲۵ کال د مارچ په میاشت کې تر ۱۰۰ زیات بریدونه شوي چې له امله یې ۲۲۸ کسان وژل شوي او ۲۵۸ ټپیان شوي دي.
په مقاله کې ویل شوي، د ډیورنډ کرښې پر سر لانجې او نښتې لا هم روانې دي او د کډوالو شتون د پاکستان پر سرچینو دروند فشار اچولی دی.
د ولسي جرګې پخواني غړي کمال ناصر اصولي ویلي، د پاکستان له لوري د افغانستان پر خاورې هوایي بریدونه د منلو نه دي او هر ډول ظلم پای لري.
ښاغلي اصولي پر خپله فېسبوکپاڼه لیکلي، ځینې کسان یا د پاکستان جاسوسي کوي او یا د هلته د اوسېدو او شناختي کارتونو له امله د دې هېواد ملاتړ څرګندوي، چې دا د هېواد په زیان ده.
هغه زیاته کړې، د وطن په سر معامله د مور په سر معامله ده او د افغانانو هیله دا ده چې د طالبانو حکومت د پنجاب د تجاوز پر وړاندې یوازې غږ پورته نه کړي، بلکې د لر او بر پښتنو له ولس سره کلک ودرېږي.
نوموړي د طالبانو د حکومت له اړوندو ادارو غوښتنه کړې، چې د پاکستان د نفوذ لپاره کارکوونکي کسان وپېژني او د خپلو کړنو سزا ورکړي.
د نوموړي په باور، دا کار به د طالبانو د حکومت د هېوادپالنې څرګندونه وکړي.
د پکتیا پخواني والي محمد حلیم فدایي ویلي، دوی د ترهګرۍ او هر ډول افراطیت مخالف دي، خو د افغانستان پر خاوره برید د ټولو نړیوالو اصولو ښکاره نقض بلل کېږي.
هغه پر خپله ایکسپاڼه لیکلي:«له بده مرغه، د واکمنو افراطي او غیر انساني سیاست د دې لامل شوی چې د داسې بریدونو پر وړاندې نه یوازې دوی چوپ پاتې شي، بلکې سیاسي مخالفین یې هم غبرګون ونه ښيي.»
فدایي ټینګار کړی، چې د دې او ورته پېښو د مخنیوي یوازینۍ لاره د بینالافغاني خبرو پیل او د داسې حکومت جوړول دي چې د خلکو د رایو او انتخاب پر بنسټ ولاړ وي.
ملګرو ملتونو ویلي، چې په غزه کې قحطي اوس رسمي حقیقت دی او هره ورځ د لوږې له امله د ماشومانو او ملکي وګړو مړینې ډېرېږي.
د بشري مرستو مرستیالې جویس موسویا امنیت شورا ته ویلي، چې نیم میلیون خلک له سختې لوږې او مرګوني ګواښ سره مخ دي، او که مرستې ونه رسېږي، دا شمېر به د سپټمبر تر پایه ۶۴۰ زرو ته ورسېږي.
ملګرو ملتونو اټکل کړی، چې لږ تر لږه ۱۳۲ زره ماشومان د خوارځواکۍ له جدي ګواښ سره مخ دي.
د غزې د روغتیا وزارت په وینا، یوازې په تېرو ۲۴ ساعتونو کې لس تنه، چې دوه ماشومان هم پکې دي، د لوږې له امله مړه شوي دي.
تر اوسه په ټولیز ډول ۳۱۳ کسانو، چې ۱۱۹ یې ماشومان دي، د لوږې او خوارځواکۍ له امله خپل ژوند له لاسه ورکړی.
د ننګرهار د رسنیو دفتر وايي، چې تېره شپه د شینوارو ولسوالۍ په ۲۹مې ویالې سیمه کې د یوه ځایي اوسېدونکي پر کور دوه هوایي بریدونه شوي دي.
په اعلامیه کې ویل شوي چې په دې پېښه کې د یوې مېرمنې په ګډون څلور ماشومان ټپیان شوي دي، چې روغتون ته لېږدول شوي او روغتیایي وضعیت یې د ډاډ وړ بلل کېږي.
اعلامیه ټینګار کړی چې د برید له امله زیانمن شوی کس له هېڅ وسلهوالې ډلې سره تړاو نه لري.
بل لور ته، د خوست په سپېرې ولسوالۍ کې هم په همدې شپه هوایي برید ترسره شوی دی چې درې ماشومان پکې وژل شوي او څو تنه نور ټپیان دي.
د پښتون ژغورنې غورځنګ مخکښ غړي حنیف پښتین د خوست ولایت د سپېرې ولسوالۍ پر ملکي خلکو وروستي بریدونه غندلي.
پشتین پر خپله ایکسپاڼه لیکلي، پاکستاني پوځ یو ځل بیا د ډیورنډ کرښې دې غاړې ته بې ګناه خلک په نښه کړي چې دا د افغانستان پر ځمکنۍ بشپړتیا ښکاره تېری او د ټولو نړیوالو اصولو خلاف عمل دی.
نوموړي زیاته کړې چې پاکستان له کلونو راهیسې هڅه کوي د ډیورنډ دواړو غاړو پښتانه ولسونه کمزوري او د ځان محتاجه وساتي.
د هغه په خبره، د همدې تګلارې له مخې په تېرو شلو کلونو کې د کرښې دېخوا ولسونه د بېلابېلو نومونو لاندې ځپل شوي او د هغې غاړې خلک د پاکستاني پوځ د جنګي پالیسیو له امله زیانمن شوي دي.