د تېر جمهوري حکومت لومړی مرستیال امرالله صالح وایي، د جمهوریت پر وړاندې دسیسه د جمهوریت وروستیو کې جوړه نه شوه؛ بلکې دا دسیسه څه باندې یوه لسیزه وړاندې جوړه شوې وه.
ښاغلي صالح پر خپله ایکسپاڼه لیکلي، ۲۰۱۳ کال دوحې ته دعوت شوی و او هلته کوربه هېواد ورته ویلي وو چې له طالبانو سره وګوري.
نوموړی زیاتوي، ده د کوربه هېواد دا غوښتنه په کلکه رد کړه او وروسته یې هملته د وخت ولسمشر حامد کرزی هم وپوهوو، چې د دغه پلان پر وړاندې ودریږي.
د صالح په خبره، که څه هم کرزي د طالبانو د دوحې دفتر په اړه غبرګون وښود؛ خو کومه پایله یې ورنه کړه.
نوموړی وایي، د یو سم پلان پر اساس د جمهوریت د نړېدو دا پلان شنډېدلای شو؛ خو د جمهوریت له لوري ورته منظم پلان ونه نیول شو.
