ترکیې پرون په انقره کې د فضایي- دفاعي صنعت پر یوه شرکت له خونړي برید وروسته په عراق او سوریه کې پر کردي ملېشو هوایي بریدونه کړي دي.
د ترکیې دفاع وزارت په یوه خبرپاڼه کې ویلي چې د عراق او سوریې په شمال کې یې د هوایي بریدونو پایله کې “د ترهګرو ډلو” ۳۲ مرکزونه ویجاړ کړي او زیات شمېر وسلهوال یې وژلي دي.
د یادونې ده چې پرون د ترکیې په هوایي شرکت برید کې د بریدګرو په ګډون پنځه تنه وژل شوي او ګڼ شمېر نور ټپیان دي.
د دغه برید مسوولیت تر اوسه کومې ډلې نه دی منلی، خو ترکیه دا برید د کردانو د کارګر ګوند یا پيکېکې کار بولي.
